我破咗個文青處，但佢唔肯同我一齊。//《偏偏喜歡你》: 生日快樂（二）
這時，貓貓朝他們「喵」了兩聲，他們速速回家。
翌日，阿樂起床梳洗，經過青青的房間，已見她完成更衣。
她穿白色T-shirt，右胸位置上有個小小的女孩刺繡，下襯一條高腰棗紅色短裙。
他一邊刷牙，一邊靠着房門，含糊地說：
「今日好得喎。」
「我夠唔夠瘦？會唔會有啲肥？」青青轉頭看阿樂。
「瘦。」
他打量一下她，如此說，但其實又不是算得上很瘦。她老是嘀咕自己胖，原因是因為她的手腳骨架很細，但又整體不算很幼，腰卻莫名其妙地很纖細。他總是煩她說自己不夠好看，這一點而言，他又不自覺地發現自己更喜歡Tanya，因為她有絕對的自信去欣賞自己。
無論如何，這一身都很好看、很修身、白色和紅色也很襯青青。
「搞咩啊你？」
他去吐掉牙膏、漱口，問她何解晨早流流就換定衣服，但其實不需那麼早就出門。
「我驚唔好睇吖嘛，早啲起床敷塊mask先。」
她凑近鏡子，仔細打量自己的眉毛是否整齊；他洗面後，用毛巾擦臉，不解地問：
「咁緊張做咩？你見friend咋嘛——哦。」
阿樂知道，那是因為青青約了Matt。阿樂忽然感到不好受；最恨的是，他竟然理解她的想法，怎樣都要好好睇睇、體體面面地去，那日他與Tanya表白，也像出席一場限定的婚禮一樣。
青青知道阿樂的「哦」是知道了原因，不多解釋：「咁靚啲都應該嘅，呢牌咁頹。」
「得啦得啦，好靚啦。」
他覺得，如果她的黑眼圈再淡一點會更好；昨日他們夜歸，她又晨早起床。
「等間化埋妝先。」
她脫下眼鏡，正準備行開，聽見他說：
「吓，原來你會化妝？」
即使一屋簷下，他也只見過她每日一張素臉，這代表什麼？太信任他嗎？
「會。有時會化，唔化有啲殘，前排曬得太多太陽啦，又唔夠瞓——宜家敷先。」
然後，她越過他去了雪櫃拿出一塊保濕mask，再敷上。
阿樂故意逗青青笑，她的笑點忽然提高，只張着不動的嘴說：
「2/10。」
很快，就見她洗掉精華液，坐在平時她用來當書桌的梳妝枱前，拿出了一樽兩樽的化妝品；他坐在床上，看着鏡子裏的她。
「咪睇啦，女人化緊妝嗰時好醜樣。」
「醜得過乜都唔搽咩？唔怕啦。」
她沒有再管他，開始塗上防曬、粉底，搽睫毛液、唇膏，之後拍些乾粉定妝。
「吓，咁就化完啦？你冇用過呢盒嘢喎。」
他期待的是臉上好多顏色、整個人大變身的那種。
「唔啦，佢以前鍾意我嗰時，我乜嘢都冇化㗎……宜家搽啲嘢都係想好睇啲咋嘛，講真，就算我化得再濃呀，都冇用㗎啦。何況我已經白咗又精神咗，夠啦。」
她低頭執拾枱面，訕笑。
「點解呢？可能有用呢？」
「你係男人，你應該了解男人㗎啦，點會區區憑一次靚過平時就回心轉意先？」
Tanya也說過這樣的話。真殘忍，她們竟然抱着這一種明白的態度去打扮自己、再與不愛自己的人見面。阿樂只好應：
「哦……咁咪仲好，放過自己吖嘛。」他心想，最好如此。
她背對他，穿上船袜：
「係。OK嘛我宜家個look？」
「好得。」
這時，住在同一屋苑的Tim少上了阿樂的家，不斷按門鈴：
「喂，開門俾我呀。」
Tim少一進門，就看見阿樂身後的青青，狡猾地道：
「搞咩啊你，玩金屋藏嬌？唔係之前嗰個喎？」
阿樂對着Tim少反了一個白眼，然後介紹二人：「佢就係Tim少；呢個係青青。你嚟做咩呀？」
青青點點頭，Tim少的眼神不斷徘徊在對面的兩個人，再看着阿樂奸笑：
「你約咗我上嚟打機喎？」
「幾時有？」阿樂錯愕。
「今朝我心血來潮想約你，冥想中你已經應承咗，冇得反口。」
青青笑，心想阿樂和Tim少的性格應該很不同，但據她所知，他們由小學開始已經是好朋友。
「我走先啦，唔阻你哋，」她入房拿袋，然後出來一邊穿鞋、一邊看向阿樂：「今晚見啦。」
「Wow！今晚仲會見！」
Tim少馬上興奮。
「咪嚇親人啦，佢呢排喺度住住先咋。」
阿樂向青青揮手，又替她關上門，用眼神示意她不用理會Tim少。
「啫係喺度同你瞓啦！條女你媾掂啦？叻仔喎！」
「瞓你老母，我哋friend嚟㗎咋。」
阿樂見Tim少如此雀躍，所以向他舉了隻中指；Tim少饒有意味地說：
「收皮啦，你鍾意人喎。」
「邊有？」阿樂下意識否認。
「冇？咁我媾㗎啦，真係冇？樂哥哥，咪瞞我啦。」
Tim少摟着阿樂的肩；不過其實也沒什麼能瞞對方，阿樂嫌棄地說：
「死開啲啦，咁，係有啲嘅。」
「都一齊瞓啦，做咩仲唔出手。」
「人哋啱啱失戀咋……」阿樂低聲說。
Tim少鼓舞：「正好，快啲乘虛而入，蘇州過後冇艇搭；宜家又日見夜見，唔係唔上呀嘛？」
「佢今晚仲會見個Ex。」
「吓，打友誼波？」
「唔係呀。佢今日生日，話之前有啲嘢未講清楚喎，諗住今日一次過講哂佢喎。之後應該唔見啩……」
阿樂語帶猶豫；Tim少有理冇理，照說：
「咁咪得囉。近水樓台先得月——穴都係啦，今晚chok吓佢對你係點囉，熟熟吓就有機㗎啦，咩女媾唔掂喎。」
「得啦得啦，係咪打機呀？」
「打。不過等間落去食飯，順便買個蛋糕，今晚同佢吹蠟燭啦。」
「但佢返嚟都晏啦。」
「冇所謂㗎，多個蛋糕多枝蠟燭就多個願望吖嘛，冇人會唔鍾意嘅；佢又有多張相影喎。」
於是，Tim少和阿樂下樓吃飯，再買了一個蛋糕。回家，放進雪櫃，然後開始打機。