那些年，我等待的那個男孩子: 32

F.4時，我學校每年一度嘅Christmas ball，都會要同學幫手，今年我地三個去左做helper，因為我地成日聽d師姐講，學校christmas ball係好grant，好多外校男仔黎，所以我地就主動去做helper，今次我係負責賣花
 
係christmas ball嘅花檔，我著住舊年表姐結婚時我著嘅粉紫色伴娘裙，加白色高踭鞋係到做賣花女
 
「喂!Jessie!!生意點呀?」
 
「呀…仲未發市呀」
 
「都未係時候，一陣開始跳舞果時就忙到妳死架啦」
 


「妳話會唔會有人請我地去跳舞丫啦?」
 
「好大可能架，特別係Jessie妳啦」
 
「我?關我咩事呀?」
 
「平時成個村姑咁，原來妳打扮起上黎都好靚架喎」
 
「痴…痴線啦，我個妝咪又係妳幫我化」
 


當我去完洗手間出黎，現場已經開始跳舞，好啦，係我開工嘅時候啦
 
點知一入到場，我未埋到花檔，已經有個男仔埋我身邊，請我跳舞。我當時立即呆左，現場仲有幾個師姐好驚訝，最後，我拒絕左佢。到後尾我先知，果個男仔係皇仁F.6嘅10A狀元。
 
「Jessie妳連10A都拒絕呀?」
 
「咁…我今日係賣花女嘛…點可以失職架，中文都有教啦，敬業與樂業丫嘛」
 
「D師姐好羨慕妳啦，有人請妳出去」
 


過左一陣，又有另一個DBS男仔黎花檔
 
「同學係咪買花呀?」
 
「呀….係呀，想問問呢」
 
「係?」
 
「同學妳鍾意咩花?」
 
「我?」我真係一臉迷茫
 
「係呀，我想送花俾妳，再出去請妳跳舞，請問有冇問題呀?Jessie，林雪凝小姐」
 
「你…你識我?」


 
「哦…妳果兩個同學講我知架」
 
我望一望Joanne同Ivana，佢地都俾signal我，叫我把握機會。我亦以一個抱怨眼光望返佢
 
「sorry呀…我…唔識跳舞，而且我今晚係一個賣花女」
 
「呀…冇所謂，咁妳鍾意咩花?我可以送俾妳嘛?」
 
「今日現場冇我鍾意嘅花係到呢，唔好意思，或者你去邀請其他師姐丫」
 
當佢行開之後，果兩個媒人婆又走過黎啦
 
「妳連DBS都睇唔上眼呀?」
 


「咁…無啦啦黎請我，唔好啦」
 
「妳呀，連續拒絕兩個男仔，妳開始出名啦」
 
「出咩名呀?」
 
「林雪凝，人如其名，冰山美人」
 
「妳地兩個幫我改咋?」
 
「唔係架，係D男仔同其他人講咋」
 
「拿…又有男仔想黎啦，妳今次仲拒唔拒絕呀?」
 
「我真係突然好想恐怖雞係我身邊保護我，再黎再拒絕」


 
結果我果晚拒絕左不下10個男仔同TB
 
之後我個名就開始係其他友校中流傳，英華女校、冰山美人、Jessie林雪凝