那些年，我等待的那個男孩子: 54

自從Jonathan騷動之後，我嘅生活回復平靜，而所謂嘅平靜，就係每日不停上堂、操past paper、補課、溫書，一星期做足七日咁滯，連一向體力充足嘅Ivana都嗌哂救命
 
其中一個星期五放學後，終於忍唔住，要去海邊自己一個坐低休息下，雪晴好識做，自己返屋企做功課先
 
我真係好辛苦好辛苦呀!!!!當日我坐左係海邊係到喊，雖然ba b話我讀唔讀到書都冇所謂，只要我唔行差踏錯、嫁個自己鍾意、對我好嘅男仔就得，但係我自己唔係咁諗呢，我係連續11年全級第一加模範生(拿…我唔打算加入政府架…唔好對號入座)，如果失手嘅話，會有好多人失望，自己老師、同學等等…所以我經常迫自己做到最好，最近仲開始瞓得唔好，所以我好大膽咁做左第一件犯法嘅事，我上網查左安眠藥名，再係診所用電腦打左張醫生紙，再冒簽左ba b個名同吸左個醫生印，去左藥房到買安眠藥
 
我竟然第一次做呢d事，係刑事罪黎…俾人發現就一世架啦，會連累到ba b架…林雪凝…點解妳要咁做…
 
我自己不停係到喊…你去左邊呀!!!又話會保護我，又話會娶我嘅!!!
 




我愈喊愈大聲，然後，就有隻手摸我個頭，再遞包紙巾俾我
 
「唔該哂你」我仍然係到嗚咽緊嘅時候，我先知道，我俾人發現左我嘅罪行
 
「同學，麻煩妳將頭先買到嘅野拎出黎」
 
我聽到佢咁講果時，突然個身流出冷汗，正想轉身望後果陣……
 
「眼望前面，將妳得到嘅野拎出黎」佢把聲好有威嚴，可能…真係警察…或者海關…
 




我手震震咁將樽安眠藥拎出黎…
 
「安眠藥喎，有冇醫生紙呀?」
 
「有…有…」我將果張假醫生紙拎出黎俾後邊嘅人睇
 
終於忍唔住…大聲喊出黎
 
「張醫生紙係真嘅，同學，唔好食太多知嘛」
 




「知…知道啦」
 
「可能有個人同妳而家一樣咁辛苦咁努力緊，唔好咁易放棄」
 
「知道…」
 
「妳而家合埋眼，數100聲，然後打開眼啦，樽藥我放係妳旁邊」
 
「知道…」
 
我依佢講，由1數到100後，我再打開眼，望一望身邊樽藥，已經換成一筒糖，而糖上邊貼左一張紙，我睇完之後，眼淚不停咁流出黎，紙上寫嘅野令我喊左好耐
 
「唔好放棄!細個妳請我食麵包，而家我請妳食糖啦!食糖補充糖份會精神多好多架!妳食太多安眠藥對身體唔好架嘛!微波爐」
 
係佢…佢認得我…佢知我係邊…原來佢一直都係我身邊，而且…佢仲係用我送俾佢果枝parker筆寫俾我，我拎住佢送俾我筒糖喊左好耐後，自己返屋企邊食糖邊溫書，果然好左好多，夜晚仲瞓好左，然後星期一，我第一次俾Miss孔叫去訓導處…..