我破咗個文青處，但佢唔肯同我一齊。//《偏偏喜歡你》: 生日快樂（一）

「我出門啦。」
 
青青生日的前一晚，她出去原先的住處會合朋友。
 
「你幾點返嚟？」
 
阿樂截住她，要是她過去，路程也得花上十五分鐘，現在已夜深。
 
「唔知……睇傾幾耐啦，女人一齊就係多啲口水。」
 




「我宜家送你過去。」
 
「唔洗啦。」
 
「我餓，返嚟順便買埋宵夜啦；你就嚟返嚟就WhatsApp同我講聲，真係太夜，有啲危險。」
 
「OK。」
 
他們一起穿上人字拖落街。
 




阿樂剛進𨋢、㩒𨋢，𨋢門隨即關上，形成並不局促的密室，他抬頭看樓層顯示器：
 
「我哋好似識咗好耐咁，其實之前你同我搭檯食飯，我已經記得你。」
 
「幾時？」
 
「開學冇耐——CC can。你食米線，食完之後我上FH都記到你。」
 
青青也抬頭看不斷遞減的數字：
 




「冇印象……我每次都係食差唔多。」
 
「我記得都夠啦，因為你特別樣衰，所以我先記得你咋。」
 
「低能。我都淨係會記得靚仔！」
 
「你記得返嚟之前，就嚟起行就同我講，我出嚟接你。生日有咩事都好唔老禮。」
 
「得。」
 
十二點時，阿樂WhatsApp青青：
 
「生日快樂！」
 
隔了兩分鐘，她回覆：「多謝！」




 
「做緊咩？」
 
她傳給他一張小蛋糕的照片：
 
「好食！等等先覆你，我要同佢傾偈啦。」
 
他忽然想起，有一次他替Tanya慶生，她與他自拍，之後就開始不斷用電話，叫他：
 
「你食住先，我傾多陣。」
 
結果，Tanya對住電話聊了很久，遺下默默吃蛋糕的他一口口地送進嘴裏，在對面看她，食之無味。
 
他搖搖頭，歎有些回憶一時三刻無法抹走。
 




之後，他開了一盤LOL，見她還未說回來，就打多一鋪。到凌晨一點半，他見她的上線時間停在00：05，他忍不住WhatsApp她：
 
「傾完未？好夜啦喎。」
 
她隔了五分鐘，說：「就嚟啦就嚟啦。」
 
他馬上出發，到時，看見她被朋友擁着，鬆開後，他見到她一邊笑一邊哭。
 
她看見他，於是他前去打招呼；她又對他笑，但眼睛通紅得像要流下淚來，和她彎彎帶笑的眉眼異常違和。
 
他從她的朋友手上帶走她，替她拎起禮物，他突然覺得自己是她男友，而他甘願為她任勞任怨——
 
其實，我真係有啲想佢做我女朋友……唔清楚呢份欲望嘅厚度，但至少呢一刻，想佢永遠地留喺我身邊。
 
他問：




 
「你做咩又笑又喊？」
 
「感動囉。」青青笑。
 
阿樂皺眉，明顯不相信：
 
「真係咩？你平時睇喊苦喊忽啲戲都冇咁大反應㗎喎。」
 
「點同呢，我本身就係喊包嚟。」
 
他唯有點頭；又好奇地問：
 
「係呢，咁你個Ex有冇同你講生日快樂啊？」
 




她原本笑着的臉凝固，然後低頭道：
 
「冇。」
 
他在心裏暗喜，莫名其妙地，最好那個前度完全忘記，讓她知道Matt根本並不上心；但口頭上又只得如此講：
 
「瞓咗啫應該，遲啲就會收到㗎啦。咁你聽日仲會見佢？」
 
她點頭，回復微笑：
 
「係呀。」
 
他急切地問：
 
「之後呢？仲見唔見？」仲有下次仲得了？
 
她猶豫幾秒，又強硬地說：
 
「嗯……我唔會再主動揾佢囉，太攰啦，佢又冇呢個心思。」
 
阿樂又想起Tanya……這個人仿佛永遠存在他的腦內。他既為青青說不再找前度而高興，又為憶起舊事而有種隱隱的不適：
 
「明啊。好似做咩都係得我想，但吃力不討好咁。」
 
「嗯，係。」
 
突然，一隻貓從草叢躥跳出來；阿樂縮了一縮，和青青說：「唔洗驚。」
 
她笑：
 
「我冇驚。啲人話係你驚，先會覺得人哋驚，再叫人哋唔好驚。」
 
明明這小貓很可愛，身子白雪雪而背上有兩塊黑色、啡色皮毛合併而成的心形，眼耳附近的皮毛則是黑色的，另有泥黃色的花紋點綴，看起來十分好運——因為驟眼看有個福澤旺財的下庭，不知幾得意。
 
「冇啲咁嘅事；拜拜啦貓仔。」
 
她的嘴角隨即放平，她想起自己和Matt也有一模一樣的對話，和他說這是自我防禦機制的投射，他也一樣否認，叫她不要如此揣測，知識不一定連貫在生活裏。所以，她只敢說「啲人話」。
 
這時，貓貓朝他們「喵」了兩聲，他們速速回家。