自從同Miss喺一齊，我就忽然變得好受歡迎: 第109章 Wonderland之旅
今朝好早就起咗身，因為阿妹話Wonderland要早啲去，晏晝一開始多人就度度都要排好耐隊，雖然冇諗過要玩晒所有機動遊戲，但係佢話淨係想玩嘅都有六、七樣。
六、七樣都要玩成日，咁每樣咪要排個幾鐘？考慮到大部份時間都要企，衣著都係簡樸舒適為主，我著咗件長袖T恤同鬆身長褲，周穎則上身一件粉紫色濶袖冷衫，下身一條貼身彈性牛仔褲。
尋日過咗平淡嘅一日，食完早餐就去探阿爸，返屋企就煮飯同整花園，下午空閒期間我同周穎去附近漫無目的咁散咗個零鐘步，夜晚食完飯睇陣電視，之後搞咗次嘢就瞓。
我哋都再冇提前晚發生嘅事，唔係刻意唔提，只係冇再特別講起，休閒嘅日子唔一定可以永遠維持落去，珍惜眼前嘅所有先係最重要，過去咗嘅就應該任由它成為歷史。
照舊留咗前座俾Betty，我坐後排左邊，周穎坐中間，去到Betty屋企，剛駛上行車道，「安」都未響Amy同Betty就自動走出嚟，Betty打扮同阿妹一樣係竹昇妹look，而Amy，穿著竟然同周穎出奇地相似，係件冷衫啲色淺少少，Amy同周穎身形差唔多，又係長頭髮，如果喺背面睇，我懷疑連我都會認錯。
周穎見Amy同自己衣著咁似都有啲意外，唔通即係話佢哋啲taste差唔多？
「你哋夾埋㗎，成對孖公仔咁。」阿妹指住周穎同Amy係咁笑。
周穎望望Amy，Amy望望周穎，兩個都不禁相視而笑。
「咩孖公仔啫，直情要義結金蘭喇，兩個鍾意埋啲一樣嘅嘢。」Betty唔知係咪專登，講到有啲暗示咁。
「哦，嗰啲高高瘦瘦嘅嘢呀，益咗佢喇，左右逢源，行晒桃花運。」阿妹驚死蝕底咁講埋一份，乜佢唔係企喺周穎嗰邊嘅咩。
「桃花運？桃花劫就真喇。」Betty繼續同阿妹唱雙簧。
我見周穎笑笑口咁望住前面冇咩表示，Amy就臉紅紅望住外面扮聽唔到，Amy反應都算正常，但係周穎明知我望佢都唔回頭，有啲避開我目光咁，似乎唔係咁想聽落去。
「睇實前面揸車喇，你唔記得上次喺Niagara Falls返嚟差啲抄車呀。」為免阿妹兩個唔知扯咗去邊，我出聲警告阿妹。
「上次差啲抄車咩？我唔知嘅。」Betty上次回程時瞓咗，所以唔知阿妹揸車恰眼瞓件事。
「唔係，你咪聽阿哥亂講。」阿妹死要臉，又驚嚇親其他人，即刻拉開話題同Betty講第二啲嘢。
我吁咗口氣，伸出手抱住周穎條腰，將佢拉埋身，周穎起初有啲反抗，想掙開我，但係喺我呢啲練武之人面前，佢都唔知發生咩事就跌咗入我懷裡面。
「做咩喎，我唔俾你抱呀。」周穎鼓埋泡腮細細聲講。
我好少見周穎呢個撒嬌樣，覺得好吸引，忍唔住錫落佢個咀度。
周穎見咁多人喺度我都咁狼，「啪！」一聲大力打咗我個頭一下，咁仲衰，引起晒所有人注意。
「Get a room！」阿妹喺倒後鏡叫到我哋咁痴纏，即刻串我哋。
我笑住放開周穎，周穎塊面紅晒，但係只係媚態萬千咁睥咗我一眼，冇再扮嬲，亦都繼續挨喺我胸口冇離開。
Amy用有啲複雜嘅眼神望咗我哋一眼，然後就望番去窗外。
「我知你對我有好感，我都有少少嘢，但係周穎同我經歷咗咁多嘢，感情深厚得多，喺呢一刻，只能同你講句「相逢恨晚」。」我喺心裡面暗暗同Amy講。
阿妹繼續喺前面同Betty邊講笑邊開車，我就攬住周穎望向窗外不斷倒退嘅風景，周穎同Amy都冇講嘢，一個同我視線一致睇風景，一個就靜靜地側埋塊臉唔知諗乜。
好快就去到目的地Wonderland，可能真係比較早，園外嘅車龍唔算長，十零分鐘就入到去，泊低車後阿妹有晒方向咁帶我哋向目標進發，Betty同Amy緊隨其後，我拖住周穎包屘，Betty喺Amy耳邊唔知講乜，又不時偷偷瞄過嚟，個樣奸奸地咁似乎有咩陰謀。
阿妹第一個想玩嘅係號稱世界最高、最快嘅過山車，呢度啲機動遊戲大部份係過山車，木製過山車、企喺度過山車、倒後過山車、雙腳懸空過山車，總之就係設計到有咁刺激得咁刺激，務求嚇到啲人扯盡喉嚨死嗌爛嗌。
對於機動遊戲，其實我就唔係咁大興趣，唔係驚嘅，不過覺得冇必要玩埋啲鬥大膽嘅嘢，我見周圍啲男男女女玩到臉色蒼白口震震咁都繼續扮晒無事喺度排隊，都幾無謂，如果要喺女朋友面前扮英雄就無何厚非，我呢啲氹咗周穎落搭嘅就唔使勉強喇。
始終一場嚟到，點都要應酬下玩番一、兩樣，唔係連入場費都蝕埋，記得上次聽Betty講話Amy唔敢玩，今次見佢都照走去排隊，一副豁出去嘅表情，周穎就好冷靜嘅樣，唔知驚定唔驚，出奇地鎮定。
實際去到過山車下方嘅時候，先親身感受到嗰種震憾，驚叫聲隨「格嘞格嘞」嘅機械聲喺頭上此起彼落地響起，有種強大嘅迫力由空中壓落嚟，令心跳不自覺加速，周穎捉住我嘅手掌緊咗一緊，我望向佢，只見佢雙眼定定咁望住上方嘅過山車。
「你係咪唔想玩，如果唔玩我陪你周圍行下。」我感到周穎心底應該係驚嘅，所以自以為體貼咁講。
「咦？你哋唔敢玩呀？」阿妹聽到我哋嘅對話，轉頭問。
Betty同Amy都轉頭望向我哋，我突然醒覺情況有啲唔對路，果然周穎即刻就話：「唔係，一場嚟到梗係咩都要試下。」
情況有啲騎虎難下，咁環境就算周穎真係唔敢玩，都會扮大膽，免得掃大家興，而且我有少少覺得周穎唔想喺Amy面前失威，有種競爭者之間嘅鬥爭表現。
唔係排咗好耐就到我哋，為咗避嫌，我坐最邊，周穎喺我隔離，跟住依次係Amy、Betty同阿妹。
以阿妹同Betty呢啲唔識死，我哋當然係坐最前排！