🏫 👩🏼❤仲講中學生「應否」拍拖？不如講下「如何」拍拖啦！🏫 【校園】【愛情】【鬥智】: Ch.4.5 cafe小姐
時間9點鐘，成個場已經變得好靜，原本人聲蓋過了音樂聲，現在卻是播住英文歌，更顯然呢度嘅歐式文青cafe風格，濃厚到冇得再濃。
呢度得3個女仔睇鋪，兩個入廚房做野，唯獨我眼前嘅阿玲喺度抹緊檯。
「阿玲，方便傾兩句嗎？」我向佢揮手示意佢過黎，輕聲道。
阿玲：Issac？
我：你係咪讀緊書㗎？
我一針見血地問。
阿玲：係呀，點解你知嘅？
（半surprise，半怕羞嘅語氣)
我：我今日一嚟就已經覺得你個打扮我差唔多年紀，我見出面好多學生妹都係咁上下打扮。
(我微笑答佢)
阿玲：我今年中三
我：me too
David：你點解會黎打工嘅？
阿玲：哦⋯⋯其實我都係想體驗下打工生活啫，想唔靠父母零用錢嗟嘛。
(佢勉強笑住回答)
呢個女仔，一睇就知怕羞。
你一言，我一語，大家喺度吹水，互勵互勉，時間差唔多已經9點半，啱啱好兩個鐘埋單。
阿玲：多謝你地幫襯，我會繼續努力㗎喇。
(一個溫馨微笑)
最後由另一個女仔負責幫我地埋單，今晚盛惠98蚊，良心店舖，真係抵到爛。
各自散去嘅當晚，只有我同David順路搭地鐵⋯⋯我趁得閒就㩒入去FB。
David：喂，你真係有Anna嘅私人FB？
（低聲問我。）
我：係呀，佢真係用佢個private帳add我呀。
我：不過都冇咩特別，咪又係喺度放閃。
打開Anna嘅private FB，10個post入面有7個都係講佢同佢男朋友相處成點，其次當然唔少得港女style嘅自拍照。
相比起佢個public帳，呢個private帳嘅每個post嚟嚟去去都係得幾個人派like。
David：哦，咁算啦。
我：仲咩呀你？一知道佢有男朋友就對佢冇曬興趣？
David：咁有時候係要放手嘅。
David：學你話齋，我係要打定輸數嘅⋯⋯
我：不過如果你仲係想睇佢私人FB嘅，我都可以俾你昅下嘅。
我將電話輕輕申過去David度示意。
David：佢又會咁好死俾個私人帳你add嘅？
我：係我好彩啫，我講真又唔係靚仔，型過我嘅人大把。
（謙虛地說）
David接過我電話，然後八卦Anna私人生活；雖然佢明知已經冇可能，但都想望下兩眼。
諗返轉頭，如果唔係我識雨晴，雨晴又識Anna嘅話，我諗David十世都唔知Anna嘅private FB（至於受唔受add就另說了）。
一個idol（或公眾人物）用private ac加人係一件好少有嘅事，佢咁做九成都因為覺得你係信得過嘅人。
姑且唔講佢有冇男朋友嘅問題，如果你真想贏呢場遊戲，想做人地男朋友嘅話，就得兩條路：
一係，你同佢本身就識得嘅（例如小學同學、中學同學），而且一定係趁佢未成為「公眾人物」之前識，最後再將佢變成「公眾人物」。
一係，就「走後門」，你唔靠佢身邊嘅人際關係（例如你識佢父母、好姊妹），完全唔洗止意approach到佢，課幾多金、時間、精力都冇用（可能有啲用嘅，但就低過中六合彩嘅機率）。
正如我前面Ch.1.2集所講，追Anna呢個遊戲係完全冇遊戲平衡呢回事。除非你同佢一樣地位，都係公眾人物啦！
毒L成日喺度苦追FB女星、日本舞團idol、女僕cafe店入面嘅maid、什至講到去mk妹，交友app溝女；然後點知，轉個頭就發覺人哋已經有咗男朋友；呢個時候一定會好想問，個男朋友邊度彈出嚟？
咁我可以同你講，九成九都係來自於呢個女仔身邊嘅生活圈，唔好真係以為佢喺你哋呢班fans圈度搵；尤其是而家係講緊可能過百個人爭一個女仔，唔理你有幾高汁，佢都極大機會喺眾多個fans之中忽略你，已經唔係男唔男神、毒唔毒撚嘅問題，而係根本要知道：再親密嘅fans，都係次人一等，永遠親不過佢身邊嘅親朋好友。當然呢點唔係幾絕對，總有例外嘅人係真係成功得手，但試問得幾萬個之中得幾多個？
講到呢度，相信一定有人衝出嚟講：我用一大舊錢買起佢咪得囉？
好喇，就算你本身都有實力都好，問題係冇人會用埋呢啲咁冇效率嘅方法做事。
例如你可能話：我用10000蚊買起佢做我條女！
好喇，但而家問題係你有10000蚊會唔會咁洗？可能你簡簡單單喺學校圈識個女仔，然後用幾百一千陪佢食幾次飯，睇幾場戲，就已經直接得到佢個心返嚟，你仲有額外錢買iPhone添。
所以點解我會有「走後門」呢個講法。講嚟講去，你一開始選擇嘅起點已經錯咗。
由你選擇由「fans」身份開始追起，你已經輸咗9成，因為你要諗點樣由「朋友」戀成「戀人」之前，你仲要諗埋點樣由「fans」變成「朋友」呢關，亦即係你至少要過兩關，女神未玩你之前，你都已經玩死自己先。
我寧願你一開始直接喺現實識女仔，由「朋友」開始發展，咁樣追女仔快好L多倍；你要識得避開無謂嘅難關，唔好由「fans」開始。
David：睇完喇，俾返部電話你。
David：你都唔會追Anna啦？
David：睇黎，你都搵到意中人啵！
(奸笑著說)
我：我諗你都估到係邊個啦。
David：以你性格，你係唔會玩到個「層層疊」冧樓囉！
David：點都好啦，如果你出pool就恭喜你喇。
(佢變回平淡，帶著祝福嘅語氣)
平日玩世不恭嘅佢，我今晚罕有地見到佢用咁認真嘅表情祝福我。
我：真心鍾意呢間cafe，下個星期繼續？
David：好呀，照舊時間。
到站，我地各自揚鑣。
今晚我在人煙稠密的燈火裡，遇見到身在暗角一人的妳。