我要逃出無人島沙洲！: 第五章 左吉右凶

成晚失眠，我諗其他人都係啦，我地咪都係訓喺沙灘等天光。總算訓咗陣，至少上次張開眼，天係全黑，今次見到少少太陽。打開部iPhone，顯示係6:30a.m.，決定起身算數。

我:「嘩！原來學霸同Tany已經起左身？」
Tany:「成晚瞓唔着，所以咪同佢傾對策。」
學霸:「等福仔佢地訓醒，我再講planning ，橫掂天都未光哂。」

去到8點左右，米通都醒左，我決定嗌埋福仔起身。

我:「好，人齊喇，學霸有乜方法？」
學霸:「而家船夫信唔過，我地d乾糧都食哂，惟有盡快逃出去。游水係唯一辦法，要喺仲有體力嗰時盡快出發。」




Tany:「我體力冇問題，但係香港係邊面？」

我望下周圍，發覺左邊同右邊分別有兩個島，大細同距離都差唔多。

學霸:「我地所見嘅兩個島，一個係屯門郊區，另一個係大陸，但邊個打邊個我唔清楚，我副修冇地理sorry guys。」慘啦！我地又陷入另一個危機，揀啱就平安歸家，揀錯咪非法入境？天啊，救救我！

我地討論咗一陣都冇結論，而最後因為「左吉右凶」嘅理由，決定去左邊嘅島。臨出發前，發現原來仲有一個問題未解決。

Tany:「就咁游過去，衫褲濕冇計，但係我銀包有幾張金牛喎…」
福仔:「我仲有法寶！」佢喺袋入面拎左個食物密封袋，救星啊！最後我地將各自嘅身份證、錢、信用卡同電話放入去，諗住捉實嚟游水。





學霸:「我地整裝待發，而家10點正，起步游水。大家要頂住，幾公里就到。」說罷，我地勇敢跳落水，向左邊小島進發，大家意志堅定，希望幸運之神將我地送去屯門。