自從同Miss喺一齊，我就忽然變得好受歡迎: 第108章 後宮嘅煩惱
我覺得有少少心浮氣燥，幫周穎冚好被後起身出後花園，諗住呼吸下新鮮空氣，順便打俾Miss Cheung傾下偈，電話上面顯示有一個missed call，係石克隆。
有啲嘢都係要面對嘅，而且我點都應該打去多謝石克隆，於是打俾Miss Cheung前，我打咗俾石克隆。
石克隆好快就接聽，我首先開口：「克仔，頭先真係多謝你救咗周穎。」
「我同你唔使講呢啲客氣說話嘅，最緊要校花冇事。」石克隆語氣豪爽咁講。
石克隆嘅說話令到我個心好溫暖，有周穎咁好嘅女朋友，又有石克隆咁好嘅兄弟，我自覺十分幸運：「周穎冇事，已經瞓咗，係呢，原來你都識阿妹個friend。」
「你講Chloe？佢咁出名，有邊個唔識，而且我哋家族上有啲生意來往，好細個已經見過，Chloe個人冇乜點，係有少少千金小姐脾氣，不過比起其他富二代嚟講，同我算係比較friend嘅人，含住金鎖匙出世，有邊個冇脾氣。」石克隆解釋。
「唔係吖，我覺得你就一啲富二代嘅劣根性都冇。」我真心認為石克隆係我識得嘅人中最有錢，但係又最值得交朋友嘅一個。
石克隆大笑：「真係？你唔記得我哋第一次相遇嘅事呀？嗰陣你仲話我串添。」
咦？石克隆唔講我都差啲唔記得當初就係因為誤會石克隆恰王小富，先至同佢不打不相識，嗰鑊係我有生以嚟同人打交打得最甘嘅一次，仲造就咗我哋三個之間深厚嘅友誼：「當年我有眼不識泰山啫。」講番以前嘅嘢好開心，我都不經意咁喺咀角泛起一絲微笑。
「知道校花冇事就ok，咁你都早啲瞓喇，今晚咁辛苦。」石克隆意有所指咁講。
「克仔，我有啲嘢想問下你。」喺收線前，我都係忍唔住想問。
「係咪關於校花嘅事？」石克隆果然醒目，不過又唔係咁難估。
「係，頭先睇阿妹返嚟嘅表現，唔似知道發生喺周穎身上嘅事。」如果阿妹知道，件事應該會搞到好大。
「校花唔講俾你阿妹聽都正常，萬一俾主人家Chloe知道咗，件事就唔知點收科，而且啲嘢飲俾人落咗藥應該係個別事件，我估唔係全部都俾人加咗料，不過點解咁啱俾校花飲到，就有啲耐人尋味。」石克隆同意周穎嘅做法。
「其實你發現周穎嘅經過係點？」我終於將心裡面嘅疑惑問出口。
「周穎點同你講？」石克隆反問，冇直接回答。
石克隆咁講，令我有啲不祥嘅預感，唔通事實真係同周穎所講有分別？我猶疑咗一下，石克隆係我好朋友，我唔想用啲咩手段去套佢料，於是就將周穎對我講嘅事發經過覆述咗一次俾佢聽。
「事情同我見到嘅冇分別，當然我冇辦法知道之前發生過咩事，但係你覺得有咩問題呢？」石克隆似乎覺得我太多疑。
我鬆咗口氣：「冇，我覺得事情有啲巧合啫，喺最後一刻你可以及時出現。」
「你覺得真相重要、定係校花重要？」石克隆突然問我。
「梗係周穎重要。」我諗都冇諗就即刻答。
「咁事實係點又有乜所謂，你而家要做嘅，就係好好對校花，而唔係追究所謂真相，周穎係真心鍾意你，就算有一日佢呃你，都一定係為你好。」石克隆罕有地認真咁同我講。
「對唔住，克仔，或者我真係諗多咗。」石克隆講得啱，善意嘅謊言，有時係必須嘅。
「我哋三兄弟中，王小富膽小怕事，我就遊手好閒，最正常、最有機會跑出嘅就係你，你睇校花對你咁死心塌地就知喇，」石克隆回復平時嬉皮笑臉嘅態度。
「總之今日多謝晒你，無論係我嘅事、定係周穎嘅事。」最後我再次感激石克隆今晚為我同周穎做嘅事。
「你同校花都咁客氣嘅，真係天生一對。」石克隆講完後就掛咗線。
同石克隆傾完電話好咗啲，我跟住打咗俾Miss Cheung，原來佢喺度等緊我電話，好彩我有打俾佢。
傾咗陣閒偈，談咗陣心，Miss Cheung醒起啲嘢：「王小富今日走嚟問我關於你嘅事，問你向我請咗幾耐假，幾時先返，好似好關心你咁。」
「王小富？」我第一時間諗到嘅係邱雅悅同邱雅琳兩姊妹，嚟咗加拿大後我都冇打過俾邱雅琳，只係send過幾次messages講下啲表面嘢，王小富條友咁重色輕友，應該都係邱雅悅指使佢打探。
「你打下俾王小富喇，佢咁關心你，你哋又咁好朋友。」Miss Cheung心地善良，冇我諗得咁多：「而家仲係lunch time，不如今日我哋講少陣，你打番俾佢先。」
「但係我想同你傾偈多啲喎。」我好肉麻咁講。
Miss Cheung明知我扮晒嘢，都俾我氹到好開心：「我哋好快就有得見喇，你聽日有時間先再打嚟，而家快啲同你個friend報平安先。」
「快啲見到Miss就好喇，我哋好耐冇好好親近下。」我由衷掛念Miss Cheung嗰對36D靚波。
「親咩近啫，講到咁曖眛，我唔同你講喇，你自己小心啲。」隔住電話，我都可以想像到Miss Cheung成塊面紅晒個怕醜樣。
我當然冇打俾王小富，而係直接打俾邱雅琳。
電話響咗好耐先有人聽，電話傳嚟嘅係邱雅琳未瞓醒咁嘅聲：「喂。」
「我係咪嘈醒咗你？」我問咗個好低B嘅問題，睇嚟邱雅琳應該啱啱返完夜班。
「子龍？你係子龍？我好掛住你呀。」邱雅琳把聲即時醒晒。
「對唔住，過咗加拿大幾日都冇打俾你，因為阿爸嘅事令到我有啲心煩，唔想將啲唔好嘅情緒傳染俾你。」正如石克隆所講，善意嘅謊言有時係必須嘅，我係心煩，不過唔係煩阿爸單嘢，而係周穎嘅事啫，但係而家都放開晒。
「你唔好咁講，我都知你實好多嘢要處理，所以都唔敢騷擾你，但係我又好想你打俾我，好想聽到你把聲。」邱雅琳有啲唔好意思。
「我同你咩關係呀？你梗係可以隨時打俾我。」我只可以咁講。
「真係？不過都係唔好喇，你搞掂阿爸啲嘢返嚟後大把機會喇。」邱雅琳同Miss Cheung一樣咁溫柔體貼。
個個都話「就快見」、「大把機會」咁，返香港後睇嚟都幾忙：「咁你俾心機做嘢，實習完我要你做我私人看護，幫我處理我啲生理上嘅需要。」
「你講埋啲衰嘢嘅。」邱雅琳完全冇唔開心。
隱瞞咗周穎嘅事，我將呢幾日喺加拿大發生嘅嘢簡略講咗俾邱雅琳知，撇除咗周穎，喺加拿大嘅日子都幾乏味。
「夜喇，我都要瞓喇，你都早啲瞓，你聽日使唔使返工呀？」講到成三點，都交足晒功課喇。
「唔使，不過你嗰邊係凌晨，你應該好眼瞓，你今日打俾我，我好開心。」邱雅琳把聲好甜。
講咗成晚電話，個耳仔都出晒汗，多女有多女嘅煩惱，如果晚晚咁逐條女應酬，我都唔使旨意有得瞓，仲未計另一方面嘅滿足。
男人就係咁，冇女嘅時候想有女，有女嘅時候又嫌太黐身，或者我唔可以拉晒所有男人嚟講，呢個可能只係我單方面嘅問題。