［愛情純愛］由嗰一個Kiss開始，我地唔再係青梅竹馬: 139. 味道

「根本就係犯規⋯！」梁玥嘉清醒過嚟撇開臉，喺耷低頭掀開書嘅同時喺心裏講道，「呢個笑容⋯！」

楊亦晟閂上電視，識趣地起身行番房，喺經過餐枱前時，同宋千辰對望咗一眼，宋千辰嘅嘴角微微揚起

喺過咗大半個鐘之後，宋千辰不禁抬頭望向梁玥嘉，梁玥嘉一臉認真咁溫書，見到佢好細聲地不斷喃喃自語背書，然後又望一望書對答案

「你望住我做咩⋯」梁玥嘉感覺到宋千辰定睛望住佢，於是抬頭望向宋千辰

「冇咩，就係中意望住你。」宋千辰微微一笑講道



「你唔好再撩我啦⋯！」梁玥嘉忍唔住伸手打咗宋千辰一下，聲線裏滿是害羞同甜絲絲，「煩死啦！溫書呀！」

去到傍晚時份，梁玥嘉覺得有啲攰，便伸咗個懶腰，然後企起身走兩步當休息，活動一下，總好過一直坐喺度溫書坐到屁股痛，郁動一下都會易啲集中

「呀⋯今晚再溫⋯」宋千辰仰頭，用手掐一掐鼻樑，合上雙眼

宋千辰企起身拎起書同筆，朝自己嘅睡房行去，梁玥嘉都收拾好嘢行入宋千辰間房，一行到入去就見到宋千辰坐喺電腦椅上閉目養神

梁玥嘉行到床邊坐低，無聊地隨手拉開啲櫃桶再閂上，當梁玥嘉將書枱右邊嘅桶櫃拉開咗少少嘅時候，宋千辰即時坐好然後將桶櫃閂番埋



「唔好挽我啲櫃桶啦！」面向坐梁玥嘉坐嘅宋千辰將電腦枱向前移，將櫃桶擋住

之所以會咁緊張咁閂番埋櫃桶，係因為嗰隻打算喺最後梁玥嘉答覆佢嘅時候先送嘅手鐲就喺入面，所以宋千辰先會咁緊張，唔比梁玥嘉將櫃桶拉開

梁玥嘉見宋千辰又合起雙眼休息，調皮地朝宋千辰嘅手腕伸手，想將佢手上嘅手繩除落嚟

「做咩除我手繩呀⋯」宋千辰默默地將手抽回，用另一隻手蓋喺手腕上

「嘻嘻～挽下咋嘛～」梁玥嘉滿意地笑一笑，「做咩咁緊張啫～」



「你想知？」宋千辰嘴角上揚，然後故意要令梁玥嘉害羞一樣問道

「唔想知呀！」梁玥嘉睇穿宋千辰又想撩佢，頓時就回答一句否定，耷低頭同時細細聲地講道，「就知你想撩我⋯」

「哦～」宋千辰企起身，右手捉起梁玥嘉嘅左手，左手托起梁玥嘉嘅下巴，彎下腰，故意挑逗梁玥嘉，「我都未撩你，你就驚啦？」

「驚呀⋯」梁玥嘉直視宋千辰講道，「我驚咗好耐⋯因為撩我嘅人係你⋯」

宋千辰聽唔明白梁玥嘉嘅意思，梁玥嘉跪起床上，邁步落地，宋千辰企後咗一步，望住梁玥嘉嘅一舉一動

梁玥嘉向宋千辰走近咗一小步，雙手環抱着宋千辰嘅腰，頭靠着喺宋千辰嘅膊頭上

「一早就識到你嘅人係我，太好啦⋯」梁玥嘉柔聲地講道，聲線中夾雜着一種撒嬌般嘅語氣

宋千辰因為梁玥嘉突如其來嘅舉動而愣住了，喺咁近嘅距離可以聞到梁玥嘉嘅洗頭水香味，一頭啡黑色嘅秀髮軟軟的，梁玥嘉仲蹭咗兩蹭



「做咩咁突然⋯」宋千辰喺心中講道，臉頰紅紅的，宋千辰稍稍地伸手抱緊梁玥嘉

「千辰身上陣味好好聞⋯」梁玥嘉喺心裏講道，「好安心嘅感覺⋯」

梁玥嘉聽到宋千辰淺而速嘅呼吸，聽到佢心臟強而有力地跳動嘅聲音

「你個心跳得好快⋯」梁玥嘉微微抬起頭望向宋千辰，「我都可以聽到佢『噗噗』、『噗噗』咁跳⋯」

「呃⋯」宋千辰一時間諗唔到點樣解釋又或者可以講啲咩

「嘻⋯」梁玥嘉忽然笑起嚟，臉上掛上天真嘅笑容，「知你好中意我啦～」

宋千辰嘅心跳得更快，臉頰瞬間就滾燙起嚟，宋千辰頓時撇開了臉，唔望梁玥嘉



「我、我去個廁所⋯！」宋千辰有啲不知所措地推開梁玥嘉嘅雙手

梁玥嘉亦乖巧地鬆開手，宋千辰頓時朝房門口走都走唔切；梁玥嘉偷偷一笑，轉身行到電腦椅上坐低，望一望向門口睇下宋千辰係唔係真係出咗房，然後將搭喺櫈背上嘅外套扯咗落嚟抱喺懷中

「衫上面有千辰陣味⋯」梁玥嘉喺心裏道，「好香⋯」

「啱啱真係要痴線啦⋯！」宋千辰用水洗面，好讓自己清醒一下，「嘉嘉又會突然間變咗另一個人咁嘅⋯」

宋千辰洗完臉，輕手輕腳地行番去房門前，輕輕推開房門從門縫中望入房，好奇梁玥嘉會喺佢出咗去之後做啲咩

「佢攬住我件外套做咩⋯」宋千辰見到梁玥嘉嘅舉動有啲震驚，啱啱洗完面番嚟嘅佢，耳根同臉頰又瞬間紅起嚟，「咳！」

宋千辰故意咳一聲，梁玥嘉頓時將外套放低，當只係因為凍而拎嚟蓋住一樣若無其事

「你去完廁所啦？」梁玥嘉望向宋千辰問道，呢一問根本就係明知故問



「嗯⋯」宋千辰嘅心仍然未平伏到落嚟，坐低喺床上後撇開視線，唔望梁玥嘉

「你又灘～好懶呀你！」梁玥嘉望住一下子灘咗喺床睇手機嘅宋千辰

「唔想郁嘛～」宋千辰一臉頹廢咁講道

「我問書，你答。」梁玥嘉提議道，順手地拎起放喺旁邊嘅書打開




IG Link: https://www.instagram.com/nd_cotttoncandy/?hl=zh-tw