［愛情純愛］由嗰一個Kiss開始，我地唔再係青梅竹馬: 121. 距離

宋千辰接過外套，梁玥嘉微微鼓起兩泡腮

「做咩呀～」宋千辰留意到梁玥嘉嘅心情好似一般便問道，「唔開心呀？」

「冇呀⋯」梁玥嘉口不對心地搖搖頭，但佢臉上掛着嘅表情完全唔似冇事

「真係冇？」宋千辰追問道，微微側着頭望住梁玥嘉，只見梁玥嘉扁着嘴，雙手無處安放而只好捉住衫袖，「咁我番去㗎啦～」

宋千辰喺原地停咗兩秒，見梁玥嘉冇講啲咩便轉身朝自己家門走去，宋千辰轉身行咗兩步，梁玥嘉伸出手拉住佢嘅衣角，宋千辰隨即停低落嚟



「嗯？」宋千辰回頭微微側着頭望住梁玥嘉

梁玥嘉仍然唔出聲，只係微微扁起嘴，似乎講唔出任何嘢，只好捉住宋千辰嘅衣角唔比佢走

宋千辰無奈地笑咗一笑，行番去梁玥嘉嘅面前，伸出手，溫柔地摸摸梁玥嘉嘅頭，梁玥嘉抬眼望住宋千辰

「係唔捨得我嘅咪講囉～」宋千辰喺梁玥嘉嘅耳邊低語

「冇唔捨得⋯」梁玥嘉撇開臉細聲地否認道，「我地住隔離咋嘛，邊有捨得唔捨得⋯」



「哦⋯」宋千辰點點頭，然後打算轉身，「咁我番去啦～」

梁玥嘉仍然唔鬆開手，死死地捉住宋千辰嘅衫角，宋千辰笑咗一笑，然後又行留去梁玥嘉嘅面前

「做咩呀到底？」宋千辰望住梁玥嘉微笑道，「又唔係唔捨得我，但走又唔比我走咁～」

「唔⋯我地，幾時再見⋯？」梁玥嘉終於開口問道，稍微羞澀嘅表情加上看似難以開口嘅一句，令兩人之間嘅關係變得更曖昧

「冇所謂，你中意幾時見咪幾時見。」宋千辰眼見梁玥嘉嘅羞澀表情，不禁揚起嘴角一笑，然後稍微側身指一指家門，「我地嘅距離唔係只有十步咩？」



梁玥嘉聽到宋千辰嘅說話後比佢逗笑，然後鬆開手，抬頭望住宋千辰

「我地之間嘅距離，有十步？」梁玥嘉問咗一個令人覺得好曖昧嘅問題，宋千辰聽到梁玥嘉嘅題問時怔了怔

「屋企嘅距離係十步。」宋千辰笑了笑直接回答

「咁屋企距離以外嘅嘢呢？」梁玥嘉故意唔將問題嘅重點講清楚，只以「屋企距離以外」作為代表

「屋企距離以外呀⋯」宋千辰當然明白梁玥嘉講緊啲咩，笑了笑，認真地望住梁玥嘉，「呢個距離，宜家係由你決定。」

「咁你呢？你唔行近？」梁玥嘉輕輕抿唇，然後抬眼同時問道

「一直都企喺你面前冇走。」宋千辰輕輕一笑，梁玥嘉從宋千辰嘅笑容中察覺到佢嘅自信，心跳忽然加速，或者因為有自信嘅男仔特別吸引人，「咁你唔行？」

「冇唔行⋯只係⋯」梁玥嘉講咗一半，又抬頭望一望宋千辰，「遲啲先行⋯」



宋千辰忍唔住內心嘅衝動，一下子拉過梁玥嘉嘅手，將佢拉到自己嘅懷中抱緊

「你快啲比答覆我好唔好⋯？」宋千辰細聲地講道

因為梁玥嘉喺佢嘅懷中，距離好近，所以聽到宋千辰講嘅嘢時，感覺就好似直接喺腦海中傳過嚟一樣

「嗯？」梁玥嘉對於宋千辰所講嘅嘢有啲愕然

「雖然我話咗唔逼你，想你諗清諗楚先，但係⋯我想快啲聽到你嘅答覆⋯」宋千辰講道，「好矛盾係咪⋯明明係我叫你諗清楚。」

「矛盾呀～」梁玥嘉笑咗一笑，「又叫我諗清楚但又想快啲知答案～」

「因為當遇到好中意嘅嘢，就會想佔有⋯」宋千辰比剛才更細聲地講道，想比佢聽到同時唔想佢聽到



腦海中閃過今日溫書嘅時候見到李子迪，見到李子迪唔係一個問題，問題係佢伸手摸一摸梁玥嘉嘅頭呢個舉動

宋千辰當然會呷醋，但佢唔可以明顯咁表露出嚟，因為梁玥嘉唔係佢女朋友⋯所以佢只可以默默地將醋意壓抑喺心中

聽到宋千辰講出「佔有」兩個字時，梁玥嘉嘅心瞬間瞬力地緊縮咗一下，然後開始咗強而有力嘅跳動

「你啱啱，講咩⋯？」梁玥嘉問道，腦袋中一片空白

宋千辰靜咗落嚟，默默地搖搖頭

「冇咩⋯」宋千辰微微一笑講道，「你知道我會喺度就得⋯」

「我知⋯」梁玥嘉點一點頭，心中道：「我知道你喺度，你會等我⋯」

「梁玥嘉⋯」宋千辰柔聲地叫咗梁玥嘉一聲，罕有地係叫佢嘅全名



「嗯？」梁玥嘉對於聽到宋千辰叫佢全名有啲意外，微笑問道，「你叫我全名嘅？好少聽你叫我全名。」

自從中意咗宋千辰之後，梁玥嘉特別中意聽到宋千辰叫佢「嘉嘉」，因為總可以比佢一種「兩人好親近」嘅感覺，顯得佢格外特別

「以後叫多啲全名囉～」宋千辰望住梁玥嘉，對住梁玥嘉時臉上掛住嘅笑容都格外溫柔

「唔要⋯！」梁玥嘉嘻嘻地笑了笑，「我都係中意你叫我嘉嘉～」

宋千辰同梁玥嘉對望着，望住梁玥嘉嘅笑容，宋千辰嘅嘴角都會不自覺地上揚起嚟




IG Link: https://www.instagram.com/nd_cotttoncandy/?hl=zh-tw