《雖然枝奶變壞但沒關係》: 第一集-時機未成熟
閱讀文章前不妨洗洗手，保持個人衛生。
-
Everybody one two three four 啊！共的迫奶 season 2 再出發！上次共的迫奶負評如潮，激發Rachel撰寫本篇《雖然枝奶變壞但沒關係》。放心！篇文絕對可以出街，唔驚！
-
吳彤喺天后一間超級市場擔任奶奶公司品牌推銷員，近日公司推出一款新產品-「靜香哈蜜瓜奶」。「靜香哈蜜瓜奶」採用靜香縣新鮮哈蜜瓜果粒匯合西海道6.2牛奶，呈現口感層次豐富嘅感覺。疫情持續下，唔少顧客飲過都一致好評，「當去咗日本」咁話。
-
「靜香哈蜜瓜奶」睇落好有營養，膳食纖維同維他命C，唔似呢篇嘢咁冇營養。香港如此，腐敗嘅制度下養成唔少社會垃圾。「我揸603㗎」，話知你係特首，搭交通工具就要戴上口罩。
-
言歸正傳。一個師奶（下稱：娥）自從疫情爆發唔肯戴口罩，「我唔想束縛自己」、「出街戴住口罩好焗」成為佢面對傳媒訪問、街坊勸告嘅藉口。「我冇病使乜戴罩啊」，子女束手無策，指其有「反社會人格」亦被其放棄。
-
「奶好飲奶好飲。」娥嚮往無拘無束嘅生活，彷彿到訪一人之境。此話何解？路上行人見佢唔戴口罩彈開九仗遠，娥就覺得自己備受注目，啲人行過都讓條路俾佢，天后女皇登基！
-
夏日熱辣辣，吃西瓜消暑解渴。娥去超級市場途中經過鮮果店。「你唔戴口罩我唔做你生意啊，過主啦！」老闆做得好。「你等我啊，時機成熟我一定會告你㗎！」時機成熟？等到2047痾出嚟啲西瓜汁都重生咗啦，中咗肺炎驚娥你入咗棺喎。
-
西瓜汁老闆請娥「食檸檬」，倍添娥嘅「2020唔戴口罩主義思想」。即使室內強制戴口罩，仍無阻娥唔戴口罩嘅熱情，娥有娥嘅「道理」，關到而家都未封啦係咪先。
-
吳彤作為顧客嘅公僕，盡量滿足顧客嘅要求。
-
「靜香哈蜜瓜奶」銷量極佳，更有媽媽club見吳彤有禮嘅服務態度買多幾枝。睇開韓劇又好，膠劇又好，都知娥會喺呢刻殺到。
-
反社會人格嘅娥去到counter。
-
娥：「聽講啲奶好好飲喎，啊，俾半打我返去餵狗*！我仲要試飲！」
-
吳彤：「小姐唔好意思，麻煩戴上口罩，為人為己保持衛生。」
-
娥：「你而家係咪唔做我生意啊！我話晒係天后鯖魚喎！鯖魚係『青春嘅餘溫』啊！」
-
吳彤：「幫緊你幫緊你......麻煩小姐試飲前都要戴返個口罩，我驚你有飛沫令飲品受污染。大家都想健康啫，麻煩合作。」
-
娥：「你個毒婆子！即係話我有病喇喎！吳彤下話？我有大把錢，你係咪唔做我生意啊家陣！」
-
由於娥太大聲，成為超級市場嘅焦點。「戴返個口罩咪俾你試囉，咁多齮齕。」師奶買餸搭嗲乃屬正常現象。
-
娥：「收嗲啦八婆！你擺啲奶喺度都變壞㗎啦！戴返個口罩又點啫 ？你班嘢喺度話我，你哋真係咁憎我咩？」
-
「係。」
異口同聲嘅師奶+細細聲講嘅吳彤。
-
經理：「小姐，咦你冇戴口罩喎，係咪唔記得咗戴啊？我俾個你吖。」
-
原本食咗陳年中草藥嘅娥收返盆火，皆因見到個經理立即成為「觀賞外貌協會」員佐級會員......經理嘅外貌可以思考你認為最靚仔嘅韓仔。
-
吳彤sell嘅「靜香哈蜜瓜奶」轉眼間售罄，面對娥同埋經理出聲.......
-
下集見。你隻娥正一_ _。
-
註¹*娥並沒有飼養任何寵物。
-
（待續 To be continued）
IG：chingchingstory