自從同Miss喺一齊，我就忽然變得好受歡迎: 第189章 救命稻草
我好想係聽錯，不過Judy跟住落嚟嘅說話進一步粉碎咗我嘅奢望：「當我發現自己有咗，第一個諗起嘅人就係你，無論中間發生過咩事都好，你始終係我肚裡面個BB嘅爸爸，所以我決定返番你身邊。」
咪住先，呢幾個月Judy唔知去咗邊，搞過啲咩，個BB未必一定係我㗎，唔俾你俾人搞大咗個肚返嚟搵我賣單呀？況且我哋以前雖然冇用套，但係好似都冇中出過佢，係有少少風險喺做嗰陣唔覺意射咗啲精入去，之不過有冇咁好彩之前中出個個都冇事，淨係比較小心啲同最唔想有事嗰個就偏偏出事呢？
以上嘅質疑我冇即時問出口，而家咁多人喺度，阿媽、阿妹同小琪都算，最重要係周穎，如果我喺呢個時候第一句就好唔負責任咁話個阿B唔係我嘅，一定會令周穎覺得我係一個敢做唔敢認嘅渣男，雖然敢認都仍然係渣男。
「有咩你入嚟先講。」我讓開個身俾Judy入嚟，見到佢身後仲有兩件大行李，睇嚟真係想搬番嚟住，咁會唔會令到周穎把鬼火搬走㗎？
我唔係好敢回頭望身後嘅四個女仔，走出去搬行李，今日本來係同周穎重逢嘅好日子，俾Judy咁搞一搞當堂咩mood都冇晒，我唔係冇諗過成日中出啲女總會有出事嘅一日，只係諗唔到出事嗰個會係Judy，有得揀，我寧願大肚嗰個係小琪或者Chloe，都唔想係最冇感情嘅佢。
入番屋後我見Judy仲企咗喺走廊，對住廚房門口嘅阿媽佢哋，阿媽同阿妹臉色唔係太好，係幾明顯嘅敵意，小琪就喺後面細聲安慰緊喺度默默流淚嘅周穎，見到周穎咁傷心嘅樣，我真係好後悔因為濫交而惹出嘅禍，如果今次可以大步檻過，我發誓以後都唔會再隨便同其他女仔扑嘢、同埋唔會為咗舒服而唔戴套，如果當日我有戴套，今日就唔使喺度同你哋講戴套係幾咁重要。
「你肯定個BB係阿哥㗎？咁多個月冇見，都唔知你喺出面搞過啲乜，一返嚟就當正自己係我哋張家嘅人咁，感情嘅嘢你情我願，你唔好諗住大咗肚就實會娶你過門呀。」阿妹對於Judy本來冇乜嘢，講到咁應該係因為周穎嘅關係。
Judy當然有留意到周穎嘅存在，成間屋得我一個男仔，周穎嘅身份都唔難估到，於是佢轉身返番我身邊，捉實我隻手好淒涼咁話：「雖然我冇驗過，但係呢啲事我心裡有數，計番日子應該就係Wesley嘅骨肉，我返嚟都唔係話要咩名份，只係希望你哋可以暫時收留我，等我可以安心生個BB出嚟，BB始終係你哋張家嘅人，唔通你哋忍心叫我落咗佢咩？」
阿妹本來仲想講啲咩，在場最有權威嘅阿媽已經伸手截住咗佢：「阿龍，你老實話俾我知，個BB係咪你嘅？」
我點知啫！我望住充滿威嚴嘅阿媽，再望望喺佢身後眼紅紅一臉關切咁望住我嘅周穎，都唔知點答好，我梗係想話唔係我㗎喇，但係我真係唔肯定，我邊有可能記得同Judy搞嘢嗰陣有冇唔小心射過啲精入佢度啫。
我望向身旁嘅Judy，佢將我隻手夾住喺佢對大包度，滿臉期待咁等我答話，有生以嚟，我第一次俾人用對波夾住隻手都起唔到頭：「其實點解你咁肯定個BB係我嘅呢？你走之前我都有一排冇同你咩過，以前嗰幾次亦都好小心，你會唔會搞錯咗。」
Judy見我都好似唔想認數咁，即刻喺雙眼度啤咗啲眼淚出嚟：「估唔到你係啲咁唔負責任嘅人，我只怪自己睇錯咗你，既然呢度都唔歡迎我，咁我走喇。」口裡面係咁講，實際卻完全冇放開我隻手嘅意思。
「不如你哋俾佢坐低慢慢講。」開口邀請Judy坐低嘅，竟然係聲音沙啞嘅周穎。
唉，都係我唔好，我從來都冇試過咁責備自己，原來傷害心愛嘅人，比傷害自己更難受百倍，點解Judy要喺呢個最唔適合嘅時間出現呢？雖然我知道世界豈能盡如人意，但係都唔使咁唔如我意㗎！
「唔使對呢啲人咁好，佢今次返嚟純粹係想屈Wesley。」喺我自怨自艾緊嗰陣，一把彷彿從天上降下嘅聲音俾咗一線曙光我。
我抬頭望向阿媽方向，一睇佢哋滿臉疑惑咁望向我身後，就知啱啱嘅說話唔係佢哋講，我同Judy同時望向身後，出現喺眼前係身穿高貴晚裝，一臉不屑嘅Chloe，識咗佢咁耐，從來都未試過有呢刻咁需要佢，我簡直覺得佢係上天派嚟打救我嘅天使。
「Chloe，你唔好亂講喎，我對Wesley一心一意，點會屈佢。」因為我同Judy企得近，所以留意到佢喺聽到Chloe把聲時臉上曾經閃過一絲驚訝，但係好快就回復鎮靜，言詞堅定咁反駁番轉頭。
「係咩？咁之前你俾Patrick份驗DNA報告係假㗎？」Chloe毫無動搖，微笑話。
聽Chloe提起Patrick，Judy即時甩開我隻手，上前指住Chloe大聲質問：「你點知Patrick嘅事㗎？呢件事除咗我同佢，冇可能會有第三個人知道。」
Chloe冷冷一笑，笑到我都有啲心寒：「你當自己係咩呀？Patrick呢啲有錢仔會睇上你？你真係以為波大就可以令到個個男仔都對你神魂顛倒呀？只有嗰啲冇內涵嘅狗公先會俾你迷住㗎咋，你估Patrick第一日出嚟玩呀？」咦？點解聽落好似鬧埋我咁嘅？唔係，我絕對唔係因為Judy大包先上佢嘅。
Judy臉上陣紅陣青，突然恍然大悟咁話：「原來一切都係你搞出嚟嘅！」說完彎身如有神力咁抽起地上嘅兩箱大行李，頭都冇回咁衝咗出門口。
Chloe讓身俾Judy離開，同我單咗下眼，然後舉頭向我身後方向揮手：「Wing姐姐，你好呀！我係Chloe，今日本來專登嚟拜訪你，不過而家臨時有啲事要處理，遲啲再嚟過。」然後Chloe用一個只有我見到嘅口形話：「交俾我。」跟住就轉身走埋。
從Chloe同Judy頭先嘅對話，我已經或多或少估到發生咗咩事，諗起Chloe剛才嗰下冷笑，我不其然打咗個冷震，原來最可怕嘅唔係有心機嘅女仔，而係又有錢、又靚又有心機嘅女仔。