[陳子鋒系列] 大學入學篇: （三十一）迎新營 - City Hunt (2)
「咦，你兩個喺度傾咩呀？」
我和安德烈談了一會，Grace已經完成了剛剛的遊戲，等待着下一位成員。
「我同安德烈傾緊做完呢個任務，係繼續下個任務定食咗嘢先啫。」
「你講完之後我都有啲餓添。」
Grace豪不掩飾地拍了拍肚子，能感受到他真的有餓的感覺。
繼Grace之後，Apple，Joyce，Oscar同Raymond都相繼完成遊戲，旁邊原本還在追趕着我們的另一小組，在我們完成遊戲後發出了嘆息的聲音。
「哇，好在我哋早咗少少嚟啫，如果唔係我哋可能贏唔到呢個任務。」
最後一個完成遊戲的Raymond，浮誇地用手裝作抹汗，真的讓人有種緊張的感覺。
「大家都做得好好，我哋嚟鼓勵下自己先。」
家琪在旁邊帶領我們喊出勝利的slogan，像這種平常會讓人感到害羞的舉動，不知道為甚麼到了大學又會變得自然起來，不知道是否公開試實在令學生太過壓抑，導致來到大學做甚麼也好，都比考公開試輕鬆得多。
「好啦，雖然完成一個任務，但我哋仲有好多任務可以做，而且大家鬆懈嘅話，好可能被其他組追返上嚟。我建議你哋盡快決定下一個任務。」
提出建議的是黃炎冰，這般主動和會帶氣氛的人，不是我平常認識的黃炎冰，看來他已經很能融入大學的生活。
「大家大家，啱啱子鋒同安德烈喺度傾緊食咩，我想問下係咪會食咗嘢先㗎？」
Grace指着我和安德烈，看來他是要把我們拉進他那吃飯的陣營之中。
「嗯，迎新營主角係你哋，你哋自己安排啦，我同Judy唔會畀太多意見。」
家琪看了看Judy，Judy也有默契地點了點頭。
「咁樣嘅話......」
Grace將目光放到我和安德烈以外的組員上，希望取得他們的同意。
最後經過了一輪討論後，還是決定將大學裡面有的任務都跑一遍看看，如果都已經被完成了，就先去吃飯。
不知道是幸運還是不幸，我們組別還真的找到了還有分數的任務並順利完成，代價就是用餐的時間被延後了。
「好啦，我唔得啦，快啲去食嘢啦。」
Grace在眾人面前拍了拍小腹，旁人也能感受到他真的不能再等下去了。
於是我們一行十人，決定先到城大Canteen祭一下五臟廟後，才再出發。
來到Canteen，發現亦有其他組別正在用餐，看來大家也是差不多的想法。
我趁着點餐的這段時間，稍為跟黃炎冰談了一下，告訴他晨光教那邊的事情，還有安德烈提醒我有關猶大的事情。
「值得慶幸嘅係，貝爾菲格唔會係完美狀態咁復活，猶大嘅事都無辦法，我哋只能夠見步行步。不過，關於猶大嘅事，我諗Judy嘅嫌疑好大。」
「點解咁講？」
「其實你Reg day當日，有個女仔跟喺你後面，當時雖然覺得有啲奇怪，但佢身上感覺唔到任何靈力，就無繼續留意。直到你迎新日，我先發現Judy就係當日跟喺你後面嘅女仔，所以佢好可能係有目的咁跟住你。」
聽到黃炎冰的說明，看來Judy的嫌疑真的很大，難怪他會在紅門前能準確喊出我的名字，看來我老早就被他盯上了。
「可能佢跟住我，係因為我靚仔啫。」
「你算罷啦，仲有心情講埋啲廢話。不過都好嘅，好過你以前，可能已經縮埋唔知去邊。」
「我以前都不知幾勁！仲有呀，以前中學我哋咪會喺學校傾啲恐怖故仔嘅，你仲記唔記得呀？」
我看到Judy從黃炎冰身後慢慢走過來，馬上改變話題並向黃炎冰示意。
「哦，甲子年啲鬼故呀嘛，我梗係記得啦，師弟。」
「你哋咁好傾嘅？」
「咦，Judy，你唔係買嘢食咩？」
「無呀，我見唔係好肚餓，隨便買個包食算啦，見你哋兩個喺呢度傾計，仲以為你同子鋒喺度偷偷地傾密偈添。」
「傾就係傾，不過唔係啲咩密偈，而係以前讀中學啲嘢啫。好啦，我買嘢食先啦，個組仔交返畀你。」
黃炎冰說完後，便扔下我一個和Judy，害我有點尷尬不知道怎反應才好。
「係呢子鋒，你仲唔嗌嘢食？」
「我仲諗緊，哈哈，不過你唔駛擔心，我食嘢好快手，幾分鐘就搞掂㗎啦。」
我滿腦子都還在想着Judy是猶大的可能性，根本集中不了精神，只好隨便點了些東西來吃。
正當我付完錢後，Judy冷不防跟我說。
「Irene係你女朋友？」
「吓？你點得出呢個結論？」
我發自內心地冒出這個疑問。
「我睇你哋明明識又扮唔識咁，然後又鬼鬼崇崇喺度傾密偈，咪諗緊你哋係咪拍拖囉。其實係拍拖都唔駛收收埋埋啦。」
「痴線，梗係唔係啦，我點會同佢拍拖，唔好玩啦。」
「哦？係咩？咁你鍾意咩類型嘅女仔？」
「吓？順，順眼囉，無咩特別啫。」
「咁，我順唔順眼？」
我沒有想到Judy會跑來帶起這個話題，在我思考怎麼回應時，我點餐的地方正好喊到我的號碼，把我解救出來。
「咦，我份嘢食得囉喎，我去攞嘢食先。」
Judy聽到我這樣說，沒有再說甚麼，只是在我背後一直看着我，那刺人的視線，即使我不回頭也能清楚感受到，但在這麼開揚的地方，就算Judy真的是猶大，應該也做不出甚麼吧。
於是我便趕快回去小組那邊，希望從他的視線中逃脫開來。