🏫 👩🏼‍❤仲講中學生「應否」拍拖？不如講下「如何」拍拖啦！🏫 【校園】【愛情】【鬥智】: Ch.5.2 白色情人節

放Lunch，我同David同行。

最近，全世界都係度講朗神。Canteen、操場、學校門口、走廊、課室都會聽到「譚家朗」呢三個字。

似乎，唔係純粹o day咁簡單。因為以我所知，嚟緊仲有個叫3.14嘅白色情人節。

我相信個個女仔都喺度計劃緊點樣送禮物/表白。

David：話時話嚟緊又係情人節啵，你諗住對嗰位cafe小姐有咩表示呢？





​我：我覺得可以送下小禮物

David：咁之後又點呢？

我：順其自然，我又冇可能迫人地接受嘅。

David思考左陣，然後又奸笑說：咪住，有冇咁順攤先？

David：你確定嗰位小姐到時喺度？你又冇佢更表。





我：所以我咪話順其自然囉，件事結果係點only god knows，我地身為凡人只要盡本份就要感恩喇。
我：而家，可以做嘅係⋯⋯度下到時送啲咩，著咩衫去，幾點鍾去，到時講啲咩說話，諸如此類。

今次嘅我，目標只需要同阿玲增進感情就夠，而家先識得佢唔夠一個禮拜，咁快表白嘅話，肯定破壞大事。

同自己講，自然啲，當平時朋友吹水心態就可以。

好多人可能俾電視劇集影響得太深，諗住情人節就係大好機會，但佢地十居其九都係平時冇做好同心儀對象升溫嘅動作，平時冇準備，又點可能成功？

呢點又係好多毒L表白失敗嘅死因。





未真正了解對方到入骨入肉就貿貿然拍拖，其實係一件好on9嘅事。貿貿然拍拖=貿貿然投資，你唔知間公司嘅背景，然後你就即刻放舊錢入去。後果係點？唔洗我講啦。

表白，係代表勝利嘅旗幟，而唔係作為衝鋒嘅號角。

打個比喻，水未滚，麵唔落得煮。未知對方係咪真係啱自己，唔拍得拖住。

從對方角度黎講，點解表白唔可以急？太急表白嘅話，對方會覺得你古怪，又或者會黑人問號，就算你係型男都好，人地心裡始終會O咀問你：你未真正了解我，你到底中意我啲咩？

如果係你主動表白=比條女主動權，係隨時會食「好人卡」。我係條女一聽到，就會將「I love you」翻譯成一條YES/NO問題：我要不要選擇你？

好明顯見到，作為男方嘅你已經俾人牽住鼻子走。

所以真正嘅溝女高手，係唔會一嚟將人軍抽車。表白事前一定要有足夠嘅關係基礎，只有做足鋪排，先可以ensure自己最後十拿九穩地成功。





甚至，唔洗你自己去表白，女仔係吸引返黎，唔係追返黎。你能夠令到對方局住要簡你，咁你就贏。與其諗表白，不如平時嘅你諗下點樣增值自己。簡單講，憑咩野要條女揀你？

星期四, 放學黎路過一個小檔攤。

「靚仔，買返份小禮物呀」一個貌似30幾歲嘅女人對我說。

一罐罐小玻璃放置在檔攤的桌上，靈機一動，我已經諗到送咩禮物了。

精緻嘅小玻璃罐放在我眼前，呢個玻璃罐，細細枝，大約一隻手指咁嘅size，以軟木塞作為封口，而且樽口上繫上了一條紫色線帶。

至於玻璃罐入面，買嘅時候裡面已經有少少淺紫色嘅乾碎花。

點解我最後揀佢？因為我覺得細細地嘅玻璃罐，可以象徵祝福同願望。

聽講有人試過係玻璃罐入面放入用紙寫好嘅願望，然後將成個罐拋落海度，意義上同放孔明燈差不多，係為咗許願同祝福。我覺得都幾有意思，就當係賦予阿玲一種祝福吧！





唔⋯⋯不如再加埋親手畫一個公仔，咁樣就更加突顯份禮物嘅心思。

我係屋企用15分鐘去製作呢份「3.14禮物」。

搵一張淺藍色，細細張而且有少少厚度嘅紙仔，用黑色水筆寫上 「願望成真❤」(當然水筆冇過底)

至於公仔畫咩好？

諗咗一陣，就反轉背面，一邊開住電話search 「美好世界 維茲」，望住嚟畫。點解畫佢？因為我見到紫色，就諗起維茲店主，諗到乜嘢cute就畫乜。

由於我畫功其實好一般，所以我都係畫Q版，簡單、細粒、易畫，冇咁多輪廓同埋比例上嘅嚴謹要求。

畫好維茲，上少少簡單顏色，最後我就將寫好畫好嘅紙卷起，塞入罐內並蓋上木塞。





好，攪掂！

專注於學業生活，不知不覺又黎到星期六，既是學生哥休息日，又是白色情人節。

今日我嘅出街裝扮係一件灰色牛仔jacket，同埋黑色fit身長褲。

David：你覺得你嘅如意算盤打得成？

我：我有信心打得成，阿玲今日會係度。

點解我有信心？就係因為我相信塔羅牌比我嘅結果，今朝早，我為自己求得一張「權杖一」。