［愛情純愛］由嗰一個Kiss開始，我地唔再係青梅竹馬: 150. 所以，說嗎？

「甜筒最好食嘅係尖尖位，有朱古力～」梁玥嘉拎住食剩嘅雪糕筒尖尖遞比宋千辰睇，然後放入口中食埋最後嘅雪糕筒

梁玥嘉雙手拍咗兩下，偷偷地望咗宋千辰一眼，悄悄地抿一抿唇；此時宋千辰都食完雪糕，拍一拍指尖上嘅雪糕筒碎

兩個人各自諗緊要點開口，用眼尾嘅餘光偷望對方一眼，欲言又止

「我有嘢想同你講。」「我有嘢想同你講⋯！」

兩人同時開口，大家都窒咗一下，愕然地望坐對方，然後又默默地深呼吸





梁玥嘉見宋千辰未有再開口講嘢嘅打算；宋千辰又覺得梁玥嘉聽到佢開口之後應該會唔出聲呆一陣

「其實我—」「我想講—」

兩人又再一次同時開口講嘢，宋千辰無奈地笑咗一笑

「你講先啦。」宋千辰微笑後講道，將發言權先比梁玥嘉

「呃⋯」梁玥嘉先係猶疑咗兩秒，但眼見宋千辰正等待着佢開口，梁玥嘉亦緩緩開口，「之前呢，我話咗考完試之後比答覆你嘛⋯」





梁玥嘉嘅臉頰紅紅的，視線都唔敢一直停留喺宋千辰身上，偶爾悄悄地移開視線

「唔⋯」梁玥嘉嘅心瘋狂地跳動，說話講到嘴邊，但又講唔出口，卡咗喺喉嚨，「我⋯」

宋千辰見梁玥嘉真係要認真比回覆佢，一下子緊張起嚟，感覺到心臟有節拍而且強而有力嘅跳動

即使早就知道梁玥嘉嘅心意，但自己知道同親耳聽到對方親口講出嚟係兩回事

「呀⋯！我講到出口啦都就嚟⋯！」梁玥嘉喺心中吶喊道，輕輕地握緊拳頭，「加油呀梁玥嘉！你可以㗎！今次你一定要做主動開口嗰個⋯！」





梁玥嘉朝宋千辰坐近咗， 佢嘅大髀幾乎都要貼住宋千辰嘅大髀

「嘉嘉到底要講啲咩⋯？」宋千辰嘅心裏有啲著急，插喺衫袋中嘅右手因為緊張而不禁將禮物盒嘅蓋微微打開後又蓋番好

梁玥嘉吞咗一啖口水，微微耷低頭，定睛望住宋千辰隨意搭喺大髀上嘅手，心臟「噗噗、噗噗」地跳着

宋千辰望住梁玥嘉，但因為梁玥嘉耷低頭，宋千辰睇唔到佢嘅表情

梁玥嘉嘅右手抬起，挽住宋千辰嘅手臂，纖幼嘅指尖沿住宋千辰嘅手臂向手心落去；當指尖掂到宋千辰嘅手指時，梁玥嘉輕輕地將宋千辰嘅指縫撐開，一言不發地拖住宋千辰嘅手

宋千辰感到愕然，稍微瞪大眼望住自己隻手

「我講嘢唔叻⋯所以⋯」梁玥嘉紅着臉講道，聲線都害羞起嚟

「所以你連一句『我中意你』都唔講呀？」宋千辰嘴角微微上揚，假裝失望地問道





「我⋯！」梁玥嘉聽到宋千辰失落嘅聲線，瞬間抬起頭，頭一抬起，兩人嘅視線喺好近嘅距離對上

心臟比突然拉近嘅距離嚇得用力緊縮一下，梁玥嘉移開視線

「我都中意你⋯」梁玥嘉嘅聲線將佢嘅害羞暴露無遺

宋千辰聽到梁玥嘉嘅回覆後微微一笑，呢個微笑中滿是甜蜜，由心底甜出嚟嘅嗰一種甜；宋千辰將放喺右邊衫袋中嘅禮物盒拎出嚟，遞到去梁玥嘉嘅面前

「送比你。」宋千辰微笑着講道，呢份收咗喺櫃桶成個月嘅禮物終於送到出去，「打開睇下～」

「多謝！」梁玥嘉高興地講道，佢望咗宋千辰一眼，然後又望向兩人拖住嘅手，「你拎實～」

梁玥嘉伸出左手將禮物盒嘅蓋向上拉起，宋千辰緊緊地捉住禮物盒嘅底部；放喺盒中嘅手鐲映入梁玥嘉嘅眼簾，梁玥嘉一眼就認得呢隻手鐲





「呢隻手鐲⋯！」梁玥嘉訝異地望住手鐲，兩秒後帶着愕然嘅表情望向宋千辰，「你點知我中意呢隻㗎？你幾時買㗎！？」

吊落嚟嘅瑠璃紺色珠子喺旁邊數顆白色透明小珠子嘅襯托下格外突出，銀色嘅手鐲同皮膚白皙嘅梁玥嘉好相襯

「睇戲之前行書店嗰陣你睇咗好耐，後來你喺我屋企嘅時候咁啱又喺IG度見到呢隻手鐲嘅po，你睇咗好多次啦！」宋千辰見到梁玥嘉嘅雙眼都發緊光一樣，「咁梗係喺你唔知嘅時候買咗啦～」

「我好中意呀！咁都比你留意到嘅～」梁玥嘉心都甜晒，從盒中拎出手鐲，「好好睇呀～」

「我幫你戴～」宋千辰從梁玥嘉嘅手中拎走手鐲，鬆開咗梁玥嘉嘅手

梁玥嘉遞出右手，宋千辰溫柔地將手鐲套到梁玥嘉嘅手腕上，梁玥嘉望住自己手上嘅手鐲，臉上掛着嘅笑容都格外甜美

「宜家我手上又有手鐲又有手繩～」梁玥嘉嘅指尖輕輕地掂咗瑠璃紺色嘅珠子一下

「中意？」宋千辰定睛望住梁玥嘉問道





「中意！」梁玥嘉用力地點頭，然後細細聲地講道，「你同手鐲都中意⋯」

「你講咩？太細聲聽唔到～」宋千辰故意咁講，想捉弄梁玥嘉

「宋千辰！你挽我呀！」梁玥嘉笑住打咗宋千辰一下，「咁近你會聽唔到？」

「我就係聽唔到～」宋千辰聳肩，「所以你啱啱講咩？」




聽日出最後一集，大結局！記得嚟睇！！！








IG Link: https://www.instagram.com/nd_cotttoncandy/?hl=zh-tw