🏫 👩🏼❤仲講中學生「應否」拍拖？不如講下「如何」拍拖啦！🏫 【校園】【愛情】【鬥智】: Ch.7.3 人生的抉擇
每年學校考完試，都有post exam活動，例如學生會有歌唱比賽，低form學生會有電影導賞團，有時仲會攪埋啲咩攤位遊戲，大食會等等。
不過正當啲人享受緊嗰種考完試，又學期尾，又臨近暑假嘅氣氛時，最近學校又興起咗有關換校長嘅議題。
7月6號，今日係歌唱比賽日，好多自稱有音樂天份嘅人都上台表演，有人彈結他，有人solo，有埋情侶上台合唱。
出面曬到成個焗爐咁，而禮堂內就燈光昏暗，仲有涼涼冷氣，簡直係兩個世界。
「聽講個新校長又守舊專制bo」
「係囉，我仲聽講佢以前攪到其他學校亂曬」
「佢好似會拆散拍緊拖嘅學生」
「我只係個毒撚，都冇拖拍㗎啦，怕咩呀？」
「唉，都唔知點好。」
「諗咁多做乜？你有拍拖咩？就算有禁令會影響到你咩？」
我聽到坐我後面嘅三個男同學竊竊私語。
嗯，如果係咁就真係影響我喇，因為阿玲遲早都會同我日日見面。
「So many signs......
so many signs......
I think I've seen this film before......」
台上一對同學唱緊Taylor嘅Exile。
而家係合唱比賽部分，半個鐘之內已經有5 pair參賽者上台，有人唱得好聽，有人唱得唔好聽，但我享受嘅係音樂旋律多過歌詞與人的歌聲；一個sing con如果要攪曬，最少都要兩個鍾。
David: 喂Isaac, 我同阿Chris同埋阿Fred一齊去m記
(他對我俏俏話)
David喺singcon期間搵格離班同學R水吹，一個鐘頭之後返嚟搵我食飯。
我地學校每到學期尾係無王管，因為呢個時候，一來唔係全體師生都返齊，唔會有咁多人力物力去管學生；二來臨到學期尾，學校都唔想咁on9去攪埋啲訓導野（除非你真係做得好過份），冇理由成績表印完再印過，更加冇理由要攪到學生升唔到班畢唔到業；三來，學校都好識做，知道post exam activities係比大家玩，所以就更加唔會理人玩得幾癲。
所以我而家明刀明槍早走都仲得。
「好啊」我一聲應好，然後就一齊起行去m記。
阿Fred，3E班同學，即係全級成績最差果班。中等偏瘦身材，明明係一個十幾歲青少年，但個樣望落好似中年男人咁，因為就算佢剃左鬚，但佢臉上鬚渣好明顯，鬚根特別多。
讀書唔叻嘅人，通常對人對事特別敏感，學校有咩風，佢地收風快人一步。
David：你地應該都知新校長喇，你地都知佢有幾唔店㗎啦，唉，我想轉校。
Fred：做好自己本份，校長嘅野關你撚事咩！
David: 但我聽人講佢會阻人拍拖，咁我將來拍拖都唔知點好。
Fred：你唔好拍拖邊會有事呢？!
好少見到David咁悲觀。
David：Issac, Chris，你地唔講野嘅?
佢望住我地兩個，好似想我幫手講兩句咁。
阿Chris放下手上嘅電話，而我亦放下手上嘅雪碧。
我：而家你地都係聽講啫，fact check 清楚件事先再擔心啦，何況就算真係咁，天無絕人之路，總有方法嘅。
(我咽了一口，然後微笑對佢地說)
Chris：係囉，唔好妄⋯⋯妄下定論，咁快話轉校。
(口吃地說)
7月10號，派成績當日，亦即係暑假前嘅最後一日。
「施宇軒」陳sir終於叫到我攞成績表，然後說：考得唔錯，唯獨數學曳左，繼續努力。
我成功入到X1嘅phy，亦都成功讀chem，希望自己上到中五讀埋m2。
今次我考全級16名，但係我最有信心嘅maths 因為撻Q考差咗，嗰科跌落40/180名，我有少少失望。
返到屋企，見到阿媽由澳洲返左黎。
我：阿媽?
媽：阿仔，成績點啊？
(關心的語氣)
我：還好啦，都算係咁。
我哋坐喺飯枱，面對面傾；我一邊說，一手遞上成績表。
阿媽：都算係同之前差唔多水準，繼續努力。
阿媽：不過你科Maths係咩事？失手呀？
我：係呀，不過我會DSE追返㗎啦。
阿媽：有時又真係人算不如天算。
我：你咁講係咩意思？
阿媽：一次失手，或者一科失手，咁我又唔可以就直接判你死嘅。
阿媽：我睇你整體嘅表現都係同以前差唔多，算係咁啦。
佢飲完一啖茶，又繼續說道。
阿媽：你又真係幾認真對待學業；但有時就係差少少運，唯一唔俾你數學靚grade。
我：呢啲嘢搏盡就無悔啦，唔好太多要求。
阿媽：希望你真係咁諗啦，唔好俾太大壓力自己。
阿媽：有時候理想諗嘅野，同你現實發生嘅野，係兩回事，你唔可以一尾諗到啲嘢有幾完美。
理想之中，我好希望Grace同我一齊讀中學。
理想之中，我好希望Kelvin可以經常陪我飲酒。
但現實呢？
媽：零用錢我就照規矩比你，阿媽下個星期又要返澳洲做野，生性啲喇。
我：嗯，我會再努力
媽：人算不如天算，你控制唔到結果。我地唯有平時多啲積陰德俾自己，唔好做違背良心嘅事。
因為我媽信佛，所以佢先會咁講，但我聽落又覺得幾有道理。因為曾經我也研究過所謂宇宙定律，其中一條講因果定律，亦係同我阿媽講嘅差唔多意思。點解我要堅持每個月將10%錢作慈善用途? 如是而已。