［愛情純愛］由嗰一個Kiss開始，我地唔再係青梅竹馬: 127. 快、快跑！

「我地食嗰間茶餐廳囉～都好耐冇食啦～」李穎容即刻拋出一個新提議，「玥嘉又啱啱先好番～」

「好呀！」張子萊第一個和議李穎容講嘅嘢，「食囉，一齊陪梁玥嘉食得清淡啲～」

梁玥嘉打從心底開心笑起嚟，心裏好感恩識到呢班人，高中嘅生活有佢地實在太好

⋯

喺去緊茶餐廳嘅路上，張子萊同李穎容一齊行，兩人耷低頭各自睇手機，張子萊偶爾睇到好笑嘢便撞一撞李穎容嘅手肘遞比佢睇



「話說最近Joshua搵番我。」李穎容忽然間細聲地對張子萊講道，張子萊頓了頓，視線離開手機嘅螢幕，然後先望向李穎容

「咁跟住呢？」張子萊邊睇手機邊問道

「都冇咩點，佢不斷咁搵話題同我講。」李穎容開咁WhatsApp，搵到佢同Joshua嘅對話然後遞比張子萊睇，「但我唔太想理佢。」

「Seen咗佢囉～」張子萊將手機遞番比李穎容，「既然你唔想覆佢。」

「明明係佢背叛我，但宜家又嚟搵我⋯」李穎容細聲地講道



「仲中意人嘅咪搵番佢囉～」張子萊心裏覺到李穎容會心軟，語氣中夾雜着少許無奈

「我都有原則㗎！」李穎容反一下白眼講道，「佢背叛我，唔要得！」

「咁咪得。」張子萊講道

兩人行喺前面細細聲咁講，因為Joshua一事，張子萊見過李穎容落魄嘅一面，李穎容亦覺得張子萊可以信任，自然而然地私下傾多咗計，講多咗嘢，兩人之間嘅秘密亦多咗

「咁睇落其實穎容同張子萊都幾襯～」行喺兩人正後方嘅梁玥嘉喺心裏講道，「不過算啦～穎容都好似唔多想拍拖咁⋯」



佢地一行人去到茶餐廳，照樣地坐大枱，佢地都已經有一段日子冇嚟茶餐廳食嘢，不過喺嗰度做嘢嘅阿姨都仲認得佢地

「好耐都唔見你地喎～」阿姨拎住落單紙同筆講道，「食咩呀想？」

大家落完單之後，阿姨便行開咗，大家各自拎出手機睇，李穎容喺IG見到一間食日本嘢嘅餐廳，下意識地就將個post直接share咗比張子萊

張子萊收到李穎容嘅message，抬眼望一望李穎容之後直接like咗個post

李穎容見張子萊冇回覆，便打道：「有冇興趣？」

張子萊見到李穎容send過嚟嘅message，諗咗一陣要點回覆後打道：「搵次去」

張子萊覆完之後直接就將手機放到枱上，冇再繼續睇手機

李穎容同張子萊一樣都中意食日本嘢，所以佢地偶爾都會講下邊間日本嘢餐廳好食，互相推薦一下，好似就喺咁樣無意識間就更熟



⋯

放學之後，李穎容同張子萊因為住嘅地方好近，所以同大家分道揚鑣之後就得番佢兩人一齊行番屋企

兩人沿路都係睇手機，已經唔會因為冇嘢講而覺得尷尬，大家都覺得冇咩所謂

張子萊偶然抬起頭，打算望下分岔口未，雖然兩人住嘅地方的確好近，不過實際上，李穎容要喺分岔口直行、再過多條馬路先到，而張子萊就喺分岔口轉左邊

「喂。」張子萊拎住手機嘅手撞咗李穎容嘅手肘一下

「嗯？」李穎容抬頭望向張子萊，只見張子萊雙眼直視前方，微微抬一抬下巴

李穎容順住張子萊雙眼望住嘅方向望去，見到一個好熟悉嘅身影企喺前面路口，呢個人就係令張子萊同李穎容變得更熟嘅原因——Joshua



「佢等你？」張子萊問道

「我點知。」李穎容回答

就喺李穎容回答完張子萊嘅問題後兩秒，Joshua忽然向佢地呢邊望，然而亦見到佢地兩個，Joshua見到李穎容，直接邁步走向李穎容

「走、走、走！」李穎容拉住張子萊轉身就走，「快啲快啲！」

Joshua跑起嚟想追上兩人，李穎容拉住張子萊跑衫袖跑起嚟，完全冇考慮到張子萊嘅感受；縱使張子萊嘅心唔想，但因為唔想件冷衫爛亦只好跟住跑

「呢邊呢邊！」李穎容拉住張子萊跑入內街

李穎容跑兩步就回頭望一望，然後又繼續跑，直到見唔到Joshua嘅身影後，李穎容先停落嚟，拉住張子萊到附近嘅休憩公園坐低休息一下






IG Link: https://www.instagram.com/nd_cotttocandy/?hl=zh-tw