那些年，我等待的那個男孩子: 林雪凝日記(8)

1-9-199X
 
今日F.4開學啦!!代表我進入左會考課程，第一日返學班主任就話，妳地會考架啦，要努力多D啦，少D去玩之類，其實俾我地放鬆少少都得掛?
 
今日開學，又有一堆F.1妹妹黎啦，點知我地未入校門就遇到一個好大膽嘅小妹妹。佢真係犀利囉，頭又唔梳好、辮又唔扎、又未瞓醒咁行返學校。我地三個見到當然係立即上前想話幫佢啦，點知佢已經知道邊個係恐怖雞，仲唔將佢放係眼內咁，我地三個聽到即時嚇左一跳，竟然有人唔怕恐怖雞?
 
但係佢一行近校門，見到恐怖雞係到啄人果時，就嚇到呆左，立即拎塊鏡出黎整理，如果我地三個陪佢入校門，而佢俾恐怖雞捉到嘅話，我地三個都會受罰架，所以我地三個立即合作幫佢扎辮梳頭整理校服，點知我地都係俾恐怖雞檢查一次校服，年年開學我都會俾佢檢查一次，真慘
 
我地眼見小妹妹套校服都有唔少問題，例如校章扣唔好、拉鍊未拉哂、校服熨得唔夠靚，正當我地準備一齊受罰之際，恐怖雞竟然放過小妹妹，我諗佢係繼我之後第一個俾恐怖雞放過嘅人。
 




正當我地三個去買燒賣之際，小妹妹叫住我，問我叫咩名，佢知道我個名之後，再問我係咪西區官小升上黎，佢竟然會知道我邊間小學，可能佢係小學師妹啦。呢個小妹妹，有D似…其實係生得好似Miss孔，唔通佢係Miss孔個女?
 
我地會考生，返完班房之後就去左禮堂聽老師校長訓話，冇法啦，會考班嘛。
 
點知恐怖雞今日同我地講，我地學校歷來成績最好升U果個同學係一個外校生，仲要係男仔，一個以9A成績入讀嘅男仔，仲要係Miss孔嘅同班同學，正當我以為係佢老公之際，原來果位女校男生係6-7年前已經過身啦。佢真係好慘呢…好同情佢屋企人。
 
點都好啦!!!會考啦!!!要努力啦!!!!
 
唔知同我同屆會考嘅你，而家點呢?