我要逃出無人島沙洲！: 第三章 島上的山

(繼續係遊記orz)

第三章
大約半個鐘，我地都唔再肚餓，福仔背囊入面啲食物亦清咗七八成，係時候返碼頭喇！

學霸:「咁我地行山返去！Tany你帶頭，不過唔好行咁快。阿文同米通行中間，我就殿後跟住福仔。」
米通:「好呀，不過福仔夠唔夠力行？」
福仔:「冇問題掛，慢d實得。」

起程！過番連島沙洲，就沿山路行上去。上山條路唔算易行，因為係斜斜地嘅泥路，行太快會跣低。




Tany:「落山都係咁嘅泥路？上冇所謂，落我唔帶頭碌落山架！」
學霸喺後面大嗌:「緊係唔係，落山係平坦嘅石屎路，唔使怕。」

講下講下，原來已經到山頂，估唔到連福仔都勉強跟到大隊喎。山頂有個好大既白色波波，原來係雷達站。景色雖然俾樹遮咗少少，不過都見到四周嘅海景。

福仔:「你地唔攰咩，仲唔飲水，我飲哂成支喎！」
Tany:「吓…先行咗15分鐘，我落山先諗住飲。」
我:「雖然呢度唔算太高，但係居然有靚靚海景。」

米通好似發現咗乜野，好驚訝咁望住遠邊嘅海。哇！原來係一條海豚，仲要係粉紅色。




我:「中…中華白海䐁呀！」
Tany:「係噃，我應該第一次見。」
學霸:「冇錯，呢個係瀕危品種，以前沙洲係超常見，而家先見得一兩條…」
福仔:「最衰係d人破壞海洋生態。」

做乜搞到好似生物堂戶外考察咁樣？不過今日又真係上咗寶貴嘅一堂，唔去唔知大自然係咁美妙。最後一個景點都去埋，影完張大合照就走人lu。

「1，2，3，yeah!」落山條路又真係容易好多，三星级變一星級，原路上落會輕鬆唔少，不過我地鍾意挑戰！唔使一陣就落完山，已經番到碼頭喇。好，旅程完左，望望手錶:「2:05p.m.」，到咗上船回程時間，但係點解架船未嚟？