［愛情純愛］由嗰一個Kiss開始，我地唔再係青梅竹馬: 151. 完美的青春〈完〉

梁玥嘉湊近宋千辰嘅耳邊，努力地壓制住害羞嘅感覺，柔聲地講道：「我話我最中意你！」

宋千辰愕然地瞪大眼，因為梁玥嘉講嘅嘢同佢剛才講嘅嘢完全唔一樣；梁玥嘉一講完即刻就坐番好，心跳得好快

「你拖咗我，你冇得走㗎啦～」梁玥嘉望住拖緊嘅手，帶着甜美嘅笑容對宋千辰講道，「唔可以掉低我㗎啦～」

「好似係你拖我。」宋千辰提一提手，認真地講道，「你呀！再同李子迪行咁埋嘅話，睇我點教訓你！」

「你驚？」梁玥嘉故意咁問



「唔驚。」宋千辰搖搖頭

梁玥嘉依偎喺宋千辰嘅膊頭上，嗰份獨有嘅安全感出現，梁玥嘉中意咁樣痴住宋千辰，喺宋千辰嘅身旁佢就自然地會安心

「真係唔驚？」梁玥嘉追問道，「一啲都唔驚？」

「係我嘅始終都會係我嘅，唔係我嘅始終都會走。」宋千辰嘅回答直接而且理性，「咁你係唔係我嘅？」

「你話呢～」梁玥嘉故意唔直接扔出答案，「你估下？」



宋千辰無奈地接受梁玥嘉嘅調皮，中意一個人，就自然地會包容佢嘅一切，佢嘅好、佢嘅壞都會照單全收

「反正我冇諗住放你走。」宋千辰聳肩，梁玥嘉望到宋千辰臉上掛住嘅自信，不禁一笑

喺梁玥嘉眼中嘅宋千辰，永遠都係自信滿滿的，理性再加上佢嘅自信，唔係一個完美嘅組合咩？

「點呀～雪糕就食完啦，要講嘅嘢又講咗啦，咁係咪要番屋企？」宋千辰問道，佢咁講唔係因為急住想番屋企，而係因為今日天氣涼涼的，呢啲天氣吹一吹風，人好易病

「但我想拖多一陣先⋯」梁玥嘉好似已經適應咗一樣，臉絲毫不紅，以平常心講道



「咁呀⋯坐多陣先啦～」宋千辰笑一笑，將外套嘅拉鍊拉上

或者因為彼此嘅熟悉，所以一切睇起嚟都格外平淡，冇令人面紅耳熱嘅告白、冇令人尷尬嘅台詞，亦冇許下重大嘅承諾⋯因為一種默契，令呢種「平淡」令人份外安心，唔需要將「會一直喺你身邊」之類嘅說話刻意講出口，用心感受比口頭承諾更重要⋯！

⋯

中六Last Day

「中六咁就完啦⋯！」李穎容伸一個懶腰，對梁玥嘉講道

望一望課室嘅每一個角落，早就清空嘅壁報板，測驗板上仲有各科測驗項目嘅粉筆字痕跡，每一個熟悉嘅坐位、燈制⋯

校服上寫滿咗各種字句，總算係為中學嘅生涯劃上一個句號；咁樣就結束咗中六嘅生涯，下一次再番嚟嘅時候，就已經係畢業典禮，喺五、六個月後，唔知道大家又變成點

梁玥嘉佢地圍喺張子萊嘅座位前，應該係畢業禮前最後一次，著住校服圍埋一齊講笑吹水



「Last Day，一齊去食埋下午茶先番屋企啦！」張子萊提議道

「好喎！食咩呀？」李穎容又係第一個和應張子萊嘅人

「哎呀呀～你兩個呀！愈嚟愈奇怪呀～」霍思傑喺一旁挪揄道，「不過比起你兩個，我地宜家去食咩比較重要。」

「食唔食酸辣粉？」梁玥嘉提議道，「為我地嘅Last Day劃上一個火辣辣嘅句號！」

「都得都得，仲有冇其他提議？」張子萊拍咗兩下手

「食酸辣粉啦～火辣辣咁結束嘛要～」李穎容搭住梁玥嘉嘅膊頭

「宜家就去！」霍思傑點點頭



大家忽然靜咗落嚟，明明都已經決定好食咩並打算起行去食飯，但大家卻孭起書包唔行，你眼望我眼

「行啦穎容⋯！」梁玥嘉細細聲地講道，拉起李穎容嘅手

三個男仔默默地起身，然後行到去課室門口等梁玥嘉同李穎容

「叩叩！」

梁玥嘉同李穎容行到去楊楠恩嘅座位前，喺佢嘅枱上輕輕地敲咗兩下；楊楠恩抬起頭，見到梁玥嘉同李穎容就企喺佢面前

「食飯啦去⋯」梁玥嘉望住楊楠恩先開口講道

楊楠恩一臉愕然，自從嗰件事被拆穿之後，楊楠恩就冇再同過佢地一齊，默默地將自己隔離開；佢本來以為梁玥嘉一定會喺番學嘅時候向Miss Tam告發佢，自己亦有心理準備要接受懲罰

但去到最後，梁玥嘉並冇告發佢，佢唔敢主動去搵番佢地，因為楊楠恩知道，自己犯下嘅錯係唔值得梁玥嘉原諒佢⋯所以佢只好一直將自己同佢地嘅距離拉遠，自己會好過啲之餘亦都係說服自己一切都成過去嘅方式，一步錯，步步錯



「你呀，要我地個個等你一個呀？」李穎容朝課室門口嘅方向望一望，「差你先齊人呀。」

楊楠恩望住梁玥嘉同李穎容，兩人對住佢微笑，楊楠恩望向門口，宋千辰、張子萊同霍思傑企喺課室門口

「快啲執好嘢啦！」梁玥嘉將楊楠恩枱上嘅筆放到去擺喺枱上嘅筆袋中，然後將筆袋嘅拉鍊拉上，遞到楊楠恩面前

「你地原諒我呀⋯？」楊楠恩接過筆袋同時耷低頭，哽咽着問

「決定權就唔喺我地幾個度，得玥嘉先有原諒你嘅權利。」李穎容邊講邊將楊楠恩枱上嘅紙疊好

「原諒你啦，以後唔好啦⋯！」梁玥嘉微笑着講道

楊楠恩抬起頭，見到梁玥嘉嘅笑容，鼻子一酸再次耷低頭，喺眼眶打轉嘅淚水滑過臉頰



「對唔住，以後唔會㗎啦⋯！」楊楠恩哽咽着道，「多謝⋯！」

「好啦好啦！快啲執嘢啦！」李穎容一手拎起掛喺枱邊嘅書包，「我地都好餓啦！」

「嗯嗯！等緊你呀我地！差你咋！」梁玥嘉笑着將楊楠恩枱上嘅嘢放入書包

「知啦⋯！」楊楠恩笑中帶淚，用手抹抹眼淚後企起身

「快啲快啲！」梁玥嘉同李穎容將所有嘢都塞晒楊楠恩嘅書包中

楊楠恩一孭起書包，梁玥嘉同李穎容就拉住楊楠恩朝課室嘅門口走去，為最後一年嘅中學生涯劃上完美嘅句號




<全文完>
故事就嚟呢度啦～多謝你嘅支持！！！
想知道我繼時會再出新故嘅話，記得Follow我嘅IG呀！！！
IG Link就喺下面！！！



IG Link: https://www.instagram.com/nd_cotttoncandy/?hl=zh-tw