電影少女 (2): 淫眼碌碌逐個郁 (2)
淫眼碌碌逐個郁 (2)
~~~~~~~~~~~~
佢嘅眼神完全無色迷迷，反而係充滿自信、有種攝人神魄。佢望住Percy，霎時間令Percy心跳加速，窒到停哂口唔敢向佢直望。目光放低啲，望到佢靚仔樣貌，陽光膚色面龐。佢嘴角上翹露出微笑，哩個微笑更加令Percy心跳加劇...
唔敢望佢微笑，視線抬高又望到佢雙眼，哩雙眼睛再一次攝動Percy...
Percy望住佢，不期然成個發呆；望住佢，揸住手中學生名單定咗鏡唔識郁...
佢...
佢點解...
Percy失去反應，只可以內心發出疑問。Model Miss忽然成個定哂格，搞到學生覺得好奇怪，問：「Miss，妳做咩呀？？」
我做咩？？
學生一問就將Percy靈魂召回，佢慌失失咁望住學生名單講：「無.. 無...」
「我只係... 記吓同學個名...」Percy講：「類如...王智琛..」
Percy望見名單上其中一個名叫王智琛，就讀出個名再抬高頭。抬高頭時又望到果雙攝人眼神，一經接觸又怕醜到垂低頭唔敢望。哩個時候果個男學生講：「Miss Chan，妳第一個就叫我個名。」
叫你個名？？
你叫王智琛？？
聽到佢咁講，Percy即刻抬返起頭望佢。王智琛仍然運用佢攝人眼神，但係今次Percy無即刻縮，而係俾佢再次攝動、再次定鏡縮唔到...
一陣之後，王智琛講：「靚女Miss咁睇得起我，係我嘅榮幸。」
靚女Miss睇得起你...
係你榮幸？？
王智琛突然咁講，將Percy 9秒9回歸垂頭怕醜。手滕腳震咁將學生名單放入教科書中，口震震講：「我......個個...同學..」
Percy實在太驚，除咗講嘢口齒不清之外仲將啲教科書推跌哂落地。
「哎喲！！」Percy望見啲書跌哂，驚呼一聲就踎低執書。當執果時有另一雙手幫佢執，好自然望一望係邊個幫手。幫佢嘅，就係王智琛。
王智琛執咗本書交俾Percy，Percy唔敢望佢只係講句唔該，就企返起身同其他學生講：「我會慢慢認住各位同學個名...」擰轉身攞起粉筆响黑板寫字，講：「而家開始上堂。」
「淨係記住王智琛個名！」
「偏心！！」
男學生不滿Percy只係叫過王智琛個名，無叫其他學生名，紛紛不滿佢偏心。學生們起哄，嚇到Percy粉筆都跌埋！！再擰返轉身解釋：「我唔係偏心，只係咁多學生一時間記唔到咁多。」
「我會盡快...」未講完就有人幫佢執返枝粉筆，Percy接過粉筆之後講唔該。講完時望望執粉筆嘅係邊個，點知又係王智琛！！
佢一次又一次幫自己執嘢，一次又一次用佢攝人眼神攻擊，Percy實在唔敢再望，即刻將目光迴避。望返同學們，學生講：「跌嘢好少事啫，唔駛怕醜喎！」
「吓？？」我怕醜？？
「Miss紅都面哂，唔駛唔認喎！」
我紅都面哂？？
咁醜怪？？
學生們齊齊大笑，尷尬到Percy想搵窿捐。
跌嘢所以面紅？？
佢心知肚明點解面紅。
學生們笑咗一陣，王智琛講：「好喇，唔好笑Miss Chan喇。」
「靚女，佢哋無惡意嘅，唔好介意。」王智琛微笑講。
「唔..唔會..」
王智琛代同學們道歉，Percy禮貌上無可能唔望佢。就係哩個對望，更加將Percy心神奪去，就連佢當衆稱呼自己做靚女都無詐形，又或者係聽唔入耳…
因為佢俾王智琛迷住咗！！
迷咗一輪始終要教書，Percy將課本上內容向學生授課。講完一節望向學生，佢個個都望就係避開王智琛唔望，唔想同佢有眼神交流。但係就算佢點樣避，間唔中都會望到佢。佢始終流露住自信動人眼神笑容，難以抗拒嘅笑容唯有一望就閃，將殺傷力盡量減低。
响不斷逃避王智琛眼神，好唔容易到咗落堂。鐘聲一響Percy講咗句下堂再講就走咗，果種心急程度比起學生趕放學更加嚴重，佢行為俾人感覺奇異！！
Percy急步返去教員室，途中將課本緊緊夾响心口去振定心神。
做乜呀我...
我驚乜呀？？
靚仔啫，我未見過咩？？
佢細我咁多，我驚乜呀？？
佢係學生我係Miss，俾佢搞到我面紅咁醜，傻咗咩？？
何況佢...
Percy回想頭先情形，回想王智琛靚仔外貌再令佢心神不安。返到教員室整理枱面，因為今日只有一堂所以好多時間準備教學功具。搞哩樣搞果樣，好快將頭先不安心情放低，變返一個教師心態。
「Miss Chan夠鐘食飯喇，一齊食吖？」當Percy專心整理教材時，有另一男聲出現。講嘢果個係Ng sir，一個中年教師。Percy望望佢，再望望鐘見到12點半，食飯時間開始。
「原來到咗中午喇。」Percy伸伸懶腰，見到Ng sir企响佢前面等待答覆。Percy講：「我唔肚餓，仲有好多嘢要做唔去喇，我哋下次去食吖。」
「唔食飯？」Ng sir聽到Percy唔食午飯，懷疑之時旁邊嘅女教師講：「Percy咁瘦，佢怕肥唔敢食午餐喇。」
「係...」Percy怕怕醜醜講：「唔係...」
「又係又唔係？？」Ng sir唔明？？
「算喇Ng sir。」女教師講：「我哋快啲行喇，陳仔搵咗位喇。」
「咁我哋行囉。」Ng sir同果個教師一路講一路行咗出去，Percy望見成個教員室無人就鬆一口氣，俟低椅背伸長雙手雙腳抖氣。
「爽哂！！」Percy對於教員室入面無人，只有佢自己一個感覺到好舒服，完全無壓力咁可以舒緩情緒。
（待續）