那些年，我等待的那個男孩子: 18

聯校羽毛球友誼賽開始啦，果然Joanne一出場就引黎其他學校男仔嘅支持，佢每一下殺波、救波都轟動全場
 
其實Joanne係入學果時已經俾一眾大師姐Mark定入邊個校隊，因為佢體育同讀書都好犀利，不過佢全部拒絕哂，當我地問佢點解唔入校隊果時佢就話
 
「練習真係好辛苦，冇哂私人時間」
 
佢咁講又真係冇錯，所以有時我同Ivana都會約下Joanne打下羽毛球放鬆下就算
 
Joanne真係我地校花黎，佢F.1開始已經有其他學校男仔係山下等佢放學，不過佢地下場都係俾恐怖雞用獅哮功震左落山
 


有一次，一個男同學最慘，佢只係黎接唔舒服嘅妹妹返屋企，但都俾恐怖雞盤問左好耐，要搞到人地學校老師同家長打電話黎解釋先解決到件事，不過最後恐怖雞都嘉許左果位同學。
 
全靠Joanne，令我地學校個金漆招牌仍然係到
 
「嘩，犀利啦Joanne，一出場就引死全場男仔」
 
「拿!!我黎打波架咋!!我唔係賣肉架」
 
「但係呢…妳有冇睇中呢到d男仔呀?」
 


「冇喎!」
 
我好驚訝咁講「冇?!」
 
「Jessie妳自己睇中呢到d男仔咩?」
 
「咁我又睇唔中嘅……」我邊R頭邊講
 
「但係呢到個個都差唔多未來精英，點解妳都睇唔上眼?」
 


Joanne諗一諗然後答我地
 
「其實我覺得第一個感覺係好重要，但又唔可以話一見鍾情果種」
 
Ivana加把口落去「即係頭幾次見面就感覺到，呢個男仔可以發展喎，咁樣?」
 
「Exactly!!!」
 
「第一個感覺呀….唔……」
 
「咦?Jessie…莫非妳…有意中人?」Joanne眼光非常之奸
 
「邊…邊到有呀!!!我呢d村姑……」我又再耷低頭怕怕羞羞
 
「哦!佢呀?佢心中有一個小學同學，佢鍾意人好耐啦，又唔敢去搵人地」


 
「嘩!Jessie估唔到妳咁長情喎!小學初戀」
 
「邊…邊係呢…我…係我自己暗戀佢者……」
 
呢個時間，我地都準備走，點知Joanne一拎起行裝，就有個高大嘅LS仔走過黎同話同佢一齊行。識趣嘅Ivana就撓實Joanne
 
「Joanne同我地住得好近，唔洗麻煩你啦」
 
同一時間，Ivana都撓埋我
 
「呀~Johnny呀，Jessie都同我地一齊走架啦，你都唔洗送啦。唔…仲有呢，你都係少d黎等我地放學啦，我地學校危險呀」
 
其實點都要俾個交代對方嘅，於是我去到Johnny面前
 


「唔好意思呀…其實我都知你嘅意思…但係…唔…我屋企比較嚴同埋…呀…」
 
「啊…唔緊要，我…明嘅」
 
「你明就拜拜啦，拜拜!」Ivana極速帶走我地兩個
 
我地離開體育館，好快去到銅鑼灣行街

「Jessie妳第一次拒絕人嘅感覺係點呀?」
 
「感覺呀……我怕會唔會hurt到佢呀」
 
「Hurt乜鬼丫!!!d男仔好快就追過第二個女仔架啦，放心啦，妳估佢會去跳樓咩」
 
「Jessie妳講下，妳心中理想對象係點丫?」


 
「下…理想對象呀……」不然間就諗起佢，好幫人、但係又成日蝦我咁樣
 
「嗯…其實佢對我好、錫我就夠…唔洗一定要高大靚仔有錢，成績差唔緊要，不過佢一定唔可以做犯法嘅事」
 
「咁樣好易搵者，頭先求其執一個都可以已經係啦」
 
「咁又唔可以咁講嘅」
 
我地呢個話題傾左好耐
 
漸漸地，我地三個變左好姊妹，雖然Joanne揀左文科班，但我地經常都會一齊行街
 
到我F.4嘅時候，我心中嘅佢，開始隱約間出現係我面前，全因一個新黎嘅F.1新生，
 


「我叫張詩敏，今年5歲…」