電影少女 (2): 淫眼碌碌逐個郁 (3)

淫眼碌碌逐個郁 (3)
~~~~~~~~~~~~




「好，睇吓小說先！」Percy响手袋入面攞出本小說<二十四個比利>，攞上手就全神貫注閱讀。
 
佢睇本小說睇到津津有味，無為意到其他教師食完飯返咗嚟。Ng Sir見佢睇到進入忘我狀態，就行埋去睇吓佢睇緊啲乜。
 


「二十四個比利？本書好好睇？？」Ng Sir突然開聲問，Percy先知道佢哋返咗嚟，即刻將本小說放响背後。果種反應就好似俾老師捉到學生帶漫畫返學校咁，驚到要走鬼！！
 
異常反應又令到Ng Sir覺得奇怪，瞪大雙眼望住Percy唔知佢做乜咁驚。哩個時候女教師入埋嚟，見到佢哋兩個對待緊，就問：「你哋兩個做乜呀？」
 
女教學出聲再次驚醒Percy，佢講咗聲無嘢就攞埋手袋急急腳行出去。Ng Sir完全唔知Percy反應點解咁奇怪，問：「Miss Chung，Percy好似怪怪哋咁嘅？？」
 
「怪？」Miss Chung講：「有咩怪呀？？」
 
「佢好似慌失失，又唔想同我講嘢咁？？」
 


聽到Ng Sir咁講，Miss Chung陰陰笑講：「你咸咸濕濕，人哋驚咗你呀！」
 
「我咸咸濕濕？？」俾Miss Chung笑佢咸濕，即刻反抗：「無呀，我無咸濕佢呀！！」
 
「人少少咪認咗佢囉...」Miss Chung一路行一路笑佢：「好彩其他呀Sir未返，如果唔係瘀死你呀！」
 
「無呀，我無呀...」
 
Ng Sir係咁同Miss Chung澄清，而哩一刻Percy行到去下一層，擰轉頭見唔到佢哋兩個，舒一口氣平靜番。
 


「吁，好彩啫...」Percy拍拍心口震定情緒，稍為平覆果時擰番轉頭，前面竟然近距離企咗一個人！！
 
霎時間有個人企近，Percy唔覺意一頭撞咗埋去；佢額頭撞向前面果個人，下意識捽捽額頭。
 
「痛。」Percy呼痛後，見到佢前面果個人掩住個鼻，好明顯頭先額頭撞鼻。唔小心撞傷人，Percy好緊張咁講：「唔好意思，我無心嫁..」
 
伸隻手想幫對方止痛時，發現俾佢撞傷嘅係佢學生...
 
眼神充滿殺傷力嘅學生---王智琛！！
 
係佢？？
 
我撞到佢？？
 
撞到嘅係佢，令Percy心神又忐忑不安！！


 
「王智琛，你有無事呀？？」
 
「無事，流少少血啫。」王智琛抹抹個鼻，成隻手沾有血跡。
 
「唔係喎，你流緊血喎！！」Percy好緊張，講：「同你去醫療室止血先喇。」
 
「好。」王智琛再抹抹血，Percy就攞張紙巾掩住佢個鼻，講：「你知唔知醫療室响邊？」
 
「我知，我帶妳去。」王智琛向前行，Percy貼住佢個身幫佢掩鼻，發覺自己痴實佢行怕醜到塊面紅哂...
 
Percy好怕醜，停咗响度唔敢行。佢突然停步王智琛就講：「做咩唔行呀？？」
 
「我...我...」Percy望到佢果一雙眼，又怕醜到垂低頭唔敢直望。見佢怕怕醜醜神態，王智琛笑一笑之後講：「我自己去得喇。」
 


「你自己去？」Percy抬高頭望住佢講，王智琛回答：「係呀，咁少事自己去ok喇。」
 
揮揮手向前行咗幾步，擰轉頭講：「妳怕醜個樣好cute喎，哈哈！！」
 
我怕醜個樣好cute？？
 
佢讚我Cute？？
 
响學校讚Miss cute咁都得？？
 
佢頭先企响我後面咁近，係專登嘅？？
 
Percy俾學生讚美，自然塊面更加紅上加紅。王智琛見佢塊面紅過紅雞蛋，就笑笑口行開，俾Percy自己一個响度怕醜...
 
望住佢前行背影，Percy心大心細、難以平服咁企咗响度。企咗一陣就諗起佢係學生、自己係教師，頭先撞到佢只係一時巧合大意，唔應該諗得太多嘅....


 
諗多咗，諗多咗...
 
Percy自我解說下，就係第一日返學發生嘅事。


（待續）