［愛情純愛］由嗰一個Kiss開始，我地唔再係青梅竹馬: 138. 這麼會撩？

本來一直都已經聽住宋千辰叫佢嘅暱稱，但冇諗過有一日佢會咁中意宋千辰叫樣叫佢；每次聽到宋千辰叫佢時，心臟總會微微一顫

梁玥嘉閂上水，拎起放喺企缸外嘅毛巾，換好衫後企喺鏡前拎起風筒將頭髮吹乾

「呼⋯」梁玥嘉覺得沖完涼之後成個人都輕鬆晒，一身輕嘅感覺

吹完頭之後，梁玥嘉留到入房，坐喺書枱前，開着書枱嘅枱燈

「到時點比答覆千辰好呢⋯」梁玥嘉邊打開電腦邊諗道，「直接講嘅話好悶啫～唔想咁直接⋯」



另一邊廂嘅宋千辰，將禮物盒放番入去桶櫃時默默地嘆咗一口氣，心裏總係記掛住梁玥嘉；宋千辰將盲盒從袋中拎番出嚟放喺枱上

「唉～」宋千辰將同梁玥嘉交換咗嘅公仔從盒中拎出嚟放到枱上，「我想要嘅又點會係隱藏款公仔呀～」

宋千辰望住手上嘅手繩，嘴角漸漸上揚，宋千辰拎起放喺一旁嘅手機，順手地又send咗一個message比梁玥嘉，每一晚總係會同梁玥嘉WhatsApp到2、3點先瞓

⋯

翌日中午



「媽，我去隔離同千辰一齊溫書呀～」梁玥嘉手上捧住書本同筆袋

梁玥嘉閂上屋企大門，行到隔離屋㩒鐘，嚟開門嘅係楊亦晟

「咦？嘉嘉？你過嚟嘅？」楊亦晟疑惑地望住梁玥嘉

「琴日同千辰講好咗今日一齊溫書。」梁玥嘉微微一笑講道

「哦？係呀？」楊亦晟嘅語氣中帶着少許震驚，「千辰仲瞓緊覺，未起身⋯」



「吓？」梁玥嘉不禁吓咗出聲，「可能佢琴晚太夜瞓啫～」

「你入嚟先啦～」楊亦晟叫咗梁玥嘉入屋，免得著住短褲嘅梁玥嘉一直企喺走廊，「你去叫醒佢啦，喺房。」

楊亦晟將梁玥嘉喺佢地屋企著開嗰對拖鞋從鞋櫃中拎出嚟放到地上

「唔該～」梁玥嘉禮貌地講道

楊亦晟行番去梳化坐低睇電視，梁玥嘉行到宋千辰嘅睡房門前，㩒低門柄後輕輕推開宋千辰嘅房門，入到房後悄悄地將房門閂上

梁玥嘉輕手輕腳地行到去床邊，將書同筆袋放低喺宋千辰嘅書枱上

宋千辰側身背對住門口瞓，梁玥嘉悄悄地探頭偷望宋千辰嘅睡顏

「又瞓覺都戴住喎～」梁玥嘉望到宋千辰手上嘅手繩，心裏喜滋滋地講道



梁玥嘉悄悄地行到床尾，小心翼翼地除咗拖鞋，然後企上宋千辰張床嘅床尾，微微彎下腰捉起被角

「起身啦！」梁玥嘉大叫嘅同時將被一下子揚起

宋千辰嘅眉頭輕輕一皺，緩緩地睜開眼，見到梁玥嘉企喺佢床尾時不禁嚇到顫咗一下

「起身啦！」梁玥嘉跪坐喺宋千辰嘅腳邊，捉住宋千辰嘅手，「琴晚我地講好咗一齊溫書㗎！」

「嗯⋯」宋千辰仍然灘喺床上，又緩緩合上眼

「喂呀！起身啦宋千辰！」 梁玥嘉拉咗宋千辰嘅手兩下，「起身啦！」

「嗯⋯我知啦⋯」宋千辰點點頭，然後一下子坐起身，但仍然處於睡眼惺忪嘅狀態



宋千辰起身落床，順手地伸手摸摸梁玥嘉嘅頭，然後就出咗房

梁玥嘉伸手放到頭上，無奈一笑

過咗一陣之後宋千辰打開房門，梳洗完番嚟嘅佢精神奕奕的

梁玥嘉坐咗喺電腦椅上拎住筆記睇，聽到開門聲後便連人帶櫈一齊轉過去，宋千辰行到枱前將手機嘅叉電線拔走

「咁快就溫書啦？」宋千辰將叉電線扣番喺枱邊

「懶瞓鬼⋯」梁玥嘉抬眼望咗宋千辰一眼，細細聲地好似抱怨一樣講道

「Okay啦～」宋千辰笑一笑，從書櫃中抽出書本同筆記，「都唔係好懶瞓啫～」

「咁都可以唔知醒⋯」梁玥嘉抱怨道，「有冇搞錯呀！」



「比個機會你叫我起身，你仲想點？」宋千辰開玩笑般講道，「起身啦，出去溫書呀！」

「哦。」梁玥嘉起身，拎埋自己嘅書行出去

宋千辰坐低喺梁玥嘉隔離，梁玥嘉望住宋千辰坐低喺自己隔離

「你做咩坐我隔離？」梁玥嘉嘅手尋找着筆袋嘅位置，「唔坐對面？」

宋千辰湊近到梁玥嘉嘅耳邊，梁玥嘉微微側一側頭，仔細聽宋千辰講嘅嘢

「坐你對面，會專心唔到，因為會掛住望你。」宋千辰平淡地講道，就好似陳述一件平常事一樣

宋千辰講完之後若無其事地坐番好，然後打開書、拎出筆溫書；但相反地，梁玥嘉頓時就紅了臉頰，臉頰滾燙的



梁玥嘉望向宋千辰，宋千辰微微側頭望向梁玥嘉，露出爽朗嘅笑容，梁玥嘉怔了一怔，視線停留喺宋千辰嘅笑容上




IG Link: https://www.instagram.com/nd_cotttoncandy/?hl=zh-tw