電影少女 (2): 淫眼碌碌逐個郁 (5)

淫眼碌碌逐個郁 (5)
~~~~~~~~~~~~



王智琛見到Percy又面紅，笑笑口講：「係呀，我有....」特登拖長個有字，之後講：「帶到本書嚟呀。」隨即揸住本數學書出嚟，Percy見佢咁識隨機應變，不期然嘴角泛起微笑。

「咁坐低我教你。」Percy招呼王智琛坐低，跟住講：「你有咩唔明？？」

王智琛指一指條全等三角形題目，講：「就係哩條唔明。」



「哩個方程式係…」Percy好專心指導，Ng sir都唔勉強佢去食飯，所以同其他教師出去。望見一個二個走哂，Percy鬆咗口氣。王智琛見佢唔想同Ng sir食飯，就講：「妳唔想同Ng sir食飯？」

「吓？？」Percy無諗到王智琛會咁樣問，一時間反應唔嚟，dead air一陣之後講：「唔係，只不過又唔熟無乜嘢講，咪唔想去食囉。」

「咁妳响哩間學校教得果二日書，同佢哋一定唔熟喇。」

「係啫，但係…」Percy未講完個肚又投訴，肚餓聲響起兩個對望一眼，大家笑咗出嚟。

「Miss妳肚餓喇，去食飯喇。」



「唔得，你有嘢唔明我要教你吖嘛！」Percy講：「點可以去食飯唔理你！」

一講到教學Percy就理直氣壯，好認真咁唔肯走去食飯。王智琛講：「既然係咁我哋落樓下小食部，一邊食麵一邊教我。」

「咁都好，我哋行喇。」Percy答應王智琛提議，兩個落咗去小食部食麵。由Percy嚟教書第一日開始已經做咗鋒頭躉，似model多過似miss嘅佢全校都講緊，受注目程度蓋過校花。而家佢响小食部同男學生一齊食麵當然惹起打量。

雖然身邊啲學生望住哂，不過Percy好認真教學無為意到。好快鐘聲又響起，lunch教學亦終止。Percy講：「你明唔明？」

「妳教得咁好，無可能唔明喇…」王智琛講：「呀，唔係，我仲有啲唔明。」



「仲有唔明？不過要上堂喇，下次再教你好唔好？」

「好，咁下一次喇。」

答應下次教學，兩個都要去上堂。起身時Percy個公事包跌咗本簿出嚟，王智琛好自然幫佢執番。攞起本簿一睇上面有佢個名，王智琛講：「妳叫Percy？」

「係…係呀…」聽住學生叫自己個名，Percy又面紅。

「我叫Jay。」

「唔…」Percy點點頭唔識答，擰轉身行去課室。Percy有住極度出衆美貌身型，但係又成日怕怕醜醜，Jay覺得佢好得意、好吸引…

係一個正宗GFABLE----Girlfriend-able！！



自從果次Lunch time授課之後，Jay日日都相同時間去搵Percy落小食部授課，個個學生經過見到靚爆鏡Miss同男學生食Lunch，就算Percy點樣專心教學都發覺到其他學生疑惑眼光，一連串質疑目光又令佢不安。

「不如我哋响教員室補習喇。」Percy建議。

「點解去教員室？？」Jay問。

「啲同學…」俾Jay咁問，Percy面紅紅答唔出。Jay以會到佢想講咩，就講：「駛乜理人哋點講吖，我哋兩個咁樣去教員室咪仲多閒話。」

「咁…咁點好？」

「放咗學我哋去搵個地方補習囉。」Jay講：「避開佢哋唔駛煩。」

「都係一個好辦法。」Percy點點頭講：「咁改為放學補課。」

「好，一言為定。」



由Lunch改為放學，放學鐘一響Jay就行出去學校門口。出咗去一陣Percy就行出嚟，見到佢咁心急Jay覺得好開心，心諗Percy都好想同佢去補課拍拖。

雖然Percy一放學就即刻行出去，但係佢唔係心急想見Jay，而係唔想逗留响學校，唔想同其他教師接觸。

急急腳出去見到Jay企咗响度，就揮揮手講：「你咁早到咗？」

「約咗妳點可以遲呀。」Jay用佢健康笑容講，Percy聽到不期然嘴角泛起微笑。學生話約咗miss，miss就甜絲絲微笑，在旁學生睇到眼都突！！

「佢哋拍拖？？」

「靚女miss咁快就俾人媾咗？？」

「嘩！！」



因為啱啱放學所以只得幾個學生，但係佢哋嘅反應好大，嚇到Percy耍手擰頭否認：「唔係呀…我哋去補課咋…」

雖然Percy解釋，但係啲學生仍然露出不信任眼神。果種眼神令到Percy驚到震，Jay見到咁就一手拖住Percy走。

忽然俾佢拖住，Percy心情仍然未平復，仍然驚到手震垂低頭唔敢望。Jay發現Percy咁驚，同佢講：「唔駛驚，有咩事我會保護妳。」


（待續）