女神呢個稱號令我食左唔少仔(有甜）: 約會

好多男仔都會因為女仔個樣靚或者隻腿長而將佢當做自己嘅女神，但係呢啲都只不過係一啲好膚淺嘅野黎。

真正嘅女神唔係咁簡單，唔係話你樣靚身材正咁就得，呢啲唔係叫做女神，呢啲係比人當係打飛機嘅對象，就好似成為左AV女主角一樣。

蔡煒燕講過：「一個男神或者女神，最重要嘅係佢地個心，一定唔可以有任何淫氣，你要話比人聽，我就係最乾淨、天真、可愛、活潑嘅女仔黎。」

可能你地會覺得我只係一隻鍾意搞野嘅臭雞，但係你地咁諗就太天真，我嘅形象係班男仔心目中一直都係最高尚嘅存在。

今日係星期六，諗住由朝訓到晚嘅我，比人係咁打電話過黎嘈醒左，搞到個人一朝早就燥燥到。



我：「喂...邊個呀...？」我半醒咁接電話，隻眼仍然瞇埋。

迪迪：「我...我係迪迪呀，Sorry咁早打比你...嘈醒你真係唔好意思...」

我：「唔緊要啦...唔醒都醒左...你打電話過黎做咩呀...？」

迪迪：「我想...我想...我想問你今日得唔得閒同我出街！！」佢好似儲左兩下氣再一野爆左出黎，我差少少就耳聾。

我：「哦...好啦...咁一陣見啦...」講完之後，我就攤返係張床到繼續訓。



可能比佢嘈一嘈，搞到我點訓都訓唔返，於是我惟有死死氣咁起身，刷完牙洗完面之後，我出到去個龐到，但係唔見燕嘅家姐。

我諗佢應該去左返工，其實我覺得佢都幾慘，連無左個細佬都唔知，仲好天真咁渡過每一日。

不過有時啲野就係咁，你會寧願直接失去個段記憶，但唔想成日都諗起佢，搞到自己難過。

既然對自己重要嘅人都已經唔係到，咁留住同佢一齊嘅記憶黎做咩？

回憶從來都只不過係過去嘅事實，即使過左好耐，佢點會留係你個腦到，就算係一段悲痛嘅回憶都係一樣。



我沖好涼之後就出發，今日嘅我著左件Oversized嘅白色衛衣，同埋一條短褲，比人個感覺就好似同無着褲無分別。

到左之後，我見到佢著左件黑色嘅Nike衛衣，條褲都係Nike，對白色波鞋都係Nike，總之咩都係Nike。

同埋只有唔識打份嘅男仔先會將自己着到全黑然後一白。

我：「好耐無見啦迪迪。」我成身咁打量左佢一下，老實講就咁睇真係成個毒撚樣，尤其係佢個副眼鏡。

迪迪：「好耐無見啦Emily。」我無諗過佢會用返我句野黎答返我。

我：「咁你今日諗住帶我去邊呀？」我微笑咁問佢。

迪迪：「一陣你就知！！」原來毒撚都識得玩神秘。

佢話開始今日嘅行程之前要食個飯先，咁就最好不過，因為我朝早咩都無食過。



迪迪：「係呢，識左你咁耐，都唔知你平時鍾意做啲咩添。」

我：「哦？我平時鍾意係屋企畫下畫，睇下書咁囉，你呢？」

迪迪：「我呀...我鍾意...打機...」佢細細聲咁講，好似驚我覺得佢係一個廢青一樣。

我：「係呀？其實我都好鍾意打機架！！不過...平時都無乜人同我玩囉...啲女仔又話唔鍾意打機...」

迪迪：「咁...不如我同你一齊玩？」

我：「好呀好呀！！」

認同人地嘅興趣係最緊要，你要將人地嘅興趣變到好似自己嘅興趣一樣，但係又唔可以太過盡。



我：「不如我地AA比好唔好？我見到將單都幾貴。」

迪迪：「唔洗，我比哂就得啦。」

我：「會唔會唔係幾好呀？而且我有帶夠錢出黎呀，你唔洗擔心我。」

迪迪：「好少錢姐，我比就得啦。」

我：「咁...多謝你啦。」我笑一笑，點點頭，咁就可以變做Oreo。

食完飯，佢都未同我講我地會去邊，而我只係一直同佢並排咁行，咁樣做，正常人都會覺得我地似係男女朋友。

行左一陣，我終於知道佢帶我去邊，原來係觀塘嘅海濱花園，唔知點解咁啱又無乜人係到，得我地兩個。

我望住個海，我聽人講，人嘅一生就好似個海，你平時睇落去好似平平無奇，但係當你用心咁留意每一樣事物，原來你嘅人生都係好靚。



大海之所以令人沉醉，係因為佢平時睇落好似好靜，但係佢一活躍起黎，連商場都可以沖走。

人生之所以獨一無二，係因為人類嘅人生好似好悶，但係出現刺激起黎，人連命都可以唔要。

我：「呢到好靚呀，你專登帶我黎呢到架？」

迪迪：「係呀，我上網聽人講呢到可以見到成個海。」

我行近條欄杆，瞇埋對眼，感受風兒向我塊面舞動，聆聽水淺出嘅聲音，最後唔少得嘅，就係吸收新鮮空氣。

當我拎轉身諗住睇下佢做緊咩嘅時候，原來佢係到偷拍緊我。

迪迪：「Sorry呀，一時見到你咁樣好靚，所以忍唔住影低左落黎。」我望一望張相，又影得幾好。



我：「唔緊要啦，記住Send返比我就得啦。」

然後我就繼續望住個海，海真係會令人睇上癮，睇到不能抽身。

「唔知黑眼男仔宜家係邊呢？好想再見多佢一次。」