自從同Miss喺一齊，我就忽然變得好受歡迎: 第208章 一個月一次嘅見面

「咁你有冇幫我頂住啲狗公先？」我直接問，同石克隆一世人兩兄弟，都唔使咁多廢話。
 
「我始終同周穎唔同科，不過俾我見到嗰啲都幫你兇走晒。」石克隆果然係好兄弟。
 
「咁辛苦晒你，始終入大學後咁多選擇，就算我同周穎感情幾深厚，都難免會對自己冇乜信心。」我老實講出問題癥結，無論內在定外表，我同周穎都有一段距離。
 
「你又唔使咁謙，你最近呢年食食埋埋咁多女，求其攞一件出嚟都羨慕死人，呢個世界冇僥倖嘅，你睇唔到自己嘅優點啫。」石克隆有啲酸味咁講。
係咩？我嘅優點咪好彩囉，唔通係識詠春呀。
 
平時好少打電話同石克隆吹水，一起咗個頭就吹到停唔到口，個幾鐘嘅車程亦都變咗轉眼就過，去到University of Toronto都未夠五點，周穎同Amy仲未落堂。


 
本來身為男友嘅石克隆應該接咗Amy先，但係石克隆知我想快啲見到周穎，所以就好貼心咁先去接周穎。
 
等咗一陣，啲落堂人潮就開始出現，除咗因為周穎外貌出眾，仲因為佢身邊圍咗好大班人，所以佢一踏出門口就俾我見到。
 
周穎身邊有男有女，最近身嘅主要係女仔，只見周穎同佢哋有講有笑，似乎喺融入大學生活方面，周穎比我適應得快好多。
 
石克隆示意我宣示男友身份，而呢個亦都係我嘅想法，打開車門，我大步走向周穎。
 
周穎雖然掛住同friend傾偈，但係都好快見到我，冇理會可能引人側目，周穎即時飛撲入我懷中。 


 
我用力摟住懷裡面嘅伊人，成個月冇見，對周穎嘅掛念升到佢嚟加拿大後最高，鼻裡面傳嚟熟悉嘅香氣，感覺上一個月嘅分別並未對我哋嘅關係帶嚟任何影響。
 
四周傳嚟艷羨目光，當然亦都包括咗唔少充滿妒忌同殺氣嘅視線，周穎意外地當眾錫咗我一啖，然後先擰頭同身後嘅同學揮手告別。
 
喺上番車前，我覺得自己已經俾人用眼神殺死咗十幾次，從倒後鏡望向滿臉得戚樣嘅周穎，佢好似覺得將一眾痴男嘅矛頭指晒向我好開心咁。
 
其實我仲開心，因為呢個係周穎對我哋彼此關係嘅肯定，如果佢詐詐蹄扮唔識我、或者喺其他人面前當我係普通朋友，咁先最驚。
 
接埋Amy後我哋去咗附近一間餐廳食飯，石克隆同Amy雖然唔係拍咗好耐拖，但係已經一副老夫老妻樣，反而我覺得同周穎仲係喺熱戀階段。


 
「你喺Waterloo要生生性性，出年轉番出嚟照顧阿Wing，我同Terence只會幫你睇住個靚靚女朋友一年，你唔好旨意大學4年都靠晒我哋。」訓示緊我嘅係Amy，雖然我唔相信佢嘅說話，但係激勵我嘅心意係feel到嘅。
 
「我梗係唔會咁諗喇，你哋兩個都要拍拖㗎嘛。你哋放心，我喺Waterloo除咗上堂同返工，其他時間都攞晒嚟溫習，我有信心出年一定可以轉番出Toronto。」咁講嘅時候無厘頭諗起June同Miss Lee，就算計埋佢哋兩個，喺Waterloo嘅生活仍然係枯燥乏味。
 
「你識咁諗就乖喇，我都唔想日日做電燈膽。」周穎適時插口。
 
「我對龍仔好有信心，到時我哋又可以兩兄弟拍住上，打遍UT冇敵手。」石克隆幾時都企喺我嗰邊。
 
「成日掛住打打殺殺，上次你同個鬼仔打交單嘢我都未嬲完。」Amy聞言轉臉睥住石克隆。
 
「吓？死鬼仔當住我臉撩你同阿Wing喎，唔俾啲顏色佢睇，下次我唔喺你哋身邊嗰陣，佢咪乜都夠膽做。」咁樣聽落石克隆又冇錯喎。
 
「鬼仔冇撩我，佢撩阿Wing啫！」Amy語氣帶點醋意。
 


「咩冇呀，條友啱啱撩完阿Wing，正準備撩你，俾我先一步摧毀咗佢嘅遐想之嘛。」石克隆即時反駁。
 
本來呢啲情侶之間嘅打情罵俏只係普通日常，但係唔知點解我聽落就覺得有啲哽耳，其實呢方面本來就係當初我叫石克隆照顧周穎時，喺心裡面曾經有過嘅不安，我當然信任石克隆，但係萬一佢太上心，甚至因為咁樣同Amy鬧翻，發展落去會變成咩局面我真係唔太夠膽想像。
 
「我知你哋感情好喇，唔使專登喺我面前耍花槍，為咗答謝你哋幫我照顧阿Wing，今餐我請！」我嘗試打完場，以免情況進一步惡化。
 
「咁又唔得，你要賺錢養家，今餐都係我俾喇。」石克隆知我咩身世，即時截住我。
 
「由得Terence俾喇，當係罰佢上次亂咁同人打交。」Amy同石克隆心意一致，唔想我亂使錢。
 
不枉我當石克隆係好兄弟，Amy係紅顏知己，兩個人都咁為我著想，當日冇同Amy一齊係有啲可惜，但係Amy做咗石克隆女朋友，反而令我放心啲交周穎俾佢照顧。
 
「難得咁齊人，不如我哋講下上次去downtown食飯嗰陣，Terence認錯人嗰單瘀嘢吖。」周穎見氣氛緩和番，主動建議。
 
「喂！嗰單嘢話咗得我哋三個知，唔會講俾龍仔聽㗎喎。」石克隆塊面竟然有少少紅，真係識咗佢咁多年都未見過。


 
「係咩？我哋有應承過唔講咩，Amy，你記性好啲，你記唔記得我哋有應承過Terence。」周穎笑笑口問Amy。
 
Amy作勢揚頭諗咗諗，然後雙手一拍：「當日你有叫我哋唔好講，但係我記得我哋冇應承。」
 
「你哋兩個......」石克隆望望Amy、望望周穎，口齒伶俐嘅佢居然講唔過兩個弱質女流。
 
餘下時間我哋喺好愉快嘅氣氛中渡過，結果我都係唔知石克隆件瘀事係咩，但係呢個已經唔重要，重要嘅係我哋四個之間嘅深厚友誼。
 
差唔多11點，我同周穎先返到屋企，屋裡面只係剩番小琪間房仲有燈光喺門縫透出，但係我冇去騷擾佢，因為我同周穎有更加重要嘅嘢要做。
 
等咗成個月，終於可以同周穎好好「相處」。