自從同Miss喺一齊，我就忽然變得好受歡迎: 第240章 往事
點解兩個Miss明明喺度講緊我，但係我完全聽唔明嘅呢？
Miss Lee冷笑一聲：「今時唔同往日，我哋又放長雙眼睇下邊個係最後贏家。」講完都冇等Miss Cheung回話，就轉頭走咗去。
Miss Cheung咬住下唇，俾我拖住嘅手微微顫抖，睇得出正經歷頗為大嘅情緒波動，我反手用力握住Miss Cheung手心，試圖安撫下佢。
感受到我手上嘅力度，Miss Cheung擰頭望向我，用一種似乎可以睇穿我內心嘅清澈目光凝望咗我好一陣，然後先輕聲細語咁問：「你同李慧心係咩關係？」
「李慧心？即係Miss Lee呀？咪Professor同學生嘅關係囉。」我見Miss Cheung神色凝重，都唔敢亂咁講嘢：「Miss你識Miss Lee㗎？」
「佢係我舊同學，我想你老實答我，除咗師生關係，你仲有冇同佢有其他關係？」Miss Cheung好少咁認真問我同第二個女仔嘅嘢，或者應該話佢從來都冇試過咁介意。
「冇。」我認真搖頭：「Miss，我唔會呃你，我同Miss Lee真係冇任何男女關係，最多只係幫佢做過幾個project。」
Miss Cheung鬆咗口氣，臉容稍為放緩：「冇就好喇，如果有，我唔肯定自己接唔接受到。」
講到咁，不其然燃起咗我嘅好奇心：「Miss，其實你同Miss Lee以前係咪發生過啲唔愉快嘅事？」
Miss Cheung點點頭，不過冇接落去：「我哋上番車先，一陣我先詳細講俾你知。」
去Niagara Falls成個幾、兩個鐘車程，Miss Cheung得以將佢同Miss Lee之間嘅往事，一五一十咁講晒俾我知。
「李慧心係我中學同學，一路感情好好，情同姊妹，直至一齊升上大學讀同一學系。本來我以為會永遠同李慧心係好姊妹，但係最後竟然因為一個男仔，而令到我哋感情決裂，其實男女關係從來就係同性好友間嘅死穴，一旦同時鍾意上一個人，結果往往就係鬧翻收場。」
又係呢啲老套戲路，不過我有啲羨慕個男仔，能夠得到Miss Cheung同Miss Lee兩個神級Miss嘅青睞，而且仲要係學生時代嘅佢哋。
「我記得當時係大二，有一日我哋喺canteen無意間俾一個男仔撞跌晒啲嘢食，李慧心性格比我剛烈，當然第一時間大鬧個男仔，我睇落都覺得唔好意思，而且個男仔已經不停道歉，後嚟鬧鬧下唔知點解就坐埋咗一齊食飯，個男仔唔算靚仔，但係就有一種好特別嘅氣質，令到我同李慧心喺相處落嚟，不知不覺同時鍾意咗佢。」Miss Cheung停咗停，望向我：「講起上嚟，你同佢都好似，唔怪得我同李慧心都對你有特別感覺。」
我似佢？初初周穎同我一齊，咪又係因為我令佢諗起石克隆，咁究竟我應該慶幸自己因為似某某人而受女仔歡迎、定係因為成為替代品而悲傷呢？
「本來拍拖呢啲嘢係公平競爭，我哋初時知道大家鍾意埋同一個人，仲互相勉勵，話無論如何都要繼續做好朋友，直至後嚟我同咗個男仔一齊，李慧心先開始變得偏激，唔單止唔服輸，仲話我刻意中傷佢嚟勝出呢場競賽，其實男女間嘅感情，又點可以攞嚟比賽，就算贏咗愛情，都會失去友情，如果當日我識諗啲，就唔會冇咗李慧心呢個朋友，亦都唔會發生後嚟嗰件事。」
根據我睇過嘅無數爛片，呢種時候Miss Lee一定係出動美色橫刀奪愛，如果佢將呢招用喺我身上，我自問都未必抵擋得住。
「有一日我同個男仔拍緊拖時，突然兩個人同時收到李慧心嘅訊息，裡面竟然係佢同個男仔嘅牀照，當刻我即時質問個男仔，點知佢仲扮無知，話從來唔記得發生過相中嘅事，本來如果佢肯認錯同道歉，我或者仲會原諒佢，點知佢不單把持唔住，事後仲要否認，我當時即刻就同佢分手。」
果然係呢啲套路，Miss Lee搶先一步都係好嘅，唔係俾佢嗒咗Miss Cheung，我就永遠都會俾佢騎住，無法超越佢喺Miss Cheung心中嘅地位。
「跟住冇耐個男仔同李慧心都轉咗校，今時今日我都再冇個男仔嘅消息，而李慧心原來嚟咗加拿大，仲識埋你，呢個世界真係細。」最後Miss Cheung語重深長咁話：「所以你一定唔可以同Miss Lee一齊，唔係我會嬲死你㗎。」
咩都唔知就可能色迷心竅啫，乜都知道晒就梗係唔會…亦都唔敢喇：「Miss你放心，我保證絕對唔會同Miss Lee一齊。」為咗加強可信度，我加多幾句：「如果萬一我真係咁衰仔同Miss Lee有嘢，我就撼頭埋牆死咗佢。」
「咁又唔使，不過我諗我哋唔可以再喺埋一齊囉。」Miss Cheung若有所思咁話。
咁咪仲慘過死？仲有半年我就會離開Waterloo，出番Toronto，只要醒定啲，照計唔會衰喺Miss Lee手上，講番轉頭Miss Lee如果早啲同積極啲對我出手，我應該已經領咗嘢，真係不幸中嘅大幸。
講完往事後Miss Cheung似乎冇乜心機，可能諗番起以前不堪回首嘅失戀經歷，令佢一時陷入過往嘅不快回憶中，我冇打擾Miss Cheung，由得佢靜靜渡過餘下嘅車程。
去到Niagara Falls後，Miss Cheung心情回復咗啲，喺偉大嘅大自然景色下，人唔止變得渺少，人與人間嘅關係亦都變得微不足道，對於歷經千萬年歲月形成嘅天然奇景，人生嗰短短幾十年又算得咩吖。
因為想令Miss Cheung開心番，我哋午餐同晚餐都喺Niagara Falls附近嘅特色餐廳食，晚餐仲要係喺可以望住Niagara Falls夜景嘅酒店頂層食，係有啲肉痛，不過見Miss Cheung食完後心情好番好多，成個月嘅兼職人工都係使得物有所值嘅。
回程時Miss Cheung攰到瞓著咗，無論生理定心理上佢今日都虛耗太多，好好休息下都係應該嘅，所以返到酒店我放咗Miss Cheung一馬，冇要佢做劇烈運動。
過多幾日Miss Cheung就要返香港，我開始有啲唔捨得，而且對我同Miss Cheung嚟講，分開後先係對我哋感情最重大嘅考驗。