🏫 👩🏼‍❤仲講中學生「應否」拍拖？不如講下「如何」拍拖啦！🏫 【校園】【愛情】【鬥智】: Ch.3.3 人造•緣份?

---嘉里學校---

今日係嘉里學校嘅open day，在學校門口外面人山人海，個個都排隊等入場。

邱佩玲同佢嘅姨媽都在場等候。

姨媽：呢間學校聽講唔錯架，出年你就要喺度讀喇。

邱佩玲：間學校都裝修得幾型喎。





姨媽：所以我咪冇講錯囉，我地有良好條件，就梗係想你讀好學校啦。
(她微笑回應)

然後大家停頓左幾秒，姨媽先再講野。

姨媽：係喎，你今日開始返part time？

邱佩玲：係呀，喺個小學師姐介紹下，我入咗佢朋友新開嘅cafe度做。

姨媽：咁把炮？開鋪頭？




(她大surprise)

邱佩玲：係呀，間鋪名叫New age cafe，喺旺角鼓油街，我今日返6至10點，陣間完open day之後我就直接去喇。

姨媽：好，去旺角小心啲呀，今晚返黎再同我講多啲料。

----------

Anna Yu嘅舞團表演上，快樂嘅時光真係唔經唔覺就過去。





平均唱一首歌當你3至4分鐘，中間停下休息下鳩up兩句，咁就一個半鐘。

Sunflower舞團連續表演完十首動漫歌，而家終於來到尾聲，亦即係抽獎環節了。

「好啦，首先嚟一份五獎！」Yuki一手拎住個紙箱，另一手揸住個咪熱情地同台下嘅人講嘢。

「五獎係一個福袋連鎖匙扣。」Yuki說。

Anna負責伸手入去抽number，幾秒之後就拎咗張紙仔出黎。

Anna：25號！

台下有個超級肥仔中獎，然後行上去，個個人都拍曬手。

Yuki：恭喜你！我哋影返張合照先啦。





「一、二、三，笑。」

陸陸續續就抽埋四獎同三獎，然後輪到二獎......

「6號請出黎！」Yuki說。

今次係一個四眼仔中獎。

「恭喜你攞到我地嘅福袋，鎖匙扣、Sunflower T-shirt，你好幸運呀，你仲會得到我地嘅一set五張成員寫照呀！！」Yuki以興奮嘅眼神對住嗰個四眼仔講。

全世界例牌拍手。

睇個相貌又係一個毒撚。





「好啦，最後嘅頭獎精彩囉，呢位人兄會拎到我地嘅最・最・最終極全set寫照，一共十張限定！除咗最基本福袋鎖匙扣T-shirt之外，佢仲會同我地當場合照，而且佢仲可以揀一個我地嘅成員同佢親筆簽名！」輪到Anna講返野，以稍快嘅語速高興說著。

全場人都歡呼了。

我望望自己手上嘅飛，11號；David嗰張係12號，雨晴係13嘅，全部跟本按照買飛時嘅先後次序。

「就係⋯⋯就係⋯⋯」Anna一時望住張紙仔，一時又以扮神秘個樣望返我地。

見佢講下又唔講個樣，全場嘅人就更加心急。

「就係⋯⋯係⋯⋯11號！！！」

睇嚟，我嘅緣份或者真係出現喺Anna度。

但係當我準備出去領獎時，腦海入面諗返起幾日前我、Chris同David在canteen的對話。





「Issac，你覺得而家去示愛嘅話成功機會有幾高？」
「我真係好中意Anna呀！」

腦海中，浮現嘅係David一直以來又期待又失望嘅神情。

我猶豫一陣，然後⋯⋯都係讓比David，覺得自己唔應該同兄弟爭女。

結果將自己手上張飛塞落David隻手度，David原本想拒收。

David：下? 你真係唔要?

我：大好機會，好好珍惜啦。
(我正經地說)





Anna大嗌：有冇人11號呀？

我：係度呀！
(我捉住David隻手舉起大叫)

「仲唔快d去？人地催啦。」我稍為大力拍一拍David膊頭。

David有點支支吾吾，但最後還是出去領了。

「一、二、三」「喀嚓！」David上台領獎合照，今次全世界送上更激動嘅歡呼和掌聲。

儘管冇可能因為影一場相就會令Anna鍾意佢，但我只要見到David能夠親近Anna咁就夠喇。