［愛情純愛］由嗰一個Kiss開始，我地唔再係青梅竹馬: 120. 外套

「好攰呀⋯」張子萊伸咗個懶腰，望向窗外，原來已經到咗黃昏，「嘩～黃昏啦已經～今晚食咩好呀？」

「今晚一齊食飯？」宋千辰聽到張子萊問今晚食咩便頓時抬頭問道

「睇你地啦，你地想番屋企食咪番屋企食囉～」張子萊聳聳肩，「我冇咩所謂，睇你地。」

梁玥嘉下意識望向宋千辰

「好呀。」宋千辰點點頭之後望向梁玥嘉，梁玥嘉亦點一點頭





去到差唔多7點半，大家又再溫咗幾個鐘頭書之後都開始肚餓，決定今日就到呢度為止，去食個飯然後就番屋企

因為今年係中學生涯嘅最後一年，大家都自動地更珍惜同彼此相處嘅時間，畢竟過咗呢一年之後，大家都會各散東西，唔會再好似宜家咁成日見住

⋯

食完飯番屋企嘅路上，得番梁玥嘉同宋千辰兩人一齊並肩而行番屋企

梁玥嘉悄悄地抬頭望咗宋千辰一眼，然後耷低頭同時嘴角微微上揚





「哈啾⋯！」梁玥嘉打咗個噴嚏，宋千辰頓時望向梁玥嘉

「係唔係凍？」宋千辰頓時就關心道

「少少⋯」梁玥嘉做咗個代表「少少」嘅手勢，然後又打咗個噴嚏，「哈啾⋯！」

「著住。」宋千辰頓時將自己身上著住嘅外套除落嚟披到梁玥嘉嘅身上，一個自然嘅舉動，都可以令梁玥嘉心動起嚟，嗰種心如鹿撞嘅感覺又再一次出現喺梁玥嘉嘅心裏

梁玥嘉輕輕捉住衣服避免件外套會跌，臉帶着少許羞澀抬眼望向宋千辰





「著住啦，凍。」宋千辰嘅溫柔令梁玥嘉嘅心臟跳得更強烈

梁玥嘉著上宋千辰嘅外套，佢嘅外套著喺梁玥嘉嘅身上顯得有啲大件，外套嘅衫袖比梁玥嘉嘅手長，梁玥嘉一著上件外套，雙手都消失咗

「有啲大件⋯」梁玥嘉打量自己一番，笑一笑咁講道，臉上泛起淡淡嘅紅霞

「好可愛⋯！」宋千辰望住梁玥嘉著住一件oversize嘅外套嘅模樣顯得有啲笨拙，不過對佢嚟講係正中佢心中嘅紅心

宋千辰偷偷影咗張相，打算好好咁紀念一下呢一刻，豈料梁玥嘉忽然望向宋千辰

「你偷影我！」梁玥嘉一眼就睇穿宋千辰嘅舉動

「唔影囉～」宋千辰聳聳肩，假意要收起手機

「影！」梁玥嘉頓時捉住宋千辰拎住手機嘅手，「梗係影！」





梁玥嘉直接從宋千辰嘅手中搶走手機，開咗手機嘅前置鏡頭

手機入嘅相簿幾乎冇兩個人嘅合照，因為佢地兩人從來都唔會話一齊影相之類，可以見到兩個人一齊合照嘅身影通常都係喺團體照，就好似班相又或者係一大班friend一齊

「好好save喺手機呀～好難得有得我同你兩個人嘅合照㗎！」梁玥嘉將手機遞番比宋千辰，「記得send番比我！」

「知啦～宜家就send番比你！」宋千辰將啱啱鎖上嘅手機再次解鎖，「費是你心掛掛啦～」

「邊有心掛掛⋯」梁玥嘉細聲咁講道，臉頰上嘅紅霞仍未散去

「send咗啦。」宋千辰將手機塞番入褲袋，「你睇下啦～」

梁玥嘉拎手機出嚟睇，見到宋千辰send過嚟嘅message，望住兩人嘅第一張獨照，梁玥嘉嘅心中喜滋滋的





兩人番到屋企門口，又到咗要離別嘅時候，梁玥嘉喺屋企門前悄悄地回頭，眼神中帶點依依不捨，微微鼓起兩泡腮

「我做咩愈嚟愈識撒嬌⋯」梁玥嘉微微耷低頭望住自己無處安放嘅手

「我番去啦～」宋千辰低頭一笑然後故意講道

「哦⋯」梁玥嘉點點頭，但都係忍唔住依依不捨地抬眼望宋千辰，「拜拜⋯」

宋千辰偷偷笑咗一笑，然後望向梁玥嘉，指一指自己家門道：「我番去啦～」

梁玥嘉冇出聲，只係默默咁望住宋千辰

「呀⋯」宋千辰忽然間好似記起啲咩一樣， 由屋企門口走向梁玥嘉

「哼⋯」梁玥嘉默默地喺心裏哼咗一聲，不過眼見宋千辰走向自己，心裏都係高興嘅





宋千辰走到梁玥嘉嘅面前，然後雙手放到梁玥嘉嘅膊頭上，梁玥嘉一臉期待，想知道宋千辰係唔係睇得出佢嘅不捨，所以有啲咩安排

「嘉嘉⋯」宋千辰叫咗梁玥嘉一聲，梁玥嘉一臉期待咁望住宋千辰，「件外套⋯」

「嗯？」梁玥嘉心裏有啲失望，生着悶氣將外套除咗落嚟遞番比宋千辰，「嗱⋯」




IG Link: https://www.instagram.com/nd_cotttoncandy/?hl=zh-tw