唔係吓話，我去咗《教父》世界！: 貳節

「叩，叩，代表你好，我已經通知咗軍師，如果教父想見你，會再通知你。」有人係門外面講。
 
講完之後，只係聽到一陣離去嘅腳步聲，我都係時候面對呢個咁奇特嘅情況。經過頭先沖涼而冇一大班人好似日本整蠱節目咁衝入嚟，我將係整蠱節目嘅機會率降低咗。
 
我行到落花園，一如以往奇異嘅目光望埋嚟，我決定搵個唔太起眼嘅地方坐低聽吓佢地講咩，觀察吓發生咩事。
 
我聽到係一場婚宴，仲要主人家嫁女添。我見到個攝影師畀人打爛咗部相機，睇嚟婚禮攝影師同喺香港做記者一樣咁危險，成個畫面越嚟越似曾相識。
 
就係呢個時候，我聽到一個熟悉嘅聲音，我個部冇訊號嘅手機竟然響緊，仲要冇來電顯示，奇怪都咁一定係替身攻擊啦。事到如今，替身攻擊都要聽啦。
 




「喂，呀傑，我個電話壞咗。」電話另一邊嘅呀木講。

「吓！？」
 
「本身我都懷疑緊自己部電話壞咗，成年都冇震過，而之後我頭先諗住用手提打畀你啦，竟然唔通喎，咁我咪落街用電話亭打囉，通咗，咁咪即係我部電話壞咗囉。」呀木講。
 
就喺呀木發表佢呢段咁震驚十四億人嘅壞電話偉論嘅同時，我見到主人家行出嚟。
 
holy shit ！真係一個講緊廣東話嘅馬龍白蘭度呀！同我想像一模一樣，唔係真係咁老套畀Netflix食咗落《教父》世界？
 




「喂！」「喂！」「喂！」呀木講。
 
 
「講件事你知，我頭先開Netflix ，之後有道白光，我暈咗醒翻就喺一個馬龍白蘭度著緊老西煲呔紅玫瑰仲講緊廣東話嘅地方，我懷疑自己入咗《教父》世界。」

「估唔到你仲黐過我，但聽落幾好，有冇簽名同合照？」呀木講。
 
 
「想呀，但叫黑手黨大佬影相同攞簽名唔係咁易架喎。」
 




「冇事嘅，幫我要多張，最好攞埋簽名啦。」呀木講。
 
「唔係，我有啲擔心。」
 
「如果我真係入咗電影世界，我點走？」
 
「你認真架？」呀木講。
 
「你話你嗰電話亭可以穿梭時空嘛，你可唔可以過嚟？」
 
「點過？」呀木講。
 
「好似Doctor who咁？」
 
「er.......我講嘅穿梭時空係《隔世救未來》嗰種，唔係《Doctor who》嗰種喎。」呀木講。




 
 
「吓......」
 
「.......」呀木冇野講。

「.......」
 
「er......」呀木都冇野講。

「咁呀，我會睇吓搵唔搵到機會叉電。」
 
「你研究吓個電話亭可唔可以做到《Doctor who》咁。」
 
「我覺得我搵幾個大軍嚟發功會易啲。」呀木講。




 
「如果你成功就過嚟，唔得就預三日後同樣呢個時間你打比我。」
 
「好，不過話時話，點解佢地講廣東話？」呀木講。
 
「可能係因為我netflix地區較香港？」
 
「你有道理。」呀木講。
 
 
「咁最後，你覺得今次你打到比我係僥倖定咩？」
 
「er......我試下。」呀木講。
 
 




嘟.......
我坐咗係到五分鐘，冇響過。
 
仆街啦今次，我翻去現實世界嘅希望交咗比個傻架。
 
就係咁樣，我就成為咗一個流落電影世界，畀人以為我攞住塊杯墊自言自語嘅痴線佬。