［愛情純愛］由嗰一個Kiss開始，我地唔再係青梅竹馬: 112. 好主動！？

「哦。」宋千辰將筆袋同功課File拎咗出嚟放到餐枱上，將書包放喺旁邊嘅位置

梁玥嘉坐低喺宋千辰對面，望住宋千辰笑咗一笑，然後拎出功課同書；宋千辰見到梁玥嘉望佢，自然地揚起嘴角，露出淡淡嘅笑容

梁玥嘉總係不自覺地抬眼偷瞄宋千辰，然後又耷低頭；宋千辰都感覺到梁玥嘉一直偷望佢，便喺心中計算好梁玥嘉大概相隔幾耐會望佢，喺梁玥嘉當眼望佢嘅時候，宋千辰直接抬頭望住梁玥嘉

梁玥嘉一抬眼，見到 宋千辰已經望住佢，頓時笑咗出嚟

「專心做功課啦你⋯！」宋千辰笑了笑，用筆輕輕敲咗梁玥嘉嘅頭一下，「仲笑⋯」



「嘻嘻⋯」梁玥嘉微微耷低頭，笑了笑，然後又不禁抬眼望宋千辰

宋千辰耷低頭做功課，梁玥嘉望到嘅，係宋千辰專心做功課嘅模樣

「根本完全冇辦法專心做功課呀！」梁玥嘉嘅內心吶喊道

幾經辛苦終於做好晒聽日要交嘅功課，梁玥嘉鬆咗一口氣，將功課疊番好放入功課File

「不如休息15分鐘先溫書⋯」梁玥嘉定睛望住執緊嘢嘅宋千辰



「好。」宋千辰點一點頭，然後拎住書包同功File行入房，枱面上只放着佢嘅筆袋同中文書、筆記

梁玥嘉企喺虛掩着嘅房門前，探頭望入去，悄悄地推開門，放輕腳步行入去宋千辰嘅睡房，定睛地望住擺緊嘢嘅宋千辰

宋千辰將要放嘅嘢都放好後，自然地回頭，見到梁玥嘉定睛望住佢，不禁一笑，然後行到去梁玥嘉嘅面前，兩人嘅距離好近，宋千辰微微耷低頭望住梁玥嘉

梁玥嘉嘅心跳起伏瞬間變得好快，但佢完全冇走嘅打算，只係微微抬起頭望住宋千辰

「企喺度比你望到夠。」宋千辰揚起嘴角，淡淡嘅微笑裏就好似夾雜咗某種魅力一樣，令梁玥嘉嘅視線完全離唔開佢



梁玥嘉真係定睛望住宋千辰，但愈專注地望住宋千辰，心裏想直接錫上去嘅衝動感愈強烈

「想直接捉住佢嘅校呔、踮腳錫上去⋯」梁玥嘉喺心裏講道，感覺嗰種衝動真係好似要衝出嚟一樣

喺宋千辰清澈嘅雙眸中，梁玥嘉望到自己嘅倒影

就喺下一個瞬間，心中嘅衝動已經壓抑唔住要成為現實，梁玥嘉微微踮起腳尖、伸手捉住宋千辰嘅校呔、向下拉，本來雙手插袋嘅宋千辰根本毫無還擊之力，身上傾前向前傾、腰都彎下

梁玥嘉嘅鼻尖同宋千辰嘅鼻尖就只剩下0.1cm嘅距離，可以感覺到對方嘅鼻息

就喺梁玥嘉嘅唇快要碰上宋千辰嘅唇時，宋千辰飛快地伸左手掩住梁玥嘉嘅嘴，擋喺自己同梁玥嘉嘅唇中間；右手㩒住牆

「嗯？」梁玥嘉好似猛然清醒過嚟一樣，抬腰望住宋千辰，腦袋中快速運算着剛才一秒間發生嘅事，梁玥嘉嘅臉瞬間就紅起嚟

「你就咁想錫我咩？」 宋千辰故意壓低聲線，柔聲問道



聽到宋千辰嘅語氣梁玥嘉頓時感覺渾身都傳嚟觸電一樣嘅感覺，臉變得更紅、心跳得更快

「嘉嘉⋯」宋千辰喺梁玥嘉嘅耳邊，壓低聲線輕喚佢對梁玥嘉嘅暱稱，低沉嘅聲線有種性感同魅力，「我話你呀，成日都衝動想錫我唔得㗎⋯」

梁玥嘉喺宋千辰湊緊佢耳邊嘅時候不禁緊緊地閉起雙眼，心跳快到好似要心臟病發一樣，手不禁用力地捉緊宋千辰嘅裇衫

宋千辰見梁玥嘉一個羞澀嘅模樣，壓抑唔住想再捉弄佢一下嘅衝動

「你仲未比答覆我就錫咗我兩次⋯咁好咩？」宋千辰再次喺梁玥嘉嘅耳邊以相同語氣問道

「你好煩呀⋯！」梁玥嘉微微低着頭，移開了視線，「邊個錫你啫，自作多情⋯」

「哦？我自作多情？」宋千辰望住梁玥嘉，「真係咩？」



「煩呀⋯！」梁玥嘉推開宋千辰，紅着臉拉開房門行咗出廳

梁玥嘉坐番喺餐枱前，雙手喺臉頰前上下撥着

「呼⋯」梁玥嘉呼咗一口氣，「梁玥嘉呀梁玥嘉，冷靜！冷靜！」

宋千辰一臉悠閒咁行出嚟，就好似咩事都冇發生過一樣坐番喺梁玥嘉對面

梁玥嘉頭都唔敢抬，臉頰仍然發熱中，宋千辰則當冇事發生一樣打開書同筆記準備溫書

另一邊廂，楊楠恩企喺打開咗門嘅衣櫃前，幾乎將衣櫃裏一半嘅衫都拎晒出嚟

「哎呀！星期六著咩衫好呀！」楊楠恩苦惱地望住手上拎住嘅兩套衫，「著牛仔褲好定著裙好？點樣先好睇啲呀？」

楊楠恩已經襯咗好幾套衫，但每一套都覺得唔夠好睇，身高166cm、外表蠻好嘅楊楠恩其實好多類型嘅衫都carry得起，只不過佢想以最好嘅一面去見自己中意嘅人






IG Link: https://www.instagram.com/nd_cotttoncandy/?hl=zh-tw