［愛情純愛］由嗰一個Kiss開始，我地唔再係青梅竹馬: 128. 站在他的身後

「哈⋯你避咩？」張子萊喘着氣問道，「見到佢有咩大不了？」

「唔知⋯」李穎容搖搖頭，用力地吸氣，「下意識，自然就跑起嚟⋯！」

本來以為已經被佢地甩咗嘅Joshua跑到嚟休憩公園，本來李穎容想起身再走，但已經冇氣再跑

「穎容⋯」Joshua跑到嚟公園，喘着氣走向李穎容

「你唔好煩我，我同你已經分咗手，唔好再搵我。」李穎容企起身，都唔等Joshua開口就先拒絕道，「唔好令我更加討厭你。」



「我已經低聲下氣搵番你，你仲想點？」Joshua問道，佢眼尾瞄咗坐喺一旁嘅張子萊一眼，「因為佢？因為佢所以你唔肯？」

李穎容聽到之後不禁無奈地反白眼，連坐喺一旁嘅張子萊都不禁冷笑一聲搖搖頭

「唔關事囉好冇？同佢冇關係。」李穎容沉着氣講道，「我唔同番你一齊係我嘅決定，唔關任何人事。」

「我知你好愛我，我宜家先知其實你係最好⋯」Joshua走近李穎容，李穎容連望都唔想望佢，「你同番我一齊啦！我知錯啦！」

「我的確好愛你，但由我知道你背叛我嗰一刻開始，我已經唔再愛你⋯」李穎容搖搖頭



「佢同你講過啲咩呀？」Joshua一手指住張子萊，一手捉住李穎容嘅手腕質問道，「佢一定係同你講咗啲咩，所以你先唔同番我一齊！」

「唔關任何人事呀真係，我唔同番你一齊唔係因為佢。」李穎容皺起眉頭，用力地轉動着手腕想要甩開Joshua嘅手，「係因為你背叛我呀Joshua。」

李穎容平淡地講出每一個字，坐喺一旁嘅張子萊默默地望住兩人

「由你背叛我嘅一刻開始、我地就已經挽完啦。」李穎容講道

而李穎容嘅平淡卻令Joshua惱羞成怒，Joshua嘅自尊心強，本以為咁樣就可以令李穎容回心轉意，豈料李穎容卻果斷拒絕



「你唔好咁過分喎李穎容！」Joshua更用力地捉住李穎容嘅手腕，李穎容嘅眉頭深鎖，更用力地想掙脫，「我低聲下氣同你講你都唔肯？」

「我唔愛你啦已經！放手呀！你捉到我隻手好痛呀！」李穎容想推開Joshua嘅手，但Joshua嘅力氣比李穎容大，李穎容根本就推唔開Joshua，「Joshua！你整痛我啦！」

張子萊見狀頓時就企起身到李穎容同Joshua中間，用力地將Joshua嘅手推開，李穎容嘅手腕明顯地紅咗一大片

「關你咩事？」Joshua對將佢推開嘅張子萊講道，然後想朝李穎容伸手，「李穎容你同我講清楚！」

張子萊一下子將李穎容拉到身後，李穎容企喺張子萊嘅背後，微微抬頭呆呆地望住張子萊嘅背影，心中忽然有一股安全感湧出

「仲同佢講咁多嘢做咩？佢都聽唔明。」張子萊望咗李穎容一眼

「你行開。」Joshua想推開張子萊，就喺Joshua伸手嘅一刻，張子萊捉住Joshua嘅手，再一下子甩開

「佢已經講得好清楚，佢唔會再番同你一齊，有邊一個字你聽唔明？你係聾咗定唔識字？」張子萊盯着Joshua講道，「咁得閒日日都煩住李穎容，不如留番啲尊嚴比自己。」



張子萊講完佢要講嘅嘢，唔等Joshua比反應，直接就拉住李穎容離開休憩公園

就喺張子萊拉住李穎容走嘅一刻，李穎容忽然覺得有少許心動嘅感覺，從來都冇諗過張子萊會有一日咁樣企喺佢面前

「你同佢講咁多都嘥氣，一早就應該直接走。」張子萊鬆開李穎容嘅手

李穎容回神過嚟，抬頭望向張子萊，收回懸喺半空嘅手，另一隻手遮住紅咗一片嘅手腕；張子萊眼尾瞄到李穎容伸手遮住手腕嘅動作

「你睇你，次次都比佢㩒住嚟打咁⋯」張子萊移開視線講道，「你明知唔夠佢打就走啦⋯」

「我點知佢會追到上嚟⋯」李穎容一臉無辜地講道

兩人都靜咗落嚟，李穎容耷低頭望住自己紅紅嘅手腕，張子萊偷偷地瞄咗李穎容一眼，然後又偷偷移開視線；李穎容悄悄地抬頭望向張子萊



張子萊停咗落嚟，李穎容抬頭望向張子萊

「食唔食嘢？」張子萊望咗李穎容一眼後問道，「唔食嘅話我就番屋企啦～」

「食！我都有啲餓⋯」李穎容嘅嘴角不禁上揚道，因為佢見到張子萊留意着佢身後，大概係擔心Joshua又會追上嚟




IG Link: https://www.instagram.com/nd_cotttoncandy/?hl=zh-tw