女神呢個稱號令我食左唔少仔(有甜）: 鷹

唔知大家有咩聽過一樣野，如果無聽過嘅話，咁我做講比大家聽。

「排球係狗公嘅聚集地」

因為好多女仔都鍾意打排球，作為狗公，又點樣可以唔埋堆先，當然我唔係講緊鍾意打排球嘅男仔。

至於我呢間學校，大部分打排球嘅男仔都係狗公咁解，可以睇到佢地為左同啲女仔有身體接觸去到幾盡。

唔知點解有啲女仔又真係會比佢地哄到，明知佢地係狗公都會鍾意佢地，所以你地睇到，愛悄就係咁兒戲，令人對一切盲目。



不過我自己就唔太鍾意打排球，又或者咁講，我除左跑步之外，基本上都唔會做運動，所以我做唔到運動女神，呢個名就比左思思。

但係有時我都會係走廊到望下佢地，得閒睇下排球，得閒又睇下籃球，雖然都無乜靚仔，但係你都知係學校無乜野做架嘛。

宜家我又係到睇緊人地打波，其實我係到發緊白日夢。

男仔：「諗緊啲咩？係咪又睇中左邊個？」突然有把聲係我隔離出現。

我：「嚇死人咩你，咦...？係你呀...」我無諗過叫自己做鷹嘅黑眼男仔就係我隔離。



自從上次見到佢之後，我地解開左心結，我幫蔡煒燕同佢Say左Sorry，佢亦都原諒左我地，同埋唔會再搞我。

鷹：「我黎只不過係睇我家姐。」佢家姐就係丘以男，宜家係到打緊排球個嗰。

我：「咁不如我地落去同佢講下野囉？我諗你都想同佢Say個Hello掛。」

鷹：「咪搞我，我見到佢宜家過得咁開心就夠。」

我：「車，唔好咁八婆啦你！！」我捉住佢隻手，然後拉住佢落去。



鷹：「喂...唔好啦...」佢雖然口裡說不，但係身體一啲反抗都無，就咁比我拉左落去。

以男好快就見到我地，仲好熱情咁同住我對揮揮手，叫我地行過去。

我：「唔阻住你呀嘛？」

以男：「唔阻唔阻！！係呢，呢個係邊個黎？點解唔係著住校服嘅？」

鷹一時唔知點答，只係dup低頭，估唔到殺過咁多人嘅佢，都會有怕羞嘅一面。

我：「佢係我男朋友黎架，佢今日特登偷偷地入黎學校，話要比個驚喜我喎。」我講完仲要錫左佢塊面一啖。

佢本身想屌我，但係佢家姐宜家係前面，又無辦法解釋，所以惟有配合我，錫返我一啖。

以男：「好啦好啦，咁我唔阻你地兩人世界啦，趁仲有時間去拍下拖啦。」



然後佢就繼續打排球，我同鷹就上返課室。

鷹：「你做乜撚野呀！！話我係你男朋友？！！」佢一野將我壁咚係坢牆到，都有啲痛。

我：「唔得咩？你知唔知幾多人想做我條仔呀？宜家係你執到寶啦。」

鷹：「嘖，我先唔要呢啲咁嘅垃圾。」佢鬆開隻手，轉過身就係個窗到飛走左。

我就唔信佢真係咁難得到手，我就唔信佢對我一啲感覺都無，我就唔信佢唔鍾意我。

再冷酷嘅人都會有心軟嘅一面，再高傲嘅人都會有認低威嘅一面，再無情嘅人都會有感性嘅一面。

我唔知咩係愛，亦都唔知自己係咪鍾意左鷹，我只係覺得佢好神秘，我好想打開佢心入面個對門。



愈係得唔到嘅野，就愈容易令人諗起。愈係得唔到嘅野，就愈令人想得到。愈係得唔到嘅野，就愈比人有動力去挑戰。