🏫 👩🏼‍❤仲講中學生「應否」拍拖？不如講下「如何」拍拖啦！🏫 【校園】【愛情】【鬥智】: Issac的小學回憶(三)

老師安排下，小五呢年我每星期都會上跳舞班。就喺呢個下學期，一次嘅校際舞蹈比賽，讓我識到Grace。

其實我對跳舞冇興趣，但果時人生冇目標，人叫乜就做乜，好似交功課咁。

好記得呢一日係三月嘅最後一個星期六，我同我女拍擋去上環參加比賽，而呢位女拍擋係隔離班嘅同學，記得佢叫啊靜(我嗰時讀5B班，佢5C)。

為咗比賽，一個月前大家已經搵定partner夾team練習。由於我地學校嘅舞蹈班有分上堂班次，一班星期五上堂，一班星期六上堂，所以基本上我唔識星期五嗰班人。

而Grace正正就係星期五嗰班，比賽時見到。比賽當日，佢嘅partner就係同佢同班嘅啊杰(佢地兩個都係5A)。





真係好，今日嘅校際比賽我間學校就得兩對同學參與，一對Grace同阿杰，一對我同阿靜。

大會比賽舞係 A Whole New World(Aladdin)，我地表演完，就坐返埋觀眾台一邊睇其他CP，一邊等結果。

「接下來下一對參賽者請出場」評判當時講英文(我喺度翻譯)。

輪到Grace佢地出場，Grace當年同我差不多高，當時個樣喺我心目中10分入面已經有7.5分。佢嘅身材喺女仔之中已經算高(同當時相同年紀嘅女仔比較)，而家可能已經有170cm咁高，估計有model級身材；至於佢partner啊杰又係一樣高，同當時相同年紀嘅男仔比較，又係算高大。

睇見呢一對完美cp上台表演。Grace當時身穿粉紅色長裙，就好似晚裝典禮果種，修長嘅身材再加上佢嘅舞姿，更突顯她的婀娜多姿；至於啊杰當時上身穿白色恤衫，再搭上深藍色馬甲背心。





佢地簡直天生一對，一方面我覺得佢地唔做情侶浪費咗，另一方面我又少少鍾意Grace。5A班係全級尖子班，佢地讀書肯定叻過我呢個5B精英班。Grace樣又好，讀書又好，唔錯唔錯。

「I can open your eyes, take you wonder by wonder......」隨著音樂的奏起，呀杰扶起Grace隻手跳舞，然後佢地一齊黎個華麗轉身，嗰種感覺就直情結婚，讓人沉醉浪漫。估唔到，佢地跳得好過我同啊靜。

表演完嘅一刻，場上一片掌聲，我好想行埋去同Grace吹水，但喺心入面就係唔敢去。見到佢同咁好嘅啊杰一齊，我就唔忍心阻住呢對完美cp交流，而且我又唔知用咩開頭白好，明明大家唔識而又突然去搭訕會嚇親人。

小五果時，我冇咁大膽同女仔講野。

今日Kelvin都嚟撐場，呢個時候，我見到佢已經上前搭訕，佢地三個一邊返回觀眾席，一邊喺度咕嚕咕嚕唔知講咩。唔明點解Kelvin咁大膽，話咁快就佢地打交道。





之後嘅參賽者，儘管有人舞藝好過Grace，但唔知點解，我主觀上總係覺得冇人好過Grace，可能因為見大家都係同校，所以有一種主角光環效應，覺得要支持自己人掛？

這就是童話故事裡所謂嘅一見鍾情？我因為見到Grace人又靚，讀書又好，跳舞又好，嗰種型象就好似皇室富家女子，好受男仔歡迎。

比賽的結束，參賽者陸續離開。我同啊靜攞咗個參賽獎，而Grace同啊杰就攞左個銀獎。

我、啊靜、Kelvin、Grace同埋呀杰總共5個人喺會場門口吹兩句水。

「介紹比你地識呀，佢係我朋友Issac，佢今日同C班嘅啊靜比賽」Kelvin向Grace佢地介紹我。

我地五個喺度傾點解會黎比賽、舞蹈班趣聞、校園趣事，傾傾下又會傾到當年新game忍豆風雲、寵物小精靈，etc.

快樂嘅時間過得太快，行到附近一個巴士站大家就要道別，Grace話要學嘢，啊杰話去食下午茶，啊靜話要搭地鐵，結果得返我同Kelvin上巴士。

我：講真話，點解你今日黎睇我比賽嘅？




(我微笑問)

Kelvin：得閒得濟，咪過黎囉

跟住佢從褲袋度拎咗張紙仔出黎比我：送你地去相見！
(他帶點笑容說)

我接咗，原來紙上面寫住Grace嘅屋企電話同埋佢自己嘅email，Kelvin似乎知道我諗咩，原來頭先佢地三個喺度咕嚕咕嚕嘅時候就已經抄咗人地牌。

嗰個年代流行緊email。

呢一刻我覺得Kelvin係最了解我嘅人。

Kelvin：加油，等你好消息。





佢拍拍我肩膊給予支持，我也因此鼓起勇氣去搵Grace。

就係咁，我透過email識到Grace，仲記得第一次send email嘅果晚，電視播住一首歌叫「愛情轉駁」

「風輕吹紅裙調情 手機響鈴來留名
在沿路上 遇見到 動情在背影
為我你心跳人醉倒
感覺猶像浮游夢境國度
將你神暈兼顛倒」

因為跳舞，所以我相識了你，迷上了你，想去追你。

「轉駁感情可應該 充滿猜疑緣何來
但還是在 在等待 待情幻化開」

因為Kelvin，把妳和我都接駁在一起，只差大家的情感還未發芽。