那些年，我等待的那個男孩子: 43

「Jessie妳鍾意行書局?」
 
「係呀，呢d舊書店有時會搵到我想睇嘅小說架」
 
「妳除左愛情小說，仲會睇咩書?散文?」
 
「唔…其實呢，我會睇原振俠」
 
我咁樣講完之後，Jonathan個樣有點驚訝，可能佢以為冇女仔會睇呢d小說啦。其實原振俠呢，唔止係科幻小說咁簡單，更加著重情感嘅描寫。原振俠係一個醫生，但係佢又非常鍾意冒險，佢身邊有唔少奇異怪事，但佢感情更加豐富，優柔寡斷，完全唔似一個醫生應有嘅決斷能力。但係我只係鍾意睇原版原振俠系列咋，新版果個第一人身寫嘅真係好悶，冇左原醫生應有嘅性格，只係打打打、殺殺殺。另外點解我鍾意睇原振俠?因為黎明囉…果陣佢套原振俠我真係買左套dvd係屋企煲架，果首主題曲，到而家我仲聽緊。
 


「妳一定係鍾意黎明啦」
 
「下?咁你都估到嘅!!」
 
「原振俠，我只係諗到黎明，冇其他人」
 
「估唔到你都睇過喎」
 
「當然啦，莫名同原醫生企係灣仔天橋頂上果幕我仲好記得架」
 


果日我買左本原振俠嘅小說返屋企睇
 
「今日妳唔洗去診所?」
 
「今日應承左同你行街嘛，所以咪同ba b講唔去診所，今日阿妹代我去」
 
「妳妹妹喎，9月先升F.1，佢都去診所幫手?」
 
「佢為左賺零用錢嘛」
 


「但係唔怕佢搗亂咩?」
 
「D小朋友見到我妹妹都不知幾開心呀」

去到大約五點半，我地都係時候返屋企，因為我好少係街外食飯架
 
「唔…Jessie，陪妳坐電車返屋企?」
 
「唔?呢到坐電車?呢到西灣河喎，而且好少車直去堅尼地城」
 
「咁呀…唔……」
 
「你想陪我嘅話，我可以…唔…係上環行過去嘅，如果你唔怕遠」
 
「都得，可以陪妳，有咩所謂」


 
當我聽到佢呢句說話之後，我就開始諗，Jonathan佢會唔會...
我地一如計劃，係上環落左車之後，慢慢行返堅尼地城
 
「Jessie妳好鍾意係海邊散步?」
 
「係架，吹下海風冇哂煩惱，所以爸爸買個單位都要向海，俾我吹海風」
 
「妳都會有煩惱?妳係優等生喎」
 
「唔係架，有時讀書讀到個腦實哂，塞唔到野入去，好辛苦架」
 
「妳可以打波放鬆下架」
 
「有時會同Joanne Ivana去打羽毛球囉，不過我地放學間唔中會去球場睇下人打波」


 
「唔怕俾球場d男仔瞭咩?始終球場比較雜」
 
「我地會揀學校睇人打波架嘛」
 
我地兩個慢慢行去西邊，我係眼尾見到，Jonathan其實係有d想拖起我隻手。所以我都緊緊守住自己右手嘅位。如果佢拖起我隻手我可以點做?係我地行到球場果時，我地見到一班男仔係到打波，當中都有唔少女仔，而其中就有一個熟悉嘅背影。佢係Jasmine。