[陳子鋒系列] 大學入學篇: （三十）迎新營 - City Hunt (1)
「大家早晨，又係我Andy呀。」
「早晨呀，我係Angel。」
「距離上次迎新日已經差唔多一個月，唔知大家仲認唔認得自己啲組員呢？」
「你估個個好似你咁咁無記性咩，仲有，我知好多組都個別有再約出嚟gathering，我都偷偷地去咗其中兩組嘅聚會添。」
「搞錯呀，點解無人邀請我去㗎？」
「咁你要反省下啦。好啦，相信大家唔會好似Andy咁，又無記性又無人緣。廢話唔多講啦，我哋即刻開始今次嘅活動city hunt啦。」
「喂喂喂，開始還開始，你都講下咩係city hunt先得㗎。」
「唔駛我哋講㗎啦，每組嘅OC會幫我哋解釋玩法。咦？你唔係又無人通知你呀？」
「吓？真係無人通知我喎，唉，灰爆，都唔知請我嚟做MC做乜。反正無人理我，各位，我去北潭涌渡假營抖下先啦，你哋到咗再通知我啦。今次記得預埋我啦。」
「見你咁慘，我陪你去啦，大家，陣間北潭涌渡假營見。」
兩位大會司儀開場後，迎新營的工作人員開始每組分發一張地圖與及任務紙，上面詳細列舉着每個任務的位置、內容以及分數等資料。
我們組拿到資料後，長髮美女Apple便察覺到不妥。
「唔係喎，我哋組個OC仲未嚟嘅？咁我哋點開始？」
「係喎，未同你哋講添，我哋組個OC因為唔舒服，所以嚟唔到迎新營，所以學生會臨時請咗佢哋嘅朋友嚟幫手，但因為臨時拉夫嘅關係，佢都係早幾日先收到資料，等學生會同佢briefing完就會過嚟。」
「Judy你睇，話口未完佢就嚟啦。Irene，呢邊呀。」
「Irene？咁鬼熟嘅呢個名？」
我聽到家琪的叫喊後，對這個名字有種說不出的熟悉感。
「家琪，Judy，唔好意思，遲咗少少。」
從不遠處用小步跑的方式過來，映入眼簾的，竟然是黃炎冰。
「黃......」
雖然我差點脫口而出把他的真名說出來，但他那凌厲的目光把我的話硬生生塞回肚子裡。
而我雖然未有把名字說出來，但奇怪的舉動已被Judy注意到。
「咦，子鋒，你識Irene嘅咩？」
「佢係我師弟，之前讀同一間中學嘅。大家好呀，除咗子鋒同家琪，其他人都係第一次見，大家多多指教。」
黃炎冰怕我亂說話，搶先一步把我和他的關係簡單總結，而且也避免了安德烈說錯話的情況。
但他在說話的時候，看着Judy的眼神，硬是有種不協調感。
「好啦，雖然我係臨時加入嘅，不過我本身都有幫其他學會手搞O-camp，所以問題應該不大嘅。啱啱大家應該都有聽MC講過，我哋要玩一個叫City-hunt嘅遊戲，呢本小冊子入面有寫低晒所有任務，每個任務會有唔同嘅分數，亦有參與組別嘅限制，例如呢個同路人合照嘅活動，只容許三組參加，所以如果已經有三組完成咗，去到都唔可以再接呢個任務，同埋會浪費咗時間。我哋暫定四點半後就唔可以再接任務，無論到時幾多分都好，都要入去渡假營。當然，愈高分嘅組別會有獎勵，最低分嘅兩組會有懲罰。依家可以討論下應該去邊度同做邊啲任務，組爸組媽都可以一齊參與決定，而我主要就係負責監測住大家，唔會直接參與遊戲。好啦，我哋要快啲決定，隔離有幾組已經準備行動啦。」
黃炎冰一口氣把規則說完後，我們組的人馬上便商量應該怎樣行動，畢竟既然是類似比賽的形式，沒有人想輸的。
我們一行十人，決定從最近的地方開始進行遊戲，在城市大學中，有多個位置均有不同的任務，其中一個位置是在Lt-401這個地方。
由於這個任務的分數比較高，我們決定先去一趟。
「陳子鋒，陣間個任務我哋參加咗先，之後我有啲嘢同你講。」
安德烈趁着去Lt-401 的路上，來到我身旁如此說，我猜他是想說晨光教的事，便點了點頭回應。
來到Lt-401後，發現已經有另外兩組人在進行遊戲，亦看似快要完成。
因為這遊戲只容許頭三組能獲得分數，我們便加快腳步開始進行遊戲。
我亦如安德烈提出的要求一樣，自薦為第一個參與遊戲的人，幸好遊戲考驗的是靈活性跟反應，這方面當然難不到我；安德烈亦很快地完成遊戲。
緊接我們的，是嬌小的Grace，看來他不太擅長這種需要反應的遊戲，失敗了兩次似乎仍然抓不到訣竅，而這亦剛好為我和安德烈爭取了一點交流的時間。
「陳子鋒，晨光教嘅處理已經去到尾聲，最後一組教徒亦被我哋定位，我哋已經派人去處理，但作為核心嘅祭師似乎唔係可以說服嘅對象，而且佢似乎擁有某種可以奪人心智嘅魔力，處理起上嚟相當麻煩，不過只要多啲嘅時間，應該可以將佢制服。」
「制服？你哋就算自稱十一門徒，但都只係普通人咋喎，咁做會唔會有問題㗎？」
「我哋先唔係咩自稱......唉，算啦，同你爭論呢點根本無意思。你放心，晨光教本來就被定義為邪教，我哋出手唔會有問題嘅。同埋，如果唔係教會嘅人，根本無辦法抵抗佢嘅魔力，所以教廷已經溝通好，只要將呢個祭司處理好，晨光教就會被大幅削弱。」
「雖然聽落係好消息，但點解唔係成個晨光教被消滅而只係削弱？」
「你將宗教團體諗得太簡單啦，即使將最大嘅毒瘤消滅，佢嘅根都唔係咁易被拔起。但經過今次之後，佢哋唔會再咁囂張行事。」
「聽落似乎好順利，咁貝爾菲格嘅復活？」
「呢個都係我想講嘅重點，我哋同阿爾先生討論過，今次將晨光教逼到呢個地址，貝爾菲格能夠從信徒得到嘅力量會大大減少。只係，似乎無辦法完全阻止佢復活。」
「唔係啩，同當初講嘅唔同喎。」
「無辦法，似乎你上次傷到貝爾菲格之後，令佢嘅恨意加強，而且今次係佢得到你嘅唯一機會，所以無論點樣都好，貝爾菲格都會復活。但慶幸嘅係，似乎佢唔可能以百分之百嘅狀態回歸。」
「唉，咁都好過無啦，過咗成個月總算有啲好消息。」
「但呢件事其實未完，雖然祭司被我哋搵到，但根據佢哋記錄嘅資料，佢哋嘅信徒之中好多都有把柄喺佢哋手上，我哋仲逐單處理緊。而其中，似乎有好幾位嘅信徒或信徒嘅家屬已經係大學嘅一份子，你仲記得猶大嘛，我哋相信佢已經混咗入嚟我哋小組。」
「唉，我只係想好好咁享受下大學生活啫，你一嚟就同我講啲咁嘅嘢......」
「我都唔想同你講呢個壞消息，但你絕對有需要知道呢個事實，記住，我哋組入面，可以信得過嘅，只有我同Irene。」
安德烈的話，使我陷入了絕望之中。
把我的大學生活還給我！