女神呢個稱號令我食左唔少仔(有甜）: 中秋節快樂

過左一陣之後就到下白泥，已經有唔少人一早就黎左。

我同佢搵左一個位坐低，然後望下身邊嘅人。

有一家團聚嘅親人、有浪漫溫馨嘅情侶、有推心置腹嘅老死、亦都有唔少嘅人拎齊架撐黎影日落。

我望住呢啲人，有啲只係坐係到傾計，有啲係到玩水玩沙，有啲係到打車輪。

唔知點解我好羨慕佢地，好想身邊都有一個，可以陪我親近嘅一個人。



一個人可以開心，但兩個人可以更開心。

阿傑：「諗緊啲咩呀？講比我知。」

當你渴望更多野嘅時候，卻忘記最美好嘅野，一早已經出現左係你身邊。

我：「無呀，諗緊點解你咁靚仔咋嘛。」

阿傑：「我不嬲都靚仔架啦，又有個靚女做女朋友，啱啱好。」



佢伸隻右手攬住我膊頭，錫左我塊面一啖。

我：「其實我話我應承你個刻，你有啲咩感覺？」

阿傑：「哦？聽到個一秒係好驚訝，唔敢相信你真係應承我囉，以為自己發緊夢。」

我：「咁就唔好醒，比呢個夢繼續發落去。」

阿傑：「由第一眼見到你個陣時，我已經鍾意左你。」



我：「係咩？乜呢個世界有一見鍾情呢啲咁兒戲嘅野咩？」

阿傑：「我都覺得好兒戲，但係感情唔會呃人，係你先比到個種好心動嘅感覺我。」

我：「我咩都無做過喎。」

阿傑：「你唔明架啦，有時一個人咩都唔做，反而先係最吸引人。」

傾到咁上下，個日落都開始同我地Say Hello，於是我地拖住手咁行前少少。

日落呢樣野，無論睇幾多次都係一樣，會令到人好感慨。

我個腦唔知點解諗起《盛夏的舞》。

如再記起


舊日共你躲進窩裡飛
落日伴我親你欣賞你
曾一起 傻的你

我望一望阿傑，只係見到佢一直望住個日落，好似諗緊野，然後微微一笑。

呢個男仔傻得黎又真係好Charm。

你問我對佢其實有無心動過？無嘅話我都唔會比機會佢同我一齊。

我忍唔住了，我上前咀落佢個嘴到。

佢比我嚇親，但係好快就攬住我，呢一刻我覺得自己好幸福。

我：「我愛你。」



阿傑：「傻妹，我都愛你。」

睇多一陣之後，我地就準備返去食野。

走左先發現我地無影到相，不過都唔緊要。

最珍貴嘅野，一直都需要用雙眼去見證，而唔係用相黎證明。

相，的確可以用黎睇，再回顧返當時嘅情況畫面。

但係眼，卻能夠把那段回憶烙印在人的腦海，呢個就係點解回憶咁值錢，或者講係用錢買唔到嘅野。

因為稀有，所以珍貴。隨時可以睇得返嘅野不叫回憶，而是記錄。



食完飯都成夜晚十點半，佢送左好多野比我。

當然，佢最後送嘅野，就係送到我去巴士站，因為佢同我都住得幾遠，所以我唔洗佢送到上門。

我：「我今日好開心呀。」

阿傑：「你開心就好啦，只要能夠令到你開心，就算要我失去全世界，我也願意。」

我：「口花花啦你，不過多謝你呀。」我上前錫左佢一啖。

阿傑：「唔洗多謝，你係我女朋友黎架，講多謝搞到好似我同你只係朋友咁。」

我：「好啦好啦，有車啦，你都快啲返去啦。」

阿傑：「嗯，小心啲呀。」



我行到去上層，再係個窗到望落去。

佢不斷對我飛吻，雖然聽唔到佢講乜，但係我都知佢講緊我愛你。

我：「我都愛你。」

那破碎的心再一次被人修補，那停頓的心再一次跳動，那冷漠的心再一次融化。

我望住戴係隻手嘅戒指，隻戒指係佢送比我嘅。

雖然只係一隻幾十蚊嘅假戒指，但係千里送鵝毛，禮輕情意重。

「希望你唔會死」