野性呼喚: 第一百零五章 ： 重新開始
“隻介指係我送俾佢，但唔係訂婚用嘅！”
XX再俾電話我嗰時，一開始就澄清最重要一點。
“C，你講過，要我同你做決定，我而加邀請你同我一齊去渡假，你唔可以拒絕，知道嘛！”
我擔心自己一對熊貓眼暴露喺佢面前，不過仍然撐得大大，眼淚不停咁流，但係開心到忍唔住笑，對住佢不停點頭，表示答應。
“點解會咁突然，你唔可以呃我！”
“C，我唔會呃你，過去一年係我令到你咁傷心，對唔住！”
“喺Julie face book上面，睇到你哋發展得好順利，我唔明點解會⋯⋯”
“C，我同Julie發展得唔係好似你想咁順利，我希望再同你重新開始亦都唔係好突然。"
XX同我講返同Julie一齊嘅經過。
"我一重遇番Julie，我哋都有啲興奮，嗰個星期六，我哋做完嘢，佢叫我一齊去吧坐吓，聚吓舊，我哋不停講番以前嘅舊事，大家好開心。
最初我哋只係因工作而見面，每次做完嘢，我哋都會一齊食飯，無論午飯或者晚飯，如果有時間就一齊去吧坐吓。
隨住相處漸多，我發覺我仲未放低佢，我哋開始約會，當時我好矛盾，因為我仲愛你。
Julie要求我復合，我抗拒唔到，可能我唔甘心當年我哋無緣無故咁分開，不過我仲係好喜歡你，我怕面對你，所以我逃避你，減少搵你，唔敢向你坦白，我心理壓力好大。
直至你約我食飯，碰啱佢喺外地番嚟，佢一到香港，就喺機場俾電話我。”
“我記得，當時我坐喺你旁邊，我估可能係佢。”
我同XX講當時我有直覺，知道係Julie。
“我本來只係覆電話俾佢，不過佢話掛住我，一定要見我，我就上咗佢屋企，明知你喺我度，但係我好似著咗魔，仍然掉低你。
嗰晚佢好熱情，除咗kiss，我哋上咗床⋯⋯”
我奇怪XX同我講過，我哋分開前，佢同Julie未發生過性關係，不過我無質疑佢。
“C，我哋kiss，愛撫，我好自私，當時我係想搵番以前同佢做嘅感受，但最後關頭，我就想起你，覺得我同Julie咁做，係對你唔住，最後一刻我無同佢做。
我覺得對你哋兩個都有虧欠，我覺得自己唔知想點。
你亦都喺嗰晚正式知道我同Julie嘅事。”
“其實我已經feel到，加上Julie好早喺佢face book 度暗示咗，嗰晚睇到佢寄俾你啲明信片，只係進一步證實啫。”
我打斷咗XX。
“我同佢第一次見面後，第二日佢喺face book就要求我add佢，可能佢要製造一個渠道俾消息我。”
我向XX補充。
“C，我明白Julie心理，佢佔有慾強，嗰晚佢知道你同埋我一齊，所以佢堅持要見我，佢同我上床，就係想留我喺佢度過夜，好可惜，我明知佢目的，仍然順從佢。
到我半夜堅持要走，佢第二朝都一早六點幾叫我返公司，佢只係要證明喺我心目中，佢比你重要，我會選擇佢。
但事實唔係咁，我思緒好混亂，我想趁去總公司做嘢呢幾個月，避開晒你哋兩個，靜靜咁想清楚自己想要咩。
頭嗰個幾月，我無搵過佢，反而我不時想起你，忍唔住都聯絡你，嗰時我好開心。”
我當然記得，佢話工作清閒咗，我仲替佢高興，點知好境不常啫。
“無幾耐，香港呢邊通知我，話有幾個重要嘅project，Julie間公司唔滿意接我手個同事嘅表現，要求我接番手。
Julie差唔多每兩個星期就過嚟一次同我工作會議，佢通常星期四、五到，跟住嚟緊嘅星期一走，佢話唔想住酒店，嚟咗我度住，我哋變相開始一齊生活。”
“所以你無聯絡我。”
我諗番起，都仲有啲傷感。
“C好對唔住，喎陣我只係想，唔可以一腳踏兩船，否則，我、你、Julie，都會受到傷害。”
“你選擇放棄我！”
我雖然自己都覺得Julie每一方面都比我強，認為XX應該選擇佢，但當事情發生，我唔單止呷醋，仲好悲創。
“Julie知道只要佢一齊，我就唔會聯絡你，不過點都好，我哋一齊生活咗半年，假期同佢四圍去玩，我唔覺得太興奮，夜晚同佢做愛，佢雖然好熱情，但係我總係無咗以前同佢靈慾相通嘅感覺，覺得只係肉體嘅發洩。
我懷念你嘅笑聲，懷念你無造作嘅嬌慵，懷念同你一齊嘅每一個細節。
我想同Julie講清楚，但係佢比我想像中聰明，佢搶先我一步，以後佢過嚟開會，再唔住喺我度，自己住酒店，只係間中約我去酒店。”
“點解你會買隻介指俾佢嘅？”
“有一次我哋去玩，佢問可唔可以送一份禮物俾佢，我以為佢想要一啲旅遊紀念品，呢啲當然無問題啦，不過兩日旅程中，佢一直都無再提過。
到旅程完結，返番去town，佢帶我去咗一間珠寶店，原來佢已經睇定咗一隻介指，我無得反口，就送咗隻介指俾佢囉。”
“哈哈，你可能誤導咗佢啦！”
我輕鬆同XX講。
而加XX同我表白咗，我無須再疑慮，心情同之前幾個月真係天壤之別。
“我無啦，我送俾佢之時，我仲同佢講，條頸鏈仲靚啦，只不過Julie話佢喜歡呢隻介指啫！
C，成件事係我自己定力唔夠，令到你受苦，我想同你重新開始，又怕你原諒我。
我決定做番一啲嘢向你表示我對你嘅誠意。”
“你做咗啲咩呀？”
經過呢一年，我唔再需要XX為我做啲咩，只要佢喺返我身邊，佢已經為我做咗最好嘅事情。
XX話啲嘢喺佢屋企，佢要保持秘密，遲啲我過到去佢嗰邊，佢先會俾我知係咩嚟嘅，佢知我成晚無瞓過，仲叫我放一日假，休息一吓。
但係我唔想臨時臨急放假，無人幫老闆一齊見客。
雖然帶著個黑眼圈返工，但係心情好輕鬆，只要有時間就偷偷哋send短訊俾XX，瑣瑣碎碎，乜都同佢講一餐。
呢一年，我經歷咗無XX喺身邊嘅失落，同佢同次接觸嘅喜悅，初戀甜蜜嘅感覺，原來只係XX可以俾到我，以前只係我自己唔知道滿足，又或者係我俾自己一個借口去放縱內心潛藏嘅野性。
..................................
我唔想XX無得休息，叫佢唔好心急俾電話我，同佢約定香港時間今晚大約十二點先大家通話，等XX可以休息一晚。
..................................
可能心情好，笑容都甜啲，見客嘅成績都唔錯，老闆成功招攬咗一啲新訂單。
老闆之前同我講，我放咗工之後返去做嘢，要預先通知佢，橫掂我要等XX電話，我同老闆講會返公司整理埋啲文件。
到九點幾，我準備離開公司，竟然收到van仔電話，自從上次喺海濱公園見面，之後再未見過佢。
我好奇怪，近兩次佢搵我，佢都係心情唔好，今次佢心情比上次同公司同事打交，嚟得仲要失落。
“Gigi？”
喺間快餐店一坐低，我就問佢。
“哈哈，唔係，不過有啲攰啫！”
我問佢幾次，van仔都否認。
令我替佢擔心，因為佢嘅神情係遇上好大挫折，對佢嚟講，似乎事情好難解決。
我勸佢開心見誠講發生咗咩事，佢都係苦笑一吓，無積極回應我，我只好再一次同佢講，我係佢好朋友，佢有咩唔開心，我都可以同佢一齊分擔。
但係佢眼神對我有啲怨言，佢要話俾我知，佢有咩不幸嘅事，我先會同情佢、可憐佢。
佢想同我保持返以前嘅關係，尤其是佢同Gigi去日本旅行嗰時，我依賴佢，癡纏佢嘅關係。
佢望住個餐牌呆咗，快餐店選擇本身已經唔多，加上咁夜，有啲食品已經賣清光，但係van仔仲未決定到食乜，同佢習慣完全唔同。
最後佢都話無乜胃口，提議淨係叫一份餐一齊share，不過我唔想俾佢無謂嘅遐想，我藉口話由下晝到而家都未食過嘢，好肚餓，驚一份餐唔夠兩個人食而拒絕咗。
碟上面剩番一大半食物，佢望住我冷笑一吓，令我覺得好內疚，過去一直利用佢嚟填補自己嘅寂寞空虛。
好彩佢始終無責怪我，我陪住佢傾偈，睇到佢心情漸漸輕鬆番少少。
我哋傾到十點幾，成間快餐店啲客都走晒，佢哋準備刪門。
"走啦！"
我補番好唇膏，扐起手袋，望吓佢。
出到快餐店，啱啱好Uber到咗。
我正準備上車，點知van仔佢想跟住上埋嚟。
佢可能誤會咗我嘅眼神，以為我想佢陪我。
我即刻同佢講拜拜，等佢知道我無咁嘅意思。