那些年，我等待的那個男孩子: 45

不知不覺我地兩個慢慢行到返屋企，Jonathan好有風度，佢會幫我拎野之類，其實佢真係一個好男仔黎，我都開始有d心動，如果佢即時開口同我表白，我相信我會立即應承做佢女朋友架，我個心一直撲撲撲撲咁跳，等緊佢開口，但係到屋企樓下佢都冇出過聲。
返到屋企攤係床上，我立即放鬆左，究竟我係想同佢開始丫，定係唔想呢
 
「家姐家姐!!!」
 
「嗯?做咩事呀?」
 
「頭先果個係妳男朋友?幾好咁喎」
 
「邊…邊到係呀…妳見到d咩呀?」




 
「唔…我見到妳地兩個行到好埋咁返屋企囉，但係又未到拖手階段喎」
 
「總之佢唔係我男朋友啦」
 
「咁書檯上果張相呢?果個男仔係妳小學畢業果日同家姐妳……嘻嘻嘻嘻……」
 
雪晴嘅記憶力真係好，咁多年前嘅事佢仲記得，唔怪得佢成績比我更好
 
「妳咪理啦，總之妳家姐我冇拍拖」




 
「只不過係有個男仔追緊者，佢邊間學校架?」
 
「佢DBS嘅……住九龍太子道果邊」
 
「嘩!!家姐!!!人家有錢仔喎」
 
「呢個先係問題，妳唔係唔知妳家姐我唔鍾意有錢人」
 
「錯啦家姐，妳唔係鍾意有錢人，妳仲係鍾意果個哥哥，我K2果時抱起我果個」




 
「妳…妳咁都記得!!!」
 
「我仲記得佢有個家姐同妹妹添」
 
「係家姐都契妹」
 
「咁家姐妳小心D啦，D契妹一定係鍾意D契哥嘅，特別係呢D青梅竹馬嘅契兄妹」
 
我好快咁轉身望住雪晴「妳講真架!?」
 
「總會係咁嘅劇情嘅」
 
的確，我同Jonathan係close左好多，我都承認開始對佢心動，我覺得佢好叻，做事有條理，佢亦都好識照顧我，有一次我上堂又係著背心，但大頭蝦冇帶風褸，佢就借風褸俾我著。另外有一次我補習又係著涼鞋，之後新鞋有d刮腳損左，佢又有膠布俾我。
Joanne同Ivana都不停係到叫我把握機會，因為好男仔真係唔多。正當我想同佢進一步發展果陣，果個男仔終於再一次出現係我眼前。




當日我地補完習，大家一齊去睇戲。唔知係邊個提議睇埋D恐怖片，其實都唔係好恐怖者，我地三個受過恐怖雞嘅嚴格訓練，所以恐怖片我地一D都唔驚，但係有D位我就嚇到捉實Jonathan手臂，而佢都拍一拍我隻手叫我唔好驚，果一下我覺得佢好有安全感，我可能真係對佢有意思啦。
睇完戲同食完飯之後，我同Jonathan明顯係行得close左，我再冇防範佢會突然拖我手咁樣，當我地行到維園果時，我地見到有一班好面善嘅人係到踢波，原來又係樂善堂波牛軍團，一如以往，Jasmine都會係到睇波