自從同Miss喺一齊，我就忽然變得好受歡迎: 第239章 舊同學
因為要遠行，所以今朝起身冇做晨運，等Miss Cheung沖完涼就出門口，女仔唔知點解咁鍾意一早沖涼，為免沖沖下涼又忍唔住搞個零鐘，我冇同Miss Cheung一齊沖，只係煮定早餐等佢。
我哋八點鐘已經開車，離開咗市中心嘅範圍後高速公路上少咗好多車，今日天氣好好，係冬天裡面難得嘅晴天，路邊積雪都溶咗啲，Miss Cheung沉醉喺公路旁美麗嘅景色，有一句沒一句咁同我傾閒偈，車程比想像中快，剛啱九點喥已經入到Waterloo。
首先帶Miss Cheung去睇咗我住嗰間房仔，屋裡面嘅人因為聖誕假關係仲未起身，我同Miss Cheung望一望間房就離開，然後驅車去大學，平時我都係行路番，一時唔知泊架車去邊度好，結果搵咗一大輪後先喺經常去嘅心理學大樓附近泊低車。
我拖住Miss Cheung喺校園裡面冇目的地閒逛，Miss Cheung話好耐冇試過咁有返學feel，覺得自己好似去番讀大學時期，同男朋友喺校園拍拖返學。
「Miss你大學嗰陣係第幾次拍拖？」我好奇問，以Miss Cheung嘅質素，除非佢唔想，如果唔係情人數量應該比我而家多幾倍。
「咩第幾次呀？我大學嗰陣只係初戀咋，而且時間好短，嚴格嚟講都唔可以叫初戀。」Miss Cheung仰頭回憶，臉上充滿懷念。
「Miss你講得咁得意嘅，不如你詳細講俾我聽吖。」對於Miss Cheung嘅過去，就算係Richard嘅事我都所知不多。
「你想知咩？好悶㗎喎，第時有機會先再講喇，今日我哋出嚟玩，唔提呢啲瘀嘢。」Miss Cheung眼中閃過一絲迷茫。
「咁你記住有心情嘅時候講我知喎。」我當然唔會迫問Miss Cheung，而且啱啱先因為呢廷舊事喺周穎身上瀨過嘢。
大學唔算大，如果唔係Miss Cheung一副懷緬過去嘅樣，我哋應該好快行完，唔似而家行咗成個鐘。
「一陣要坐個幾鐘車，你使唔使去個廁所先？」臨走嗰陣，我向Miss Cheung提議。
「都好吖。」Miss Cheung欣然答應。
其實我都想去，不過等Miss Cheung去完先，喺等Miss Cheung期間，忽然有個身材苗條嘅靚女經過，我見佢望實我好似想打我咁，就望多佢幾眼，唔望尤自何，望多兩眼竟然覺得有啲眼熟。
「你唔係扮唔識我呀？」靚女一出聲，就令我記起一個幾個月冇見過嘅人。
「June？」唔怪得啲人話June變咗好多，今日一見，果然成個唔同晒，如果當日初識佢時有咁嘅水準，往後發展可能完全唔一樣。
「做咩個樣咁驚呀？驚我食咗你呀？」June靠上前：「你唔係好關心我㗎咩？」
June個底果然唔差，keep fit後拍得住我身邊啲女，但係論到性格就𧶄少少，不過呢個都唔係最大問題，問題係我一見到佢個腦海裡面就泛起佢以前個肥婆樣。
「朋友啫，基本關心點都有，你唔係有咩誤會啩？」最重要今日我係同Miss Cheung嚟遊覽嘅日子，唔係都可以同你傾多兩句。
果然喺呢個關鍵時刻，我見到Miss Cheung笑笑口咁喺遠處同我揮手。
好彩呢幕唔係俾周穎見到，唔係真係一波未平 一波又起：「好喇，遲啲返工先再傾，我要走先喇。」
我冇等June回應就行過去接番Miss Cheung，Miss Cheung微笑話：「你都幾受歡迎喎，喺學校行個圈都有靚女埋身。」
「兼職嗰度個太子女，我對佢冇嘢㗎。」我備咗案先，同時向Miss Cheung伸出手。
「係咩？但係睇落佢唔似對你冇嘢喎。」Miss Cheung詐諦縮開手唔俾我拖。
我回頭望向June，見佢遠遠啤住我哋，唔怪得Miss Cheung會誤會喇，況且我個底又唔好，仲啱啱先衰咗鑊。
「你去埋廁所先喇，一陣上車你先「慢慢」講下你哋嘅事我知。」頭先因為驚行開咗Miss Cheung搵唔到我，所以話等佢去完我先去。
經過Miss Cheung身邊嗰陣我偷襲成功，喺佢咀上面錫咗一下，Miss Cheung嬌呼一聲，嚟唔切還擊就俾我逃開。
一路疴尿一路諗，覺得俾June無端端將咗一軍好唔抵，邱雅琳就話真係有關係，June真係冇嘢喎，而且就算而家變靚咗都冇嘢，將來唔知，起碼而家冇。
好少可以咁理直氣壯同自己辯解，一陣一定要同Miss Cheung解釋清楚！
出番去竟然見唔到Miss Cheung，短短時間佢唔知行咗去邊，擔心就冇嘅，只係有啲意外。
我去嘅係心理學大樓裡面嘅廁所，估計Miss Cheung都係行咗去附近，於是就四圍行下，諗住真係搵唔到時最多咪打電話俾佢。
果然行咗陣，就見到Miss Cheung熟悉嘅背影出現喺走廊轉角，我上前正想叫Miss Cheung，卻發現原來佢對面仲有另一個人，好似同佢講緊嘢。
行近幾步睇真啲，咦？同Miss Cheung傾緊嘅人竟然係Miss Lee！睇Miss Lee表情，似乎同Miss Cheung係舊識，不過神態唔係咁友善。
呢個時候Miss Lee都察覺我嘅存在，神情剎那轉為驚喜，仲向我揮手：「Wesley，你真係早啲返入嚟搵我呀？」
吓？唔係喎，我只不過同Miss Cheung到此一遊，你叫我早啲返嗰單嘢我一早唔記得咗喇。
我正想開口否認，Miss Cheung已經轉過身望住我，眼神仲有啲複雜，講唔出係開心定傷心，反而有啲似係震驚。
Miss Lee撓過Miss Cheung走到我面前，滿臉雀躍：「我估唔到你會肯嚟陪我。」
「Miss Lee你誤會喇，我今次係帶女朋友嚟參觀，唔係提早返入嚟。」我如實作答，見到Miss Lee咁驚喜我都幾意外，心底裡面仲不其然有少少暗喜，話晒Miss Lee係接近Miss Cheung嘅高質Miss，我唔會否認自己有時都會攞佢嚟做下性幻想對象。
「女朋友？」Miss Lee充滿疑惑地問。
「係呀，頭先同你傾偈嗰個咪我女朋友囉。」我喺Miss Lee身旁經過，上前拖住Miss Cheung。
Miss Lee望望Miss Cheung，再望望我，眼神迅速轉為冷漠，仲充滿怒意咁啤住Miss Cheung：「又係咁，你專登㗎！」
我一頭霧水，唔明Miss Lee點會咁講，而更令我訝異嘅，係Miss Cheung嘅答話：「今次唔同，我係唔會再讓你！」