《我用廣東話征服世界》第一季 已完結: 第十五篇 遊與茉里奈

茉里奈：「我記得你！你特登嚟搵我架？」
上官遊尷尷尬尬咁講：「係啊⋯我嚟多謝你嗰日救我一命。」
遊以前未試過主動去搵中意嘅女仔傾計，心情緊張到不得了。
茉里奈：「你送我去醫院我都未多謝你啦！你叫咩名啊？」
遊：「我叫遊，遊戲人生個遊⋯」
茉里奈：「遊戲人生？嘻嘻，我叫茉里奈啊！」
茉里奈嘅笑容令到上官遊個心卜卜咁跳。
遊：「係啦！你身體好返晒未啊？」
茉里奈攞著鎖匙打開鐵門講：「一早好返晒啦！er⋯你一場嚟到入唔入嚟坐下啊？」遊：「好啊，我入嚟坐陣啊。」
上官遊坐係茉里奈嘅客廳到周圍望下茉里奈屋企，米白色嘅牆身貼住幾張性感海報，海報入面穿著比堅尼嘅女仔熟口熟面。牆腳旁邊放咗兩箱ASAHI啤酒，原來茉里奈平時放工就會自己一個人係屋企飲啤酒睇電視。


茉里奈從廚房雪櫃攞左兩罐啤酒出嚟：「哈哈～原來我屋企無晒茶，你飲唔飲啤酒啊？」遊雖然唔識得飲酒，不過唔好意思拒絕就攞咗一罐嚟飲。
兩個人一邊飲酒一邊傾計，茉里奈已經好耐未試過飲得咁盡興，一來瞓咗幾日醫院，二來有人陪自己飲酒。兩個人飲下飲下都帶點醉意。
遊：「係喎！嗰張海報個女仔邊個嚟架？」
茉里奈：「哈哈～唔好睇咩？」
遊：「好睇呀！個女仔都幾得意，唔知邊度見過。」
茉里奈：「嘻嘻～個女仔咪我嚟囉！」
遊打左個凸，望真啲張海報再望下茉里奈，的確係同一個人嚟，不過打扮得太大出入頭先完全認唔出。
茉里奈又繼續說：「嘻～我做老師之前係拍寫真㗎。」
遊：「咁點解後來轉做老師嘅？」
茉里奈失落地說：「興趣變成職業唔容易啊，無人欣賞最後咪轉行囉～」


遊望住張海報：「我中意啊，你嗰時好得意！」
茉里奈聽到自己曾經嘅努力仲有人欣賞有少少感動：「多謝你喎～」
兩個人繼續飲酒，傾咗好耐計之後遊已經飲到有少少頭暈腦脹就話：「我都差唔多要走啦！」
然後行去門口，
茉里奈就送遊出門口：「咁你下次再嚟搵我飲酒啊～」
遊：「哈哈～好啊～」
上官遊就醉下醉下咁行返屋企。
茉里奈嘆左口氣：「唉～又得返自己一個。」上官遊返到屋企就坐喺沙發，電視播放懷舊電影，童童同鳩正好出咗街食飯，所以屋企得返遊一個人。遊心癢癢見屋企無人不如打個飛機⋯遊去到廁所洗手再攞咗卷紙巾，然後遊係屋企摷嚟摷去好似又搵緊一樣嘢，遊打開一個櫃桶，似乎終於搵到佢想搵嘅嘢，就係一塊鏡子！遊打算對鏡中嘅自己使用言靈，使自己發春夢！
不過鏡子旁邊嘅一樣物件更吸引遊注意，一個有笑哈哈圖案嘅黑色盒子⋯



遊攞起個盒子上手研究一下，用力咁打開，但係完全開唔到。
遊心諗：「唔通依個盒係⋯⋯明宴會嘅物件！？」
遊身為一個言靈師，調查地下言靈組織都係任務之一，關於依個明宴會四圍派黑色盒子嘅傳言聽過唔少。
依個時候門口傳來鎖匙聲，原來係鳩同童童食完嘢返屋企。

「咦～細佬⋯你⋯返嚟啦⋯⋯」遊望住佢地兩個一頭霧水咁講，點解明明同自己一樣係毒撚嘅細佬旁邊會多左個女仔嘅⋯仲要帶返屋企？？？
「哈哈～啊哥依個係我女朋友，佢叫童童啊。」鳩向遊介紹自己女朋友，遊嚇到呆左對住童童講：「你好！？」細佬居然比自己更快有女朋友，而佢唔知嘅係細佬連處都破埋了。