女神呢個稱號令我食左唔少仔(有甜）: 多謝

迪迪：「其實...我好多謝你今日願意同我出黎...」佢dup低頭，唔夠膽直視我咁講。

我：「點解咁講呀？」

迪迪：「我一直都覺得...我呢啲咁嘅毒男...根本就無資格同到一個靚女出街...所以...我好多謝你完成左我呢個願望...」

佢忍唔住喊左出黎，於是就係褲袋到拎包紙巾出黎，係我面前好努力咁抹走哂啲眼淚。

我咩都無講，只係行上前去攬住佢。擁抱，往往都係最安慰到人嘅方式。



佢比我呢個舉動嚇親，嘗試鬆開我，但我一直都用力攬實佢，最後佢都攬住我。

我：「呢個世界根本就唔需要講啲咩資格，願望一直都係自己掙取返黎，唔相信自己得嘅人，咁佢一世都唔會得。」

從來唔係有天賦嘅人先有資格實現夢想，從來唔係有錢嘅人先有資格結婚，從都唔係靚仔嘅人先有資格同女仔出街。

我：「我只係覺得，我地唔應該比世俗嘅眼光所局限，點解人地覺得自己係廢青就要認定自己係廢青？點解人地覺得你唔靚仔你就要無自信？」

我：「命運一直都係由自己改寫，只係你肯唔肯踏出改變嘅第一步。」



我講完之後，佢就喊到收唔到聲，我諗我可能係第一個同佢講呢啲野嘅人。

迪迪：「多謝你...」佢鬆開我，對我講句多謝。

我：「唔洗，比啲自信自己啦，人最重要就係有自信，唔好成日覺得自己唔得。」

迪迪：「我會架啦...多謝你講左咁多野比我聽...」

呢個時候，咁啱比我地睇到日落，每次見到日落都會有一種好溫暖嘅感覺。



太陽準備離開，把整個天空都變成金黃色，像是臨別前給我們一個窩心的祝福，暖透每個人的心。

迪迪：「我地以後仲可唔可以約出黎？」當我正係到諗緊太陽係到著緊草嘅時候，佢問我。

我：「唔啦，今日一次就夠架啦，你已經唔需要我。」

安撫人從來都唔係我做開嘅野，無諗過平時只係識傷害人嘅我，居然會幫左個毒撚。

迪迪：「嗯，就算你唔想聽我都要講，今日真係好多謝你。」

我：「夠啦夠啦，我唔習慣人地對我講多謝，而且我都唔想見到你比自卑困住姐。」

迪迪：「係呢，你宜家有無男朋友？」

我：「做咩咁問？想溝我呀？」叫佢有自信啲，宜家搞到佢真係太有自信。



迪迪：「係呀，咁你受唔受溝？」

我：「唔受喎。」

張愛玲：「這世界上有那麼許多人，可是他們不能陪著你回家。」

我搭緊車睇緊IG嘅時候，突然見到有人WTS我，我睇一睇個名發現原來係阿傑。

我曾經睇過一本改變左我好多嘅書，佢話覆人地訊息嘅時候，唔可以秒讀，要等「最基本嘅兩分鐘」。

雖然佢入面無講點解，但係我每次都係跟住佢講嘅兩分鐘咁去覆啲男仔，不過思思個啲我唔會咁做。

阿傑：「你係到做緊啲咩呀？我有啲掛住你。」



我：「思念只係人無聊想同其他人傾計嘅一個藉口，不過我宜家只係搭緊車返屋企。」

阿傑：「哈哈，Btw你今日出左街呀？去左邊到玩？又唔叫埋我。」佢就好似蔡煒燕一樣，人地出街玩會問人地點解唔叫佢，就算係普通朋友佢都會咁做。

我：「我同人去左觀塘玩。」

阿傑：「同邊個？男定女黎？」

我：「我同邊個出街關唔關你事先，你又唔係我邊個。」

阿傑：「因為身邊有個男仔，我會對你皺眉。」

我：「車~」搞到我忍唔住唱左下一句出黎，問我做乜離開 因為你係我隻米妮。

阿傑：「咁你一陣都無野做架啦，不如同我食餐飯好唔好？」



我：「都得，不過有咩理由要我應承你先~」

阿傑：「個理由咪就係我鍾意你囉，收唔收貨？」

我：「但係我唔鍾意你喎，咁都係唔食啦~」

阿傑：「咁呀...當係我求下你啦，可憐下我呢個無朋友嘅人啦。」

我：「哈哈傻仔，好啦好啦，一陣見啦。」

阿傑正如我之前所講，佢係一個靚仔，身邊都有好多女仔，但係佢一直都無理過班女，一心只係將個心放落我到。

之前我唔明白點解一個人可以咁專一長情，明明身邊有咁多選擇，但係惟獨是只著於一個人，佢地嘅「愛」係有幾勁。



不過宜家我明點解，就好似食白飯一樣，明明有麵、米線、通炒咁多選擇，但係我地始於都係鍾意食白飯。

鍾意左一樣野，唔係咁容易就抽到身，尤其係將自己所有野都放係一個人到，未得到個嗰人之前點都唔會死心。

蔡煒燕：「如果愛一個人之外，仲可以比其他人引誘到，咁呢啲唔係叫愛，呢啲係想一得二，想二得三。」

愛係會比人一種堅定嘅意志，愛一個人就淨係愛佢，如果你拍拖嘅時候仲會愛其他人，證明你根本就達唔到愛嘅境界。