野性呼喚: 第一百一十章 ： 等待令人焦慮
Van仔新居入伙差唔多兩星期，通知我早幾日部電視機已經安裝好，我叮囑佢呢個只係我小小心意，祝佢同Gigi日後生活美滿，佢亦都無須俾Gigi知道係我送嘅禮物。
上星期Gigi招呼佢班同事去佢新居天台燒烤，佢哋有十個人包括埋老闆娘分兩枱打麻雀，van仔同Gigi一個女同事無落場打，van仔話俾我知佢大多數時間都喺佢哋旁邊斟茶遞水。
不過佢話好彩同無打麻雀個女同事傾得幾埋，喺van仔嘅字典，傾得埋，即係佢哋互相對對方都有興趣，van仔鐘意追女仔嘅天性，仼何人都難以改變佢。
⋯⋯⋯⋯
晚晚坐喺電腦面前發呆，既然唔知點寫，白白花時間，倒不如先將同van仔第一日認識開始寫起，同佢嘅交往事無大小先寫落嚟，然後再考慮有無需要刪減嘅地方。
方針定咗落嚟，一切就變得容易，我一邊將van仔手記做藍本，一邊加入van仔當時唔知嘅嘢，同埋我嘅感受。
我將呢件事當成我係我當前急務，只要有時間，就坐低執筆，唔夠三個星期，初稿已經寫好，剩落嚟只係刪改功夫。
我可以形容自己係一隻待宰羔羊，等待令人焦慮，擔心XX睇完我嘅懺悔後，唔知會有咩反應，每日同佢通電話，雖然有講有笑好開心，但係唔知大家嘅笑聲，會隨住佢知道我嘅過往而終止。
越接近起行日子，心情越緊張，好想將自白嘅soft copy email俾佢睇，就算結果係喜係悲，咩都好，都可以早啲了結，但係XX講過佢係要hard copy。
我相信佢有原因，但係我唔知道佢用意。
⋯⋯⋯⋯
喺我思潮起伏嘅時候，手機震起嚟，就算唔睇來電顯示，大致上都估到係咩人打嚟。
自從陪van仔睇樓，個物業代理誤會咗我同van仔新婚，我乘機要向同業主減租，村屋單位已經承租咗，但係佢都不停俾電話我。
我問佢點解唔打電話俾van仔，個代理話最初兩三次都有打，不過每次都俾van仔用操口鬧。
我明白個代理都係想做生意，俾人鬧唔好受，所以俾打俾我，我都唔忍心粗聲粗氣對佢。
我坦白同佢講我無需要租樓或者買樓，但係佢都唔心息，叫我幫手遊說吓van仔。
如是者幾次，我唯有同佢講van仔唔係我老公。
我上次呃咗佢，以為佢知道真相 一定好嬲，點知佢反為好開心咁。
之後，佢打電話嚟向我推介仲頻密咗，而且每次都差唔多同一個鐘點打嚟。
“哈哈，今次又有咩好介紹呀？”
來電顯示真係呢個物業代理。
“哈哈，樓盤好多呀，不過你似乎無乜興趣。”
“你知我無興趣，你仲俾電話我，我怕嘥咗你時間。”
“我哋做代理，唔會覺得係嘥時間囉，如果個客講一聲無興趣，我哋就唔再聯絡人哋，咁永遠都介紹唔到好嘢俾人。
比如你先生追求你嗰陣，你話唔出街，佢就放棄，咁，今日佢唔會娶到你囉。”
“哈哈，上次同你講咗，佢唔係我先生咯，我末結婚㗎，所以未有需要買樓。”
“而加無需要啫，可以買嚟投資，又有租收，樓價又會升，雙重收益！”
“我對樓宇認識唔多，又無錢買。”
“唔識唔緊要，我帶你去睇吓樓盤，慢慢向你介紹，而且單位有大有細，暫時資金唔係咁充裕，買個細細哋嘅，日後慢慢樓換樓。”
“不過，我真係無需要嘛！”
“唔緊要啦，你出嚟睇吓樓先，或者會遇到一個你未想過會咁喜歡嘅單位呢，到時我出盡力代你向業主爭取一個最筍嘅價錢。
上次我都同你哋爭取到減咗千幾蚊，呢個幾乎係無可能侙務，不過你咁靚女，又好人，我一定會做到你要求嘅，出嚟啦！”
呢個代理真係好落力，我太絕情嘅話，怕會挫佢鋭氣。
“咁你俾時間我考慮吓，我過兩個星期去旅行，返嚟先啦。”
我想拖延住佢。
“不如你去旅街前出嚟一次先，唔啱嘅，你返嚟再帶你睇過第二啲單位。”
佢知道我有一段時間唔喺度，仲更加著急。
“嗯⋯⋯”
佢迫到我唔知點應付。
“一於係咁啦，聽日幾點得吖？”
“嗯⋯⋯不如遲啲先啦”
“聽日啦，俾個機會我為你服務啦，7點？一於7點，你嚟我鋪頭，我等你！”
“咁⋯⋯”
“一於咁安排啦，聽日見！”
呢個代理好難應付，我唯有應承佢。
第二日忙咗一日，到放工時候，諗緊去唔去睇樓好，自己明明無咁既需要，如果唔去，又好似好無口齒，兼夾要人哋白等，橫掂個自白已經攪好晒，不妨行一趟，應酬個代理一次就算。
個代理真係帶咗我去睇三個唔同大細，唔同樓齡，唔同類型嘅單位，佢知道我無心買樓，所以無詳細講個價錢，只係略略提吓。
“細C小姐，不如坐低一陣同你介紹吓而加地產嘅行情吖。”
睇完晒之後，代理仲帶咗我去一個連鎖咖啡店。
佢簡單講吓佢對樓市點睇之後，跟住佢一直都係講吓啲時事呀，娛樂新聞，仲花咗好多時間同我講佢嘅背景喜好。
又問吓我有咩嗜好，喜歡啲咩活動呀咁，直情唔係代理同客人，而係兩個新相識嘅朋友咁。
好彩呢個代理口齒伶俐，說話好風趣，相比我反應就慢好多，成曰俾佢牽住走，俾佢引導到我回答咗好多佢想知嘅問題。
“上次呀，你呃得我好慘呀，我為咗同你哋爭取減租，同個業主講到牙血都出埋呀！”
個代理講番佢點代我同van仔講減租，個過程真係好艱難。
“哈哈，咁真係多謝你呀！”
“你個朋友真係要請我食餐飯呀，一張兩年租約，同佢慳咗三萬幾，不過我咁同佢講，一定俾佢用粗口鬧匀我全家，哈哈，都係追你請我容易好多！”
到我出發旅行中間兩星期，呢個代理每隔一兩日就俾電話我，話有好樓盤，約我去睇，耐不耐又追我代van仔請佢食餐飯。
喺充滿期待而又帶啲焦慮嘅兩三星期，個物業代理着我平淡生活加上咗少少點綴。