野性呼喚: 第一百零九章 ： 將心事寫出嚟

今朝我同佢都要返工，van仔車咗我番屋企換衫，佢喺車度等埋我，話要同我一齊食早餐。

"尋晚你無返屋企，唔怕Gigi起疑心？"

食早餐嗰時我突然醒起。

"我諗Gigi早已經知道我搵緊屋搬，佢識做，咋唔知啫，事關我同老闆娘講過我搵緊屋搬，尋日請假，我都有話俾佢知去新屋清潔。老闆娘同Gigi經常情報來往。"

"你老闆娘唔知我幫你手嘛？！"



唔怪得佢知我咁多嘢，我怕老闆娘知道我同van仔一齊去搵屋，雖然未同佢見過面，但對佢有好大恐懼，覺得佢隔空都睇得穿我個心咁。

"哈哈，你估佢係烏龜咩，樣樣都未卜先知咩！"

"係呀，過多兩星期，我會去一轉旅行。"

我預先通知。

"又去？你啱啱返嚟咋喎！"



van仔好失望咁。

"我一早plan好咗㗎喇。"

我唔想講咁多詳情俾佢知，橫掂佢唔知過去一年多，我同XX嘅事。

"我好懷念以前，你咩嘢，連你幾時M，我都知得一清二楚，而家你好多嘢我都唔知喇！"

van仔有啲埋怨，不過我係好對佢唔住嘅，過去我一直避開佢，到我真係寂寞到忍受唔到先搵佢，要佢陪我，好似係利用緊佢咁。



"喂呀，我一直當你係好朋友，好多嘢我淨係可以對你講，唔可以同其他人講，只可以俾你知，唔可以俾其他人知。"

喺內心，我就已經當咗van仔係我知己，好多嘢唔方便俾其他人知嘅，我唔怕同佢講，我失落嘅時候，我想得到佢嘅安慰，相信日後佢喺我心裏面嘅角色唔會改變，只係我哋再唔有親密接觸啫。

"我唔止要知道你唔想俾人知嘅嘢，我仲想要埋你個人，喺床上面，你一路同我講秘密，我一路屌你，哈哈。"

van仔傾前過身，細細聲咁同我講。

"你就想！"

明知佢係講笑，我唔介意，我相信只要我堅定自己嘅意志，就算日後佢點誘惑我，我都可以好似尋晚咁守護住自己。

"不過如果Gigi介意嘅，我哋儘量唔見面啦，有咩都可以喺what's app嗰度講嘅。"

Gigi最顧忌我同van仔走埋一齊，要佢安心，van仔最好就係唔同我見面。



...........................

距離放假嘅日子越嚟越近，我心情又興奮，又緊張，同時亦都戚戚然。

我好感激XX對我好坦白，佢向我講晒佢同Julie嘅事，但係我過去有好多嘢隱瞞住佢，呢個包袱好沉重，我想向佢交代，但係又怕佢唔接受，幾乎每一日我都喺度思量應該點做。

"每個人都有潛藏住野性，只係你有無辦法克服佢啫。"

有一次我同XX傾偈，佢重提同Julie重聚後嘅交往，係佢心魔作祟。

話題係我挑起嘅，佢講每個人暗黑嘅一面，我想趁機會向佢懺悔。

"我同意呀，以我嚟講，我都有好大野性，你想唔想聽呀？"



我好似一隻待宰嘅羔羊，耷低頭等佢回應。

"哈哈，你睇你幾可憐，你最可愛就係呢個表情。"

我咁講，以為XX會好驚愕，但係喺個mon睇到XX好開朗嘅笑容。

"唔係呀，我講真架。"

我想旅行前同佢懺悔咗先，無論佢接唔接受我都心理安樂啲。

"C，每一個人都有過去，你有，我有，無論你做錯啲咩，我都會原諒你，正如過去一年，我都做錯咗，你一樣包容我，係咪？"

XX見我眼裡面都係眼淚，佢安慰我。

"多謝你體諒我，我唔想咩住一個包袱同你相處。"



"嗯，既然係咁，你唔好口講，我想你親手寫晒你想講嘅嘢出嚟，好唔好？"

"點解要我手寫？咁辛苦！"

"哈哈，寫下嘢好辛苦咩，我要訓練吓你書寫能力，日後我再唔使同你改稿呀，哈哈。"

XX取笑我成日要佢幫我修改email。

"我都好耐無叫你改嘢啦！"

我無意間提起過去一年嘅分離。

"哈哈，咁日後你寫多啲嘢俾我修改補返數囉。"



...........................

同XX通完電話，我扐起支筆，但唔知從邊度開始好，澳洲嗰次吖，定係從認識van仔做開端？

個內容我又點寫好呢，簡略咁講我同勇哥或者van仔認識嘅經過，定係我同佢哋交往嘅詳情呢？

仲有我哋嘅性關係呢，應唔應該寫埋出嚟，要寫嘅話，又寫到幾深入呢？

寫得粗略，好似違背我嘅原意，寫得太過深入我怕傷害咗XX。

我坐喺度望住張紙，成個鐘頭，一個字都寫唔出。

我重溫返之前van仔嘅手記，尤其是同我有關嘅部份，回憶返一啲我當時嘅感受。