自從同Miss喺一齊，我就忽然變得好受歡迎: 第207章 助教

「我今日比較多嘢，麻煩你幫我搬番房。」Miss Lee嘅說話打消咗我嘅遐想，係咁啫，仲以為會有啲咩好事發生。
 
「冇問題。」我主動攞起咗最大沓嘅書同文件，Miss Lee今日著長袖恤衫配及膝窄身裙，喺領口可以清楚見到由豐滿上圍所夾出嘅深刻乳溝。
 
喺行去Miss Lee間房途中，我得以從後望向佢嘅漫妙身姿，望住嗰條細到唔合比例嘅纖腰同睇落又翹又彈手嘅籮柚，第一時間令我諗起Miss Cheung，諗落我都好少從後咁樣欣賞Miss Cheung，原來睇後都可以咁吸引，下次見到Miss Cheung時一定要好好睇番夠。
 
去到Miss Lee間房門口，佢就攞出鎖匙準備開門，但係扭咗一下就「咦？」咗一聲，喃喃自語咁話：「我頭先唔記得鎖門咩？」
 
打開房門，二百零呎嘅房裡面除咗大書枱同滿滿嘅書櫃外，仲有一張雙人梳化，而喺梳化上面，此時坐咗一個我都識嘅人，就係Psycho Professor Dr Malcolm。
 


見到Dr Malcolm，Miss Lee個樣有啲意外，唔知係咪我多心，我覺得Miss Lee嘅眼神有啲厭惡，不過佢依然好有禮貌咁同Dr Malcolm打招呼。
 
Dr Malcolm見到Miss Lee就好開心，但係發現身後嘅我就即刻黑晒臉，好似覺得我阻住佢咁，睇佢個笑起上嚟淫淫地嘅樣，我都估到少少發生緊咩事。
 
以前睇啲西片成日有啲咸濕教授用成績嚟誘惑啲女學生就範，Miss Lee係讀緊Doctor嘅助教，都算係Dr Malcolm個學生，唔通都逃唔出呢啲4仔劇情？冇法喇，你有波有籮，仲要係亞洲風情，又係幾令人心動嘅。
 
Miss Lee細細聲好快咁同Dr Malcolm講咗幾句英文，以我呢個距離接近完全聽唔到，而就算聽到嗰少少亦都聽唔明佢哋講乜，然後Dr Malcolm就悻悻然咁起身離開，經過我身邊嗰陣仲睥咗我一眼，吓？唔係怪我阻住你哋呀？咁我都好無辜啫，你條老淫蟲唔好借機fail咗我添呀，聽講呢科Psycho Intro合格率係99%，我又唔係女仔，萬一因為咁而做咗嗰百分之一就真係寃枉。
 
我望向鬆咗一口氣嘅Miss Lee，心諗原來你係借我過橋啫，不過就算你堂堂搵我陪你返房，都避唔得幾多次，而且你仲有咁大個把柄俾人揸住，要你除晒衫褲book埋房都仲得喇。
 


「唔該晒你呀，Wesley。」Miss Lee一副想耍走我嘅樣，但係停咗一停，忽然又話：「係呢，你上堂有冇咩唔明，有可以而家問我。」
 
呢啲基礎心理學課程，有咩可以唔明呢，不過我都明，你係敷衍下我啫：「冇呀，如果冇其他嘢幫手，咁我去上堂喇。」
 
Miss Lee點點頭：「咁好喇，你有問題可以隨時嚟搵我。」
 
仲搵你？非必要都唔敢喇，萬一又撞到你同Dr Malcolm兩個唔知喺度搞乜咪大鑊，到時就做硬百份之一嘞，我喺University of Waterloo係過渡啫，你估你係Miss Cheung咩，如果個老淫蟲搞嗰個係Miss Cheung，我就畢唔到業都會打佢一鑊。
 
除咗呢段小插曲，呢個星期就冇乜特別，可能搵開我就手，之後每次落堂Miss Lee都會搵啲嘢要我幫手，藉詞叫我陪佢返房，當然唔係每次都會撞到Dr Malcolm，但係十次都有七、八次，我一星期都係見到Miss Lee一至兩次，我唔知佢其他時間點樣應付Dr Malcolm，總之我就成為咗其中一個幫手。
 


今個星期Chloe有事冇入嚟搵我，所以我渡過咗一個寂寞嘅周末，亦都趁機溫咗下書，讀書我就冇乜心機㗎喇，為周穎同Miss Cheung而努力啫，我都唔記得有幾耐冇試過過啲咁正常嘅生活，除咗返工同返學，就係喺自己間房仔或者圖書館度溫習。
 
June繼續失踪，已經有近三星期冇見過，雖然我冇問雄哥，但係多口嘅珍姐有次就成個八婆咁同我講：「阿蓮最近唔知搞乜，喺度積極減肥，平時只會聽佢話唔夠飽，近排扒兩啖就唔食，成個人當堂瘦晒。」阿寶係珍姐同發哥對June嘅稱呼，June全名叫劉玉蓮，我覺得呢個名好適合佢，通常叫得乜蓮物蓮嗰啲人都比較有份量。
 
有瘦到咩？喺學校間中見到June嘅時候又唔覺佢有點瘦到，最多咪係大同巨大嘅分別。
 
「你知唔知阿蓮係咪拍緊拖？唔係冇理由咁努力修身。」珍姐原來都係八卦啫。
 
「我唔知喎，係都唔定。」我對呢方面冇乜興趣，總之June冇搞到我，我就唔會𢲡屎上身喇。
 
「你唔知，冇理由嘅，你哋返埋同一間大學，點會一啲風都收唔到。」珍姐一臉唔信：「我每次問親佢都臉紅紅咁話冇，嗰個含春樣分明就係有啲嘢。」
 
老實講我真係冇興趣知肥婆啲嘢，而且阿珍姐你知唔知大學有幾大，我哋仲要既唔同年又唔同科，基本上撞到嘅機會接近零。
 
求其再應酬咗陣珍姐，我就借返廚房做嘢甩身，有目標係好嘅，起碼而家唔使嚟煩我。


 
一個月好快就過，終於嚟到我期待已久嘅返Toronto日，開學前我同周穎約定過，如果唔係有長假期，一個月只可以見一次，以便我哋可以各自努力讀書，所以呢個每月一次嘅見面，對我哋嚟講都好珍貴。
 
為咗快啲可以出到去，我一早就約咗石克隆入嚟接我，一上完星期五嘅堂，喺不遠處就見到準時嚟到嘅石克隆。
 
「Amy同周穎要五點先落堂，而家三點幾，出到去啱啱好可以接佢哋。」我一上車石克隆就主動話：「然後我哋一齊食飯？」
 
「好呀！」我心情好好，等陣就可以見到周穎，今晚又可以同佢痴纏，我心情點可能唔好：「你哋呢個月過成點呀？啱啱開學係咪好忙？」
 
「Okay喇，我有Amy照住，啲進度尚算理想。」石克隆似乎唔介意做小男人。
 
「係呢，有冇啲狂蜂浪蝶黐埋Amy同周穎度？」我不經意咁問，其實我關心周穎啫，不過唔問埋Amy好似有啲重色輕友。
 
「你覺得呢？」石克隆懶神秘咁吊我胃口。
 


老實講，你話冇我都唔信喇。