野性呼喚: 第九十六章 ： Gigi知道咗
Van仔嘅手記係滯後幾個月，即係佢今日寫幾個月前發生嘅事，所以有啲事情出現喺佢手記嗰時，已經事過境遷。
有啲事當時van仔無即時同我講，我就無從知悉，要幾個月後，睇到佢手記先知道。
我唔知，唔代表我無責仼，唔代表我值得原諒。
Gigi唔喜歡我，van仔老閶娘喺背後鬧我，叫我一啲好難聽嘅名稱呼，我無怪佢哋。
Julie同XX復合，我唔開心，我同van仔走埋一齊，Gigi唔高興，係好合情合理，老闆娘身為Gigi契媽，佢企喺Gigi嗰一邊，用難聽嘅說話鬧我，我唯有忍受。
我而加好似俾所有人遺棄，俾所有人指責，除咗van仔一個。
我無得埋怨，要埋怨只怨自己所做嘅一切，離經叛道嘅一切。
⋯⋯⋯⋯
去到旅程最後兩日，Gigi一改佢喺呢個旅程嘅常態，唔再見嘢就買，van仔認為佢無晒心機，只係用晒帶喺身嘅日元，所以佢完全無為意Gigi神情嘅變化。
我同van仔協議好，佢無需要買手信俾我。
第一，如果佢買啲糖果、餅乾呢類嘢，無乜意思，倒不如唔好買。
第二，如果想買一啲特別嘅嘢，van仔未必有咁嘅心思，就算有咁嘅心思，佢要買嘅話，一定瞞唔過Gigi，無謂俾Gigi知道佢送手信俾我吖。。
⋯⋯⋯⋯
Van仔哋仲有一日先返，uncle同auntie就過多一日出發。
我上佢哋屋企接狗狗，佢哋兩個老人家見我同XX分開咗，對我好似客人咁，非常客氣，我替佢哋照顧狗狗，佢哋就千多謝，萬唔該。
“其實呢啲嘢應該Julie做嘅！”
“唓，佢肯咩！”
Auntie一講，uncle即刻一臉不屑。
“佢話分就分，攪到阿仔幾痛苦，你仲記唔記得？而加話要復合就復合？！”
Uncle唔忿氣咁講。
“唉，年輕人嘅嘢，佢哋自己決定啦。”
auntie眼尾望吓我，暗示uncle喺我面前唔好再討論Julie。
我乘機打聽吓XX近況，同埋點解要拆咗個拼圖，當做义開話題。
"唔知佢點處理呀，我哋淨係寄返俾佢，早一輪，佢一放工返嚟，飯都未食，涼又唔沖，就砌呢個拼圖，而家又話拆咗佢，之前佢咁辛苦為乜。"
auntie喺度呻，佢唔知呢個拼圖背後嘅故事，但係我聽佢咁講，我心好酸。
......................................
我帶咗狗狗返屋企，過咗一日，XX俾電話我，嗰次我發脾氣，之後佢無再用message聯絡我，每次都係用電話，佢話message太冷，佢想親身同我講，聽住我把聲音，先可以感受到我情緒嘅變化。
"我前日帶咗狗狗返屋企，uncle同auntie精神都好好。"
"呀～～係喎，佢哋去旅行喎，我好耐無搵佢哋，狗狗乖唔乖？"
我以為係uncle或者auntie叫佢俾電話我，原來唔係。
我講返呢兩日狗狗啲百厭又可愛啲嘅事情俾佢知。
"狗狗見到你最開心！"
我同XX打開咗話閘，佢話而家Julie公司減少咗要佢跟進嘅project，以而家工作量，佢應付得綽綽有餘。
呢個係理所當然，Julie指定要XX跟進香港project，目的只係keep住同XX有接觸，佢目的達成後，一定要俾返啲時間XX空閒落嚟，先可以陪佢。
相比之前，XX而加算得做多咗俾電話我，而且我哋傾計時間亦都長咗。
...........................
van仔旅行完第二朝就即刻要返工。
老闆死咗之後，van仔每隔個零月就會同老闆娘食一餐飯，同佢傾吓。
今次旅行買手信，無準備到老闆娘嗰份，van仔諗住因利乘便，請佢食餐飯補數。
點知老闆娘約咗朋友打麻雀，推咗van仔，約佢第二晚。
.............................
“咩呀，死仔包，想同我兩個人撐枱腳？Gigi呢？”
第二晚，van仔唔加班，喺酒樓開定位，老闆娘亦都準時到達。
呢幾日，Gigi都忙於派手信，同van仔分道揚鑣。
“哈哈，honey，你咁撚醒嘅，食完飯諗住同你去爆房嘛！”
van仔唔理咩嘢人，年紀大定細，佢習慣攞吓人便宜，老闆娘都唔例外。
佢哋成餐飯都係風花雪月，飲完紅酒，兩個人都有少少酒意。
“近來同Gigi相處成點呀？”
“條女係咩料？”
老闆娘先發制人，單刀直入問van仔。
“咩女？honey你講乜春呀，哈哈。”
van仔咋唔知佢講乜。
“我開晒口，你扮咩嘢吖，大家攤開肚皮吧啦！我收到風㗎。”
原來老闆娘已經知道好多有關我嘅資料，尤其是佢提到我有男朋友，我更加慚愧。
“我聽幾個見過條女嘅叔父講，條女樣貌同身材係幾好，不過未必好得過Gigi吖，最重要係條女就嚟嫁添啦。”
“死仔包，今次旅行，你屌咗Gigi幾晚，屌到攰就好好哋休息吓啦，仲同條女搞咁多嘢做咩吖！”
佢竟然知道埋我同van仔嗰晚做過啲乜嘢。
“尋晚妳唔係開枱，係同Gigi食飯？”
“死仔包，唔係尋晚定係聽晚嘅問題，你honey我都後生過，知道女人有咩感受。”
老闆娘搭住van仔手背，好親切同佢講。
“Gigi同你一齊之時知你咩底，你喺出邊沙沙滾，溝吓女，佢知你係玩玩吓，就隻眼開隻眼閉......”
“喂，honey，我而家無搵班女好耐啦！女都唔溝，乖乖哋打工還債，班豬朋狗友個個都笑鳩我，話我做撚咗住家男人，咁仲想點呀！”
“但係嗰條女呢？你一路都斬唔斷，Gigi就係最唔鍾意你同呢條女有關係！”
雖然我幾個月後先睇到呢篇手記，但當我睇到老闆娘咁講，我心好唔舒服，我破壞咗van仔同Gigi嘅關係，覺得好歉疚。
“死仔包，你咪以為Gigi一定要黐硬你，佢日日企喺櫃台，好多狗公想圍佢，你再係咁唔嗲唔吊，遲早佢俾人溝咗去！”
“我知而家有狗公圍緊佢吖，一日男未婚，女未嫁，佢有自由揀喎！”
“死仔包，真係想唔講粗口屌你都唔得！你咪死鴨一隻，得把口硬啦！”
老闆娘激動起上嚟，拍落van仔手背。
“Gigi同你一齊咁耐，我點都唔信你一啲都唔喜歡佢，你咪睇佢又煙又酒，老闆娘食鹽多過你食米，知道佢係一等一好女仔，娶得過㗎！”
“女人青春唔係好多，如果Gigi唔再等你，最開心會係邊個？係想溝佢嗰幾個狗公，同埋佢阿媽，你知佢阿媽想點喇！”
“幾條狗公咁撚多？”
van仔一直以為只係有一兩個客人追求Gigi，點知聽老闆娘提醒，竟然有幾個男客人對Gigi有意思，超乎van仔想像。
“唔係你估，Gigi波大，樣甜，又精乖伶俐，你信佢無俾狗公圍，你都傻仔啦！”
“咁佢有無......？”
van仔憂慮。
“哈哈，驚咩？”
老闆娘明白van在憂慮乜嘢。
“驚嘅咪一陣返去問吓佢囉！”
“屌，咪鳩玩啦，honey，唔通話：喂，俾班狗公屌咗未？”
“死仔包，Gigi俾人食咗又點，未食又點，係咪俾人食咗，你就飛咗人哋吖？如果你係咁諗，你就唔好再叫我做honey，唔好再叫我做老闆娘！”
“我無咁諗！”
van仔垂頭喪氣。
“老實話俾你聽，Gigi尋晚第一時間搵我食飯，佢同我講，佢同呢幾條狗公交往，係諗住做多啲生意，佢哋雖然迫得Gigi好緊，同佢哋食飯都係應酬吓。不過，嗰晚知道你同嗰 條女咁樣，佢真係想喺幾條狗公裡面，揀個啱心水嘅發展落去。”
老板娘一路講，van仔先明白喺旅行最後一兩日，Gigi會無晒心機嘅真正原因，佢嚇到手心出汗。