那些年，我等待的那個男孩子: 34

女子籃球隊，係我地學校精英份子之一，不過佢地實力係一般，去到學界總唔會第一場就輸嘅….至少打到去8強啦，但係對手就比較犀利，長年同我地學校死敵協恩同GHS係學界打到好燦爛。今次搵佢地黎做友誼賽對手，唔知係想增加士氣定點啦，都叫有個好開始嘅。但係對方嘅後備席同埋男子籃球隊果邊，好似唔太介意佢地落後緊咁樣
 
「咦?我地學校今年咁勁嘅?拋離對手十幾分以上喎」
 
我呢D唔識打波嘅人，點知道對手實力呢
 
「Jessie，妳唔見對手好似好輕鬆咩?」
 
「少少咁啦」
 




「佢地呢班係後備球員黎架，正選果班仲坐係場邊，冇換衫」
 
「咁Jasmine身邊果d呢?」
 
「佢地係男子籃球隊，學界長勝將軍之一，而且有傳聞佢地最勁果d男仔係冇入校隊」
 
「估唔到對手咁勁喎」
 
「樂善堂書院，妳話佢讀書差又唔係，運動差又唔係，好難界定佢係咩類學校」
 




比賽繼續，我地學校仍然領先緊，仲打得好順，當TB隊長入波果時，都傳出好多fans叫聲，其實聽Joanne講返，佢一直好想向Jasmine報仇，但奈何佢知道Jasmine係小恐怖雞之後就苦無機會，今次，終於俾佢搵到個機會出黎啦
 
當佢一次走籃得分之後，佢走到Jasmine面前，指住佢叫佢落場。佢係我地學校，係對方學校嘅座位上指住我地自己學校同學，呢個畫面都好有趣，不過阿sir未必俾啦
 
所以TB隊長都落足鞋油俾對方教練
 
「妳地想Jasmine妹妹幫我地?佢唔係我地學生喎」
 
「王Sir，我知佢係你地學校籃球隊教出黎，我想睇下，佢有冇資格幫我地落場，咁都唔得?」
 




對方教練同我地學校體育老師張sir傾左幾句之後，竟然將個波交左俾恐怖雞
 
「如果Miss孔批准嘅話…我地都冇問題」
 
睇黎現場所有人都好怕恐怖雞
 
「媽咪!!!我可唔可以幫阿哥學校落場呀?」Jasmine係操場嗌上訓導處，其時已經有陣冷風吹到落場
 
「妳自己小心d，唔好整親」恐怖雞開綠燈了
 
於是Jasmine好快就換左套籃球衫出黎，竟然，係同對手一模一樣，印住佢生日日子15號，加埋佢個英文名「Jasmine」，同埋底部印左另一個名「Anthony」