［愛情純愛］由嗰一個Kiss開始，我地唔再係青梅竹馬: 113. 隨時吧

「著咩衫好呀星期六⋯」楊楠恩坐低喺床邊，將手上拎住嘅兩套衫扔到床上，「襯嚟襯去都覺得唔好睇呀⋯！」

楊楠恩伏喺由衫疊成嘅小山丘上，今日先係星期四，明明仲有兩日但已經感覺刻不容緩

正因為有中意嘅人，先會覺得刻不容緩，即使係聽日都可以見面，但都感覺「一日不見如隔三秋」，就算只係一秒鐘，都會希望時間快啲過，時間一分一秒咁過，你卻一秒一秒地倒數，計算着同聽日嘅到來嘅距離

「中意一個人好難呀⋯」楊楠恩望住自己嘅手，默默地講道，緩緩合起雙眼，「我係唔係應該放棄⋯？」

楊楠恩合起雙眼同時，腦海浮現出嘅係宋千辰，同時諗到梁玥嘉⋯



中意一個人，藏得再好，都冇辦法藏起眼神，眼神可以代替言語表達心中所想，眼裏全都係佢，佢就好似係眼裏嘅星辰一樣，係眼裏唯一嘅星星，無法被取代

⋯

「天黑啦⋯？」梁玥嘉抬起頭嘅時候，發現外面天都已經黑晒，「唔⋯！好攰呀！」

梁玥嘉伸咗個懶腰，視線悄悄地落喺宋千辰嘅身上

宋千辰頭微微耷着，手托住腮，正在打盹



梁玥嘉嘅嘴角微微揚起，托住腮，望住宋千辰恰眼瞓

「恰眼瞓⋯」梁玥嘉悄悄地伸出拎住筆嘅手，筆頭輕輕掂到宋千辰嘅頭髮

宋千辰緩緩睜開眼，梁玥嘉嘅手停喺半空，愣住了望住宋千辰

「嘻⋯」梁玥嘉尷尬地笑咗一笑，吐吐舌頭，慢慢地收回手

宋千辰企起身伸咗一個懶腰之後執起枱上嘅嘢，然後拎住啲書行番入房，梁玥嘉企起身，行入房，將啲書房晒入書包入面



「今晚一齊食飯定點呀？」梁玥嘉將書包拉鍊拉上同時問宋千辰

「你想出去食定點呀？」宋千辰轉身望向梁玥嘉，梁玥嘉彎下腰拎起書包，將書包孭到身上，「Okay⋯出去食啦我地⋯」

宋千辰經過梁玥嘉嘅身邊，自然地伸手摸一摸梁玥嘉嘅頭

「等我去埋個toilet先出去食飯。」宋千辰打開房門行咗出去，梁玥嘉企喺原地，摸一摸自己嘅頭頂

「出茅招嘅⋯」梁玥嘉細細聲講道，臉上掛上淡淡嘅笑容，泛起淡淡嘅紅霞

過咗一陣之後傳嚟廁所嘅開門聲，宋千辰喺廁所行出嚟，番房拎嘢準備出去，一打開房門就見到梁玥嘉以一個頹廢嘅坐姿坐咗喺佢張電腦椅上

「行得啦。」宋千辰雙手搭喺櫈背上，耷低頭望住梁玥嘉

「哦。」梁玥嘉抬起頭望向宋千辰，然後企起身拎起放喺地上嘅書包，「行啦，肚餓⋯」



宋千辰孭起書包，同梁玥嘉一齊行出去玄關著鞋

「你做咩孭住書包？」梁玥嘉一邊著鞋一邊問道，手扶住喺鞋櫃面，另一隻手將鞋踭勾番出嚟

「費是得你一個孭住書包覺得尷尬。」宋千辰一臉正經咁講道

「我又唔係孭住你⋯有咩尷尬⋯」梁玥嘉推門行出去，宋千辰跟喺佢身後

「你點孭得起我？」宋千辰不禁笑咗出嚟，「我人又高過你又重過你。」

「假設咋嘛！」梁玥嘉微微鼓起兩泡腮，「我都知我孭唔起你，你高我成半個頭有多呀先生！明明我地以前都差唔多高⋯」

「你講緊嘅以前係幾時？中一呀？」宋千辰行入升降機，企喺門邊，梁玥嘉行到宋千辰嘅身旁企



「以前大家都差唔多高咋嘛！你宜家高我成個頭啦！」梁玥嘉抬起頭望住宋千辰，宋千辰微微耷低頭同梁玥嘉對視着

「我係男仔嘛，而且我都未有180。」宋千辰覺得自己唔太高，喺平均值上面，「我想高到180。」

「你宜家幾高？」梁玥嘉好奇地問道

「178好似。」宋千辰諗咗一諗之後回答道

「178仲唔夠？我先得166⋯」梁玥嘉一臉驚訝，大概係因為宋千辰已經178cm高但都覺得唔夠

「你係女仔嘛，唔洗咁高，太高會搵唔到男朋友。」宋千辰笑道

喺梁玥嘉嘅耳中聽起嚟，總覺得宋千辰嘅說話有弦外之音

「我宜家有男朋友咩⋯」梁玥嘉不自覺地細細聲講咗心中諗緊嘅嘢出嚟



「你想嘅話隨時都可以有。」企喺梁玥嘉身旁嘅宋千辰耷低頭邊睇手機邊回答道

其實宋千辰冇留心睇手機內嘅內容，望住手機單純地係為咗避免尷尬，看似心如止水般講出呢句話嘅宋千辰，心臟嘅跳動速度早已變得瘋狂

梁玥嘉聽到宋千辰嘅說話時怔了一怔，腦海中頓時變得一片空白，連升降機已經到咗3樓、門都打開咗都唔知

「你做咩唔行？」宋千辰行咗出升降機之後回頭望向梁玥嘉，「3樓啦！呢度冇得直接落到地面㗎！」總




IG Link: https://www.instagram.com/nd_cotttoncandy/?hl=zh-tw