女神呢個稱號令我食左唔少仔(有甜）: 排斥

蔡煒燕其實無寫過書，我講嘅書，只不過係我將佢嘅經歷寫哂落去，佢嘅人生已經夠慘，如果無人知道佢曾經存在過，咁仲慘。

「真正的死亡不是生與死的分離，而是被活著的人遺忘。」

不過我無比佢地睇過，既然蔡煒燕都唔想佢地記得自己嘅話，咁我應該都要跟住佢嘅心願去做。

另外我想同大家講一樣野，我一直都好唔明白，點解女仔係好鍾意排斥女仔，而男仔就比較少排斥男仔。

自從我變左做女神之外，我就發現我身邊好多人都慢慢咁離開左我，除左思思之外，我可以話係一個朋友都無。



女仔A：「咁你係女神呀嘛，我地又唔靚，廢時一陣同你玩，我地會比人話整衰你嘅形象。」

女仔B：「咪係囉，同埋我地都高攀唔起你，你係地位最高嘅女仔，基本上個嗰男仔都鍾意你，而我地只係低下層，都無人會留意我地，試問有錢人得唔得閒去理一個窮人呀？」

女仔C：「最重要嘅係我地受夠做綠葉，對唔住。」

哈哈，可笑，多麼可笑，我諗唔明白，我到底做錯左啲咩，所以啲人話「強者總是孤獨的」就係咁解，佢地唔抵得你勁過、靚過、高過佢地，所以佢地就Bully你。

被排斥嘅感覺一直都唔好受，想得到人地嘅認同，反而令到自己受到嘅傷害更加多。我只係覺得，點解每個人都要咁有機心，簡簡單單做個朋友唔得咩？



所謂人心，就係呢個世界最恐怖嘅野，永遠都無辦法睇得清嘅野，人與人之間嘅關係，就係一場又一場嘅遊戲，邊個動心邊個認真就邊個仆街。

我：「點解我地識人要不斷講大話？點解我地就唔可以講真話？」

蔡煒燕：「你有無睇過V for Vendetta，佢入面有一句講到「藝術家用謊言製造真相」，咁你明唔明？」

我：「姐係我地係藝術家？我唔明喎。」

蔡煒燕：「你要明白，呢個世界充滿嘅，唔係愛，而係謊言，每個人都係違背良心咁講每一句說話。」



蔡煒燕：「個規則就係咁樣，你唔跟住黎做你就輸左一大半，只有識得講大話嘅人，先識得睇透真相。」

蔡煒燕：「至於點解人唔講真話？係因為人係自私嘅生物，所謂將心比己從來都無人做得到，個嗰都只係得個「講」字。」

曾幾何時，我都仲相信人與人之間可以好簡單。亦都係曾幾何時，我對住唔同嘅人會戴上唔同嘅面具。

阿傑：「你做緊啲咩呀？」我無諗過上次比我玩到咁樣，佢都仲夠膽搵我。

我：「無呀，聽緊歌咋嘛，你呢？」

阿傑：「我係到掛住緊你囉。」

我：「又掛住我？咁洗唔洗比個衣架你掛住我？」

阿傑：「要呀，等你以後都無得離開我，去到邊都跟住我。」



我：「其實我唔明我有咩咁好，令到你鍾意我咁耐都唔放手，乜對住一個根本唔鍾意你嘅女仔都咁堅持，真係值得咩？」

佢已讀左，但係隔左五分鐘先覆返我。

阿傑：「我會答你，呢一切都好值得。」

阿傑：「愛情比人一種強大嘅力量，願意為自己鍾意嘅人付出自己所有野，即使你對我一啲感覺都無，我都覺得好值得。」

我：「曾經我以為愛情係一樣令人沉醉嘅事物，但係直到宜家，我已經搞唔清，我連愛係咩感覺都唔記得，就好似從我嘅人生消失左。」

阿傑：「係因為咩事，令到你覺得自己無左愛嘅感覺？」

我：「你真係想知？」



阿傑：「係。」

我嘅回憶返到去我啱啱升到中一嘅時候，出現左一個令我又愛又恨嘅男仔，而個嗰人，唔係蔡煒燕。

「遇見你是我一生中最好的福氣」

原來你嘅福氣，係由我一次又一次悲傷累積而成。